قىرعىزستاننىڭ كەدەن قىزمەتى باسشىسىنىڭ بۇرىنعى ورىنباسارى رايىمبەك ماترايموۆ باكۋدەن بىشكەككە ەكستراديسيالاندى دەپ حابارلايدى alash.kz سايتى Kaktus.media-عا سىلتەمە جاساپ.
باسىلىم مالىمەتىنشە، ماترايموۆ ۇكىمەتتىك ۇشاقپەن جەتكىزىلگەن. ونىڭ قاسىندا «وشگاز» كاسىپورنى ديرەكتورىنىڭ بۇرىنعى ورىنباسارى تىلەك ماترايموۆ تا بولعان.
سونىمەن قاتار، الەۋمەتتىك جەلىدە ماترايموۆتىڭ بىشكەككە كەلە جاتقان ساتىنەن سۋرەتتەر تاراعان. بىرىندە ماترايموۆتىڭ قولىنا كىسەن سالىنعان بولسا، ەكىنشى سۋرەتتە ەر ادام ۇشاقتان ءتۇسىپ كەلە جاتادى.
ايتا كەتەيىك، بيىل قاڭتاردىڭ سوڭىندا رايىمبەك ماترايموۆقا ىزدەۋ جاريالانىپ، ونىڭ ميللياردتاعان سوم دەپ باعالانعان جىلجىمايتىن مۇلىكتەرى مەملەكەتكە بەرىلگەن بولاتىن.
رايىمبەك ماترايموۆ قىرعىزستان كەدەن قىزمەتى باسشىسىنىڭ بۇرىنعى ورىنباسارى بولعان.
23 ناۋرىزدا قىرعىزستاننىڭ ۇلتتىق قاۋىپسىزدىك مەملەكەتتىك كوميتەتى بىشكەكتە قىرعىزستان باسشىلىعىنا قاستاندىق جاساماق بولعان ترانسۇلتتىق ۇيىمداسقان قىلمىستىق توپتىڭ بەس مۇشەسى ۇستالعانىن حابارلادى. كوميتەت ولاردىڭ بارلىعى ازەربايجاننان كەلگەنىن قوستى. ۇلتتىق قاۋىپسىزدىك مەملەكەتتىك كوميتەتى ماترايموۆتىڭ ۇستالعاندارمەن بايلانىسىن انىقتادى.
ءبىراز ۋاقىتتان كەيىن كوميتەتتىڭ باسپا ءسوز قىزمەتى قوسىمشا مالىمدەمە جاساپ، وندا ىزدەۋدە جۇرگەن قىرعىز وليگارحى رايىمبەك ماترايموۆ ازەربايجان استاناسى باكۋدە جۇرگەنىن حابارلادى. ال ونى ۇستاۋ جانە ودان ءارى قىرعىزستانعا ەكستراديسيالاۋ ماسەلەسى ازەربايجاننىڭ قۇقىق قورعاۋ ورگاندارىمەن تالقىلاندى.
