قىرعىز بەن رەسەيدىڭ اراسىنان "الا مىسىق جۇگىرىپ ءوتتى". قىرعىزستان ءسىم رەسەيدىڭ قۇقىق قورعاۋ ورگاندارىنىڭ قىزمەتكەرلەرىن ماسكەۋدەگى قىرعىزستان ەلشىلىگىنىڭ قىزمەتكەرلەرىنىڭ ءبىرىنىڭ وتباسى مۇشەلەرىنە قاتىستى دورەكىلىگى ءۇشىن جازالاۋدى تالاپ ەتتى، دەپ حابارلايدى Alash.KZ ۇلتتىق پورتالى Orda.kz-كە سىلتەمە كورسەتە وتىرىپ.
قىرعىزستان سىرتقى ىستەر مينيسترلىگىنىڭ مالىمەتىنشە، 12 ساۋىردە ءسىم كونسۋلدىق دەپارتامەنتىنە رەسەي ەلشىلىگىنىڭ كەڭەسشى-كونسۋلى اندرەي بۋريەۆ شاقىرىلدى. وعان رەسمي نارازىلىق نوتاسى تابىستالدى. قىرعىزستان ماسكەۋدەگى ديپلوماتتاردىڭ ءبىرىنىڭ وتباسى مۇشەلەرىنە قاتىستى ءجونسىز قارىم-قاتىناستى تەرگەۋدى تالاپ ەتتى. رەسەيلىك پوليسەيلەر قىرعىزستان ەلشىلىگى كەڭەسشىسىنىڭ ۇيىنە كىرىپ، ديپلومات تۋىستارىنا كۇش قولدانعان.
قىرعىزستان ءسىم مالىمدەمەسىندە:"رەسەي فەدەراسياسى قۇقىق قورعاۋ ورگاندارى تاراپىنان قىرعىز رەسپۋبليكاسىنىڭ اككرەديتتەلگەن ديپلوماتتارىنا قاتىستى مۇنداي ارەكەتتەرگە جول بەرىلمەيدى،ءىستى مۇقيات تەرگەۋدى جانە كىنالى ادامداردى مۇمكىندىگىنشە قىسقا مەرزىمدە جاۋاپقا تارتۋدى تالاپ ەتەمىز"، - دەلىنگەن.
كونسۋل بۋريەۆ وكىنەتىنىن جەتكىزىپ اتالمىش فاكت بويىنشا تەكسەرۋ جۇرگىزەمىز دەپ ۋادە بەردى.
رەسەيلىك تەلەگرام-ارنالار بۇعان دەيىن ماسكەۋ پوليسەيلەرىنىڭ 8 ساۋىردە قىرعىزستان ەلشىلىگىنىڭ كەڭەسشىسى تۇراتىن پاتەرگە كىرگەنىن، ديپلوماتتىڭ ايەلى مەن بالالارىنان كوشى-قون ەسەبىنە قويۋ تۋرالى قۇجاتتاردى تالاپ ەتكەنىن حابارلاعان. ەلشىلىك قىزمەتكەرىنىڭ تۋىستارى ديپلوماتيالىق پاسپورتتاردى ۇسىنعان، ءبىراق رەسەيلىك قاۋىپسىزدىك كۇشتەرى بۇعان قاناعاتتانا قويماعان.
جوگوركۋ كەنەش دەپۋتاتى داستان بەكەشيەۆ بۇل اقپاراتتى راستاپ، وقيعا سالدارىنان ەشكىم فيزيكالىق زاقىم الماعانىن ايتتى. الايدا، بۇل پوليسيا قىزمەتكەرلەرىنىڭ مىنەز-قۇلقىن اقتامايتىنىن جەتكىزدى.
"ەلشىلىك قىزمەتكەرلەرىنە بۇلاي جاسالسا،ءتىپتى، قاراپايىم ازاماتتارىمىزعا نە جاسامايدى دەگەن ويعا قالاسىڭ. رەسەي پوليسياسى ەسىردى"، - دەپ جازدى داستان بەكەشيەۆ.
