حاركوۆ اكىمشىلىگىنىڭ باسشىسى ولەگ سينەگۋبوۆ رەسەيدىڭ ۋكرايناعا شابۋىلىنىڭ ءتورتىنشى كۇنى جەڭىل اسكەري تەحنيكا قالاعا باسىپ كىرگەنىن مالىمدەدى.
بۇل اقپاراتتى ۋكراينا ىشكى ىستەر ءمينيسترىنىڭ ورىنباسارى انتون گەراششەنكو دا راستاپ، بىرنەشە جەڭىل ۇرىس تەحنيكاسى حاركوۆ كوشەسىندە كەتىپ بارا جاتقانىن Telegram ارناسىندا كورسەتتى.
ولەگ سينەگۋبوۆ قالا تۇرعىندارى ۇيدە وتىرۋعا شاقىردى.
"حاركوۆكە جاۋدىڭ جەڭىل تەحنيكاسى كىردى. قالا ورتالىعىندا دا ءجۇر. نازار اۋدارىڭىزدار! سىرتقا شىقپاڭىزدار! ۋكراينا قارۋلى كۇشتەرى جاۋدى جويادى"،– دەپ جازدى ول.
ۋكراينا استاناسىنىڭ تۇرعىندارى 27 قاڭتار كۇنى تاڭەرتەڭ جارىلىس بولىپ جاتقانىن حابارلادى. جارىلىس كييەۆتىڭ وڭتۇستىك-شىعىس بولىگىندە بولعان – رەسەي كييەۆتىڭ وڭتۇستىگىندەگى ۆاسيلكوۆ قالاسىنداعى مۇناي بازاسىنا سوققى بەرگەن.
"جاۋ ءبارىن جويعىسى كەلەدى"،- دەدى ۆاسيلكوۆ قالاسىنىڭ باسشىسى ناتاليا بالاسينوۆيچ.
حاركوۆ تۇبىندە قاقتىعىس بولىپ جاتقان كەزدە ۋكراينا پرەزيدەنتىنىڭ ءوفيسى رەسەي اسكەرى قالاداعى گاز قۇبىرىن جارعانىن مالىمدەدى. ۇكىمەت تۇتىننەن قورعانۋ ءۇشىن تەرەزەگە ىلعال ماتا نەمەسە داكە تۇتۋ قاجەتتىگىن ەسكەرتتى.
زەلەنسكيي ءوفيسى جۋليانى اۋەجايىندا تاعى دا جارىلىس بولعانىن حابارلادى. ۋكراينا اسكەرى كييەۆ قورعانىسىن ۇستاپ تۇرعانىن، رەسەيدىڭ قالاعا كىرىپ كەتكەن "ديۆەرسيالىق توپتارىن" جويعانىن حابارلادى.
"ەلىمىزدى ازات ەتكەنشە سوعىسامىز"،- زەلەنسكيي ۆيدەو مالىمدەمەسىندە.
ەۋروپا وداعى، فرانسيا، گەرمانيا، يتاليا، ۇلىبريتانيا، كانادا جانە اقش جەتەكشىلەرى رەسەيدىڭ كەي بانكتەرىن SWIFT جۇيەسىنەن اجىراتۋعا جانە رەسەي ورتالىق بانكىن شەكتەۋگە ۋاعدالاسقان.
26 اقپاندا ۋكراينا دەنساۋلىق ساقتاۋ ءمينيسترى ۆيكتور لياشكو رەسەي شابۋىلىنىڭ سالدارىنان 198 ادام ءولىپ، مىڭنان استام ادام جارالانعانان حابارلاعان. رەسەي سوعىس قۇرباندارىن جاريالاعان جوق.
26 اقپاندا بۇۇ بوسقىندار ءىسى بويىنشا اگەنتتىگى ۋكراينانىڭ 120 مىڭنان استام ازاماتى شەتەلگە كەتكەنىن حابارلادى. نەگىزىنەن ايەلدەر مەن بالالاردان تۇراتىن بوسقىندار پولشا، رۋمىنيا، مولدوۆا جانە ۆەنگرياعا كەتكەن. اسكەرگە جارامدى ەر ادامداردى ۋكراينادان شىعارمايدى.
