الاشتى ءبىز كەڭ كولەمدە تانىتۋىمىز قاجەت. بۇل باعىتتا ءتۇرلى جۇمىستار جاسالۋدا. قوعام الاش ارىستارىنا ءوزىنىڭ وڭ باعاسىن بەرىپ قويعان. ءقازىر الاشتى قالىڭ قاۋىم قولدايدى دەپ ويلايمىن. سەبەبى قازاق بولىپ، مەملەكەت بولىپ ساقتالۋىمىز ءۇشىن ءبىز الاشقا ورالامىز. الاش – ءبىزدىڭ تەمىرقازىعىمىز.
الايدا كەيدە الاش مۇراسىن دارىپتەۋدە كوڭىل تولمايتىن جاعدايلار دا كەزدەسەدى. ونى الاش قايراتكەرلەرىنە بەرىلگەن كوشەلەردەن دە بايقايمىز. ماسەلەن الاش ارىستارىنىڭ كوبىنە كوشە اتتارى استانانىڭ شەت ايماقتارىنان بۇيىردى. احمەت بايتۇرسىن ۇلىنىڭ كوشەسى قالانىڭ شەتىندە بولدى. كوپتىڭ ماسەلە كوتەرۋىمەن احاڭنىڭ كوشەسى قازىرگى ازىرەت سۇلتان مەشىتىنىڭ قاسىنان جاڭا تەمىر جول ۆوكزالىنا قاراي باعىتتالعان ۇلكەن كوشەگە اۋىستىرىلدى. ءاليحان بوكەيحاننىڭ دا كوشەسى سولاي بولدى. بۇرىن شاعىن عانا كوشە بولىپ ەدى. كەيىن الاش كوسەمىنە كوشە سول جاعالاۋدان بەرىلدى. نەگە سول جاعالاۋداعى ۇلكەن داڭعىلداردى الاش قايراتكەرلەرىنە بەرمەيمىز؟ بۇل ماسەلە دە ءبىزدى تولعاندىرادى.
ءاليحان بوكەيحاننىڭ ەسكەرتكىشى قالامگەرلەر اللەياسىنا قويىلدى. ءاليحان – جان جاقتى تۇلعا. ادەبي شىعارماشىلىقپەن دە اينالىسقان. جازعان شىعارمالارى، اۋدارمالارى بار. ءبىراق ءاليحان – الدىمەن ۇلت-ازاتتىق الاش قوزعالاسىنىڭ كوسەمى عوي. سول سەبەپتى ءبىز ءاليحانعا جەكە ەڭسەلى ەسكەرتكىشتى ەسىمىمەن اتالاتىن كوشەگە قويساق جاراسار ەدى.
ماعجان جۇمابايۇلىنا استانادا ءالى كۇنگە دەيىن ەسكەرتكىش جوق. ماعجانعا ەسكەرتكىشتى تۇرىك باۋىرلارىمىز انكارا قالاسىنىڭ تورىندە قويعان. وسىنداي جاعدايلاردى ويلاعاندا، ءالى دە الاشقا دۇرىس باعا بەرىلمەي جاتىر دەپ ويلايمىز. ونى الاشتانۋشى ماماندار، قوعام بەلسەندىلەرى، جۋرناليستەر ايتادى. بىرتە-بىرتە بۇل باعىتتا دا جاعداي جاقسارادى دەپ سەنەمىز.
الاشتى زەرتتەيتىندەر كوبەيىپ جاتقاندىعى قۋانتادى. سەبەبى الاش دەگەنىمىز – ۇلتتى، ەلدى جانە ءوز-وزىمىزدى تانۋ، تاۋەلسىزدىككە، ەلدىككە قىزمەت ەتۋ. الاش دەگەنىمىز – ۇلتتىڭ ۇيىسۋى، ۇلت رۋحىنىڭ جاڭعىرۋى، تاريحي تۇلعالاردىڭ ءتىرىلۋى. مۇنىڭ بارلىعى تاۋەلسىزدىككە قىزمەت ەتەتىن جاعداي. بۇل ورايدا سىن ايتۋ قاجەت ەمەس. جالپى جەر-جەردە ينستيتۋتتار، قوعامدىق قورلار جۇمىستارىن جۇرگىزىپ جاتىر. ولاردىڭ كوبىسىنەن حاباردارمىز. بۇل باعىتتا جاسالىپ جاتقان جۇمىستارعا تىلەكتەسپىز.
الاشتانۋشى عالىم قايىربەك كەمەڭگەر
El.kz سايتىنا بەرگەن سۇحباتىنان ءۇزىندى
