پرەزيدەنت جانىنداعى قوعامدىق سەنىم ۇلتتىق كەڭەسىنىڭ بۇرىنعى مۇشەسى ارمان شورايەۆ الەۋمەتتىك جەلىدەگى پاراقشاسىندا ۇندەۋ جاساپ، قازاقستانعا قونىس اۋدارىپ جاتقان رەسەي ازاماتتارىنا ەسكەرتۋ جاسادى.
شورايەۆتىڭ ايتۋىنشا، رەسەيگە الەم ەلدەرىنەن سانكسيالار سالىنعاننان كەيىن، قازاقستانعا قونىس اۋدارۋعا نيەتتى رەسەيلىكتەر كوبەيگەن.
– سانكسيالاردان كەيىن قازاقستانعا رەسەي ازامااتتارى كەلىپ جاتىر. سەندەر ۋكراينانىڭ بەرەكەسىن الىپ، بەيبىت تۇرعىندار، بالالار مەن قاريالار قازا تاپقان كەزدە ءۇنسىز قالدىڭدار. رەسەي قالالارىنا ەشكىم بومبا تاستاپ جاتقان جوق. سول سەبەپتى وزدەرىڭنىڭ «سولتۇستىك كورەيالارىڭنان» قاشۋدىڭ ەش سەبەبى جوق. سەندەر ءۇنسىز قالۋلارىڭ ارقىلى ءپۋتيننىڭ قولداۋشىسى بولدىڭدار. بىزگە كەلىپ، ەرتەڭگى كۇنى «پۋتين مۇندا اسكەر كىرگىز» دەيسىڭدەر. سەندەردى مۇندا ەشكىم كۇتىپ وتىرعان جوق، بيلەت ساتىپ الماڭدار، – دەدى شورايەۆ.
ارمان شورايەۆ 2004 جىلدان 2006 جىلعا دەيىن «حابار» اگەنتتىگى» اق ورتالىق بيۋروسىن باسقاردى. كەيىن «حابار» اگەنتتىگى» اق باس ديرەكتورىنىڭ ورىنباسارى، قازاقستان رەسپۋبليكاسى پرەزيدەنتى اكىمشىلىگىنىڭ قوعامدىق-ساياسي ءبولىمىنىڭ باس ينسپەكتورى بولىپ جۇمىس ىستەدى. 2007 جىلعى ماۋسىمنان باستاپ 2014 جىلعى قاراشاعا دەيىن «كوممەرسيالىق تەلەديدار ارناسى» اق «كتك»-نىڭ باس ديرەكتورى بولدى. 2019 جىلدىڭ شىلدەسىنەن 2020 جىلدىڭ ناۋرىزىنا دەيىن قازاقستان رەسپۋبليكاسى پرەزيدەنتىنىڭ جانىنداعى قوعامدىق سەنىم ۇلتتىق كەڭەسىنىڭ مۇشەسى بولدى.
دەرەككوز
