ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

قىرعىزستاندا "توبىرلىق تانىمعا ۇرىندىراتىن" TikTok تۇساۋلانادى، رەسەي دە بۇعاتتاۋعا باس قاتىرىپ جاتىر

17 ءساۋىر 2024 338

قىرعىزستان تاراپى TikTok الەۋمەتتىك جەلىسىنە كىرۋدى شەكتەۋگە دايىن ەكەندىن حابارلادى، ال رەسەيدە TikTok پلاتفورماسىن بۇعاتتاۋ ماسەلەسى قاراستىرىلىپ جاتىر، دەپ حابارلايدى Alash.KZ ۇلتتىق پورتالى. 

قىرعىزستانداعى TikTok سەگمەنتىنە قاتىستى سىن ايتىلدى. بۇعان دەيىن دە الاتاۋدىڭ ارعى جاعىنداعى اعايىن TikTok-تا بالالاردىڭ اقپارات كەڭىستىگىنە ءتان مازمۇندى ءونىم مەن ساۋاتتى ۇستانىم جوق ەكەنىن مالىمدەگەن. 

شەنەۋنىكتەر "بالالاردىڭ دەنساۋلىعىنا، ولاردىڭ فيزيكالىق، رۋحاني، ادامگەرشىلىك دامۋىنا زيان كەلتىرۋدىڭ الدىن الۋ شارالارى تۋرالى" زاڭعا سىلتەمە جاساي وتىرىپ ەلدەگى الەۋمەتتىك جەلىنىڭ جۇمىسىن شەكتەۋگە قاتىستى شەشىم قابىلدادى.

بايلانىس وپەراتورلارىنا 18 ساۋىرگە دەيىن شارالار قابىلداۋ قاجەتتىگى تۋرالى حات جولداندى.

رەسەيدە دە TikTok جەلىسى بۇعاتتالۋى مۇمكىن. مۇنداي باستامامەن الەۋمەتتىك جەلىلەر مەن مەسسەندجەرلەردىڭ كاسىبي پايدالانۋشىلار قاۋىمداستىعىنىڭ وكىلدەرى روسكومنادزورعا جۇگىنگەن. 

رەسەيلىك ساراپشىلاردىڭ ايتۋىنشا، Tik Tok-تى بۇعاتتاۋ وتاندىق الەۋمەتتىك جەلىلەر جۇمىسىن جانداندىرادى، ناتيجەسىندە اۋديتوريا 30 ميلليون ادامعا ارتادى.

ءقازىر روسكومنادزوردىڭ ءوتىنىشتى قابىلداعانى جانە ونى 8 مامىرعا دەيىن تالقىعا سالاتىنى ايتىلدى.

ەستەرىڭىزگە سالا كەتەيىك، قازاقستاندىق دەپۋتاتتار TikTok الەۋمەتتىك جەلىسىنىڭ جۇمىسىن شەكتەۋ تۋرالى بىرنەشە رەت ايتقان بولاتىن. اتاپ ايتقاندا، سەناتور الىشەر ساتۆالدييەۆ كامەلەتكە تولماعان پايدالانۋشىلارعا شەكتەۋلەر قويۋدى ۇسىندى. ونىڭ پىكىرىنشە، 18 جاسقا دەيىنگى بالالار بۇل پلاتفورمادا كۇنىنە ءبىر ساعاتتان ارتىق ۋاقىت وتكىزە المايدى.

ءساۋىر ايىندا قازاق ءتىلىن كۇستانالاعان الماتىلىق 21 جاستاعى تيكتوكەر ەكى جىلعا سوتتالدى.

 

بۇل ماقالا تۋرالى نە ويلايسىز؟