توتەنشە جاعداي مينيسترلىگى 18 اقپان كەشكە نۇر-سۇلتانداعى قۇرىلىس الاڭدارىنىڭ بىرىندە بولعان قايعىلى وقيعاعا بايلانىستى كوميسسيا قۇرىلعانىن حابارلادى. پوليسيا "قۇرىلىس جۇمىستارىن جۇرگiزۋ كەزiندە قاۋiپسiزدiك قاعيدالارىن بۇزۋ" بابى بويىنشا قىلمىستىق ءىس قوزعاعان.
جۇما كۇنى كەشكى ساعات بەستەر شاماسىندا استانادا قۇرىلىس الاڭدارىنىڭ بىرىندە مۇنارالى كران قۇلاپ، مۇنارا ۇستىندە بولعان كرانشى وپات بولعان. وقيعا ورنىنا 30 شاقتى قۇرىلىسشى جينالىپ، قايعىلى جايتتى جان-جاقتى تەرگەۋدى تالاپ ەتكەن.
توتەنشە جاعداي مينيسترلىگى 19 اقپاندا تاراتقان حابارلاماسىندا تۇران داڭعىلى بويىندا سالىنىپ جاتقان نىسان اۋماعىندا "2013 جىلى شىعارىلعان QTZ 100 مۇنارا كرانىنىڭ سەكسياسى سىندى" دەپ جازعان.
"بۇل كراننىڭ قۇلاۋىنا اكەپ سوقتى. ناتيجەسىندە 1970 جىلى تۋعان كرانشى العان جاراقاتتارىنان قايتىس بولدى. توتەنشە جاعداي مينيسترلىگى ونەركاسىپتىك قاۋىپسىزدىك كوميتەتى دەپارتامەنتى ينسپەكتورلارى كۋاگەرلەر اراسىندا ساۋالناما جۇرگىزدى، باقىلاۋ كامەرالارىنان بەينەجازبالار الىندى جانە اۆاريانى تەكسەرۋ جونىندەگى كوميسسيا قۇرىلدى" دەلىنگەن حابارلامادا.
كوميسسيا قۇرامىنا مينيسترلىك پەن اكىمدىك وكىلدەرى جانە وزگە دە "مۇددەلى تۇلعالار" ەنگەن.
ۆەدومستۆو تەرگەپ-تەكسەرۋ جۇمىستارى اياقتالعاننان كەيىن كراننىڭ قۇلاۋ سەبەپتەرى مەن ءمان-جايلارى انىقتالادى دەپ ول بويىنشا دا اقپارات بەرۋگە ۋادە بەردى. ال استانا پوليسياسى وقيعاعا بايلانىستى "قۇرىلىس جۇمىستارىن جۇرگiزۋ كەزiندە قاۋiپسiزدiك قاعيدالارىن بۇزۋ" بابى (277-باپ) بويىنشا قىلمىستىق ءىس قوزعاعانىن حابارلادى. ساراپتاما تاعايىندالعان.
جۇما كۇنى تۇندە وقيعا ورنىنا جيىلعان جۇمىسشىلار تەحنيكالاردىڭ ەسكىلىگىن العا تارتىپ، ماسەلەنى بۇعان دەيىن باسشىلىققا تالاي جەتكىزگەنمەن جاعداي وزگەرمەگەنىن ايتقان.
قۇرىلىس دۋالىنداعى نىساننىڭ پاسپورتىنا سەنسەك، قۇرىلىسقا تاپسىرىس بەرۋشى – KING DEVELOPMENT جاۋاپكەرشىلىگى شەكتەۋلى سەرىكتەستىگى، باس مەردىگەر – WINBUILD ج ش س. ازاتتىق ءتىلشىسى حابار تاراتقان كەزدە وقيعا ورنىندا قۇرىلىس كومپانياسىنىڭ وكىلى بولعان جوق.
نارازىلارعا توتەنشە جاعداي مينيسترلىگى ونەركاسىپتىك قاۋىپسىزدىك كوميتەتى دەپارتامەنتى ماماندارى كەلىپ، وقيعانى مۇقيات تەكسەرەتىنىن ايتقان.
قازاقستاندا جۇمىسشىلار قۇرىلىس الاڭىندا قاۋىپسىزدىك ەرەجەلەرى ساقتالمايتىنىن ايتىپ، ءجيى شاعىمدانادى. ونداعى قايعىلى وقيعالار تۋرالى اقپاراتتار ءجيى شىعادى. 23 قاڭتاردا الماتىداعى قۇرىلىس الاڭىندا مۇنارالى كران قۇلاپ، كرانشى جىگىت مەرت بولعان. پوليسيا "قۇرىلىس جۇمىستارىن جۇرگiزۋ كەزiندە قاۋiپسiزدiك قاعيدالارىن بۇزۋ" بابى بويىنشا سوتقا دەيىنگى تەرگەپ-تەكسەرۋ باستالعانىن حابارلاعان.
استاناداعى كرانشىلار وسىعان دەيىن قاۋىپسىزدىك تالاپتارىنىڭ ساقتالمايتىنىن ايتىپ بىرنەشە رەت نارازىلىققا شىققان. ولار جۇمىس اۋىر، جالاقى از، ال قاۋىپسىزدىك تالاپتارى ءجيى بۇزىلادى دەگەن.
