تاۋەلسىزدىكتىڭ 33 جىلى بيىل. ال شىعىس قازاقستان وبلىسىنىڭ ريددەر قالاسىنداعى 16 مەكتەپتىڭ بىرەۋى – جالعىز قازاق مەكتەبى، ەسكى «شاڭىراق» مەكتەبىنىڭ قۇرىلىسى ءالى باستالماپتى. بۇل تۋرالى Alash.kz سايتى Azattyq Ruhyنا سىلتەپ حابارلايدى.
ءبىلىم ورداسىنىڭ وقۋشىلارى 2023-2024 وقۋ جىلىنىڭ 1 قىركۇيەگىنەن باستاپ «№11 جالپى ورتا ءبىلىم بەرەتىن مەكتەپتىڭ» عيماراتىندا وقىعان. «شاڭىراق» كوپسالالى مەكتەپ-گيمنازياسىندا 0-دەن 11- سىنىپقا دەيىن وقيتىن 488 وقۋشى بار. ولاردىڭ ءبارى ءبىر اۋىسىمدا وقيدى.
«قازىرگى ۋاقىتتا قۇرىلىس ءۇشىن جەر ۋچاسكەسى رەسىمدەلىپ، جوبالىق-سمەتالىق قۇجاتتاما ازىرلەنىپ جاتىر. وسى راسىمدەر اياقتالعاننان كەيىن قۇرىلىس - مونتاجداۋ جۇمىستارىنىڭ مەردىگەرى ايقىندالادى»، - دەپ جاۋاپ بەردى ريددەر قالاسىنىڭ ءبىلىم بولىمىنەن.
قۇرىلىس جۇمىستارى 2024 جىلدىڭ 4 توقسانىندا باستالماق. تاپسىرىس بەرۋشى – «قازمىرىش» ج ش س.
ەسكە سالساق، 2023 جىلى مەكتەپ وقۋشىلارىنىڭ اتا-انالارى ءبىلىم وشاعىنىڭ اپاتتى جاعدايدا تۇرعانىن ايتىپ، داۋ كوتەرگەن. سودان كەيىن قالا اكىمدىگى «شاڭىراق» مەكتەبىنە جوندەۋ جۇمىستارىنىڭ قاجەتتىگىنە بايلانىستى وقۋشىلاردىڭ باسقا عيماراتقا ۋاقىتشا كوشىرىلگەنىن حابارلاعان.
بۇعان دەيىن جازعانىمىزداي، شىعىس قازاقستان وبلىسىنىڭ ءىرى قالالارىنىڭ ءبىرى وسكەمەندە 12 قازاق، 16 ورىس مەكتەبى بولسا، ريددەر قالاسىندا 12 ورىس 1 عانا قازاق مەكتەبى بار.
