قىزىعى – سول بالالاردىڭ ءبىرى ءومىرحاننىڭ بولەسىنىڭ نەمەرەسى بولىپ شىققان. تاعدىر قالاۋىمەن جەتىمدەر ۇيىنە تۇسكەنىن ول كەيىن بىلگەن. بالالاردىڭ الدى اياقتانىپ ۇلگەرسە، كەنجەلەرى بالاباقشادا. حالىق ءومىرحان مەن امانگۇلدى ونەرلى جۇپ رەتىندە دە جاقسى بىلەدى. وتباسىلىق "شاشۋ" ءانسامبلى ءار ءتۇرلى ساقىنالاردا ونەر كورسەتىپ ءجۇر.
ءتىپتى، جۋىردا جەكە كونسەرتتەرىن دە بەرگەن. وتاعاسى بالالارىنىڭ بولاشاعى ءۇشىن ەشتەڭەدەن ايانبايتىنىن ايتادى. ەشكىمنەن كومەك تە كۇتكەن ەمەس. بىلتىر "ۇل-قىزدارىم سپورتپەن دە شۇعىلدانسىن، اسىر-سالىپ ويناسىن" دەگەن نيەتپەن ءوز كۇشتەرىمەن ۇيلەرىنە جاپسارلاس سپورت زالدىڭ قۇرىلىسىن باستاعان ەدى. الايدا، قول ۇشىن سوزىپ، قۇرىلىس ماتەريالدارىن اكەلىپ بەرەمىن دەگەن بىرەۋ الداپ سوققان. ءومىرحان جەتەسوۆ ول ادامنىڭ جەكە مالىمەتتەرىن جاريا ەتپەدى. ءالى قاتەسىن ءتۇسىنىپ، قارجىنى تولىق اكەلىپ بەرەر دەگەن ۇمىتتە.
"مەن كاسىپكەرلەردەن كومەك سۇراپ، ەلدى ارالاپ شىقسام، الدەقاشان بايىپ كەتەتىن ەدىم. ءبىراق ونداي ارەكەتكە بارمايمىن. بالالاردى ءوزىم ءۇشىن اسىراپ وتىرمىن. ءبىراق قول ۇشىن سوزامىن دەگەندەردىڭ بەتىن قايتارعان ەمەسپىن. مىنا سپورت زالدى دا نەسيە الىپ سالىپ جاتىرمىن. قارىزعا كىردىك. كەشە بالالارىمدى ۇيىرمەلەرىنە، مەكتەپتەرىنە تاسىپ جۇرگەن كولىگىمنىڭ موتورى كەتىپ قالدى. ول دا جىعىلعانعا جۇدىرىق بولىپ وتىر. بىزگە قاتتى باتىپ وتىرعانى – ۇلدارىم مەن قىزدارىم ءۇشىن سالىپ جاتقان سپورت زال قۇرىلىسىنىڭ توقتاپ قالعانى. ءبىز ول جىگىتتى ءالى سوتقا بەرە قويعان جوقپىز. ايەلى مەن اناسى جىلاپ، كەشىرىم سۇراپ كەلدى. ول ادامنىڭ ءبىز سەكىلدى وتباسىنى الداۋعا قالاي ءداتى بارعانىن تۇسىنە المادىم"، - دەيدى ول.
جەتەسوۆتەر ءقازىر قالا ىشىندەگى جەكە ۇيدە تۇرادى.بۇل باسپانانى دا ءوز كۇشتەرىمەن بىرنەشە مارتە ۇلكەيتكەن. جەرگىلىكتى بيلىك وكىلدەرىنىڭ دە كومەكتەسەمىز دەگەن ۋادەلەرى جەلگە ۇشىپتى.
"جاتقان جەرى جايلى بولسىن، ساپاربايەۆ اعامىز دا كەرەمەت ادام عوي. ءبىراق، ول كىسى اكىمدىكتەن كەتكەننەن كەيىن ءۇش قاباتتى كوتەدج سالىپ بەرەمىن دەگەن ءسوزى اياقسىز قالىپ قويدى. كەشەگىدە وسىنداعىلار اۆتوبۋس بەرەمىز دەدى. بالالارىم قاتتى قۋانىپ ەدى. ول دا ورىندالمادى. مەن ادامدارعا ايتامىن، "بالالارعا ۋادە بەرمەڭىزدەر. ۋادە بەرسەڭىزدەر، ورىنداڭىزدار"،- دەيمىن. ويتكەنى، مەن بالالاردى ەشقاشان الدامايمىن. بالاعا وتىرىك ايتساڭ، ەكىنشى ساعان سەنبەيدى"، - دەيدى كوپ بالالى اكە.
امانگۇل مەن ءومىرحان بالالارىنىڭ بولاشاعىنا ۇلكەن سەنىممەن قارايدى.
"باعىپ-قاققان پەرزەنتتەرىمىز ادال ازامات بولىپ وسسە، باسقا ارمانىمىز بولماس ەدى"، - دەيدى.
ولار كەڭ ۇيگە كوشسە، تاعى دا تاعدىر تەپەرىشىن كورگەن جەتىم بالالاردى اسىراپ الۋعا كەت ءارى ەمەس.
