رەسەي اسكەرى ۋكرايناعا باسىپ كىرگەن العاشقى 3 ايدا سوۆەت وكىمەتىنىڭ اۋعانستاندا 10 جىل سوعىسقانداعى شىعىنىنا پارا-پار شىعىن كورگەن بولۋى مۇمكىن. بۇل اقپاراتتى 23 مامىردا بريتانيا بارلاۋى جاريالادى.
ۋكرايناداعى سوعىس تۋرالى كەزەكتى اقپاراتىندا بريتان بارلاۋى رەسەي اسكەرىنىڭ كوپ شىعىنعا ۇشىراعانىن جەكەلەگەن بولىمشەلەرىنىڭ تاكتيكالىق دايىندىعىنىڭ ناشارلىعىنا، كوماندالىق باسقارۋدىڭ يكەمسىزدىگىنە جانە اۋەدەن قولداۋدىڭ جەتكىلىكسىزدىگىنە بايلانىستىردى.
مامىر ايىنىڭ ورتاسىندا بريتانيا بارلاۋى رەسەي اقپاندا ۋكرايناعا باسىپ كىرۋ ءۇشىن جيناعان قۇرلىقتاعى اسكەرىنىڭ ۇشتەن بىرىنەن ايىرىلعانىن جاريالادى. ول كەزدە شامامەن 150 مىڭ جاۋىنگەر بولعان. الايدا ونىڭ قانشاسى ولگەنى بەلگىسىز.
"مەديازونا" ەسەبىنشە، ۋكراينادا ولگەن رەسەيدىڭ 2500 جاۋىنگەرىنىڭ ءاتى-جونى اشىق دەرەكتەردە بار. رەسەي قورعانىس ءمينيسترى ولگەندەر سانىن العاش رەت ناۋرىز ايىندا ەكى ەسە ازايتىپ حابارلاعان. ۋكراينانىڭ ەسەبىنشە، رەسەي اسكەرىنىڭ شىعىنى 30 مىڭعا جۋىقتاعان. ۋكراينا ءوز شىعىنى جايلى حابارلاعان جوق. ەكى تاراپ تا ءوز شىعىن ازايتىپ، قارسىلاس شىعىنىن ۇلعايتىپ كورسەتۋگە تىرىسادى. بۇل مالىمەتتەردى سوعىس جاعدايىندا تەكسەرۋ مۇمكىن ەمەس.
سوۆەت اسكەرى اۋعانستانداعى نەگىزىنەن اۋعان كوتەرىلىسشىلەرىنىڭ شاشىراڭقى توپتارىمەن سوعىسقان بولاتىن. بۇل جولى رەسەي اسكەرىنە ۋكراينانىڭ 261 مىڭدىق اسكەرى، 100 مىڭعا جۋىق جەرگىلىكتى قورعانىس بولىمدەرى جانە وزگە دە كۇش قۇرىلىمدارىنىڭ بولىمشەلەرى قارسى تۇر.
