پرەزيدەنت ۆلاديمير پۋتين اينالاسىنداعى ماگناتتاردىڭ ءبىرى ولەگ دەريپاسكا 7 ناۋرىزدا تۋيتتەردە ۋكرايناداعى سوعىس تەز توقتاۋى ءتيىس دەپ جازدى.
"بەيبىتشىلىك تەز ورناۋى ءتيىس، ءبىز قايتا ورالمايتىن نۇكتەدەن ءوتىپ كەتتىك... تۇتاس الەم باسقا بولادى، رەسەي باسقا بولادى" دەپ جازدى ول.
تاعى ءبىر ماگنات ۆلاديمير لىسين 7 ناۋرىز نوۆوليپەسك قالاسىنداعى بولات وندىرەتىن زاۋىت جۇمىسشىلارىنا ارناپ جازعان مالىمدەمەسىندە "ۋكرايناداعى قانتوگىس – تراگەديا، ونى اقتاۋ قيىن" دەپ جازدى. نوۆوليپەسك مەتاللۋرگيا كومبيناتىنىڭ باسشىسى قاقتىعىستى ديپلوماتيالىق جولمەن شەشۋگە شاقىرىپ، سوعىس جاقىن ارادا اياقتالادى دەپ ۇمىتتەنەتىنىن جەتكىزدى.
رەسەيلىك كاسىپكەر ولەگ تينكوۆ 6 ناۋرىزدا ءوزىنىڭ ميللياردەرلەر قاتارىنان شىعىپ قالعانىن، سانكسياعا بايلانىستى كوپ قاراجاتتان ايىرىلعانىن حابارلادى. ول جۋرناليستەرگە ەندى بۇدان بىلاي ءوزىن وليگارح دەپ اتاماۋدى وتىنگەن.
