قازاقستاننىڭ حالىق پارتياسى (2020 جىلى پارتيا "كوممۋنيستىك" دەگەن اتاۋدى الىپ تاستاعان) كۇزدە وتەتىن كەزەكتەن تىس پرەزيدەنت سايلاۋىندا ۇمىتكەر ۇسىنبايتىنىن مالىمدەدى.
"ءبىز وسىعان دەيىن مالىمدەگەندەي، كەزەكتەن تىس پرەزيدەنت سايلاۋىندا مەملەكەت باسشىسى قاسىمجومارت توقايەۆتىڭ كانديداتۋراسىن قولدايمىز. سونىمەن بىرگە 1 قىركۇيەكتە پرەزيدەنت جولداۋىندا ايتىلعان وزگەرىستەردى دە تولىق قولدايمىز" دەپ جازىلعان پارتيانىڭ تاراتقان مالىمدەمەسىندە.
قازاقستاننىڭ حالىق پارتياسى 2023 جىلعا بەلگىلەنىپ جاتقان پارلامەنت سايلاۋىنا قاتىساتىنىن دا جەتكىزگەن.
قازاقستان پرەزيدەنتى قاسىم-جومارت توقايەۆ بيىل كۇزگە كەزەكتەن تىس پرەزيدەنت سايلاۋىن بەلگىلەدى. بۇل تۋرالى ول 1 قىركۇيەكتەگى جولداۋىندا مالىمدەدى.
"ادىلەتتى قازاقستان جولىنداعى تۇپكى ءارى كەشەندى رەفورمالاردى ءساتتى جۇزەگە اسىرۋ ءۇشىن حالىقتىڭ جاڭا سەنىم مانداتى كەرەك" دەدى توقايەۆ."مەن ءۇشىن مەملەكەتتىڭ مۇددەسى بارىنەن بيىك. سول سەبەپتى مەن ءوز قۇزىرەتىمنىڭ مەرزىمىن قىسقارتىپ، كەزەكتەن تىس سايلاۋعا تۇسۋگە دايىنمىن" دەپ قوستى ول.
توقايەۆ سونداي-اق سايلاۋدان كەيىن پارلامەنتكە پرەزيدەنتتىكتى ءبىر مەرزىممەن شەكتەۋدى ۇسىناتىنىن ايتتى.
قازىرگى زاڭ بويىنشا، ءبىر ادام بەس جىلدىق ەكى مەرزىمگە سايلانا الانادى.
توقايەۆتىڭ قازىرگى مەرزىمى 2024 جىلى اياقتالادى. مۇنىڭ الدىندا ول ەكى مەرزىمنەن ارتىق وتىرمايتىنىن ايتقان.
بيىل ماۋسىمدا قازاقستاندا كونستيتۋسياعا تۇزەتۋ ەنگىزۋ جونىندە رەفەرەندۋم وتكەن. بۇل تۇزەتۋلەر اتا زاڭنان نۇرسۇلتان نازاربايەۆقا بەرىلگەن ارتىقشىلىقتاردى الىپ تاستادى. رەفەرەندۋم قارساڭىندا توقايەۆ پرەزيدەنتتىك مەرزىمىن نولگە تەڭەستىرمەيتىنىن ايتقان.
توقايەۆ پرەزيدەنتتىككە 2019 جىلى نۇرسۇلتان نازاربايەۆ وتستاۆكاعا كەتكەن سوڭ كەلگەن. رەسمي ناتيجە بويىنشا، وعان سايلاۋشىلاردىڭ 70 پايىزى داۋىس بەرگەن. سايلاۋ بارىسىندا بيلىككە قارسى نارازىلىق كۇشەيدى. پوليسيا نارازىلاردى جاپپاي ۇستادى. وپپوزيسيا مەن تاۋەلسىز باقىلاۋشىلار سايلاۋ كەزىندە بۇرمالاۋ فاكتىلەرى كوپ بولدى دەپ مالىمدەدى.
