بەيسەنبىدەن جۇماعا قاراعان ءتۇنى اقىن، قازاقستاننىڭ ەڭبەك سىڭىرگەن قايراتكەرى ارمان قاني دۇنيەدەن وزدى. قايعىلى قازا تۋرالى ق ر جازۋشىلار وداعى پاۆلودار وبلىسى فيليالىنىڭ ديرەكتورى جارقىنبەك امانتاي جازدى.
بۇگىن بەيسەنبىدەن جۇماعا قاراعان ءتۇنى كۇرەسكەر اقىن، قازاقستاننىڭ ەڭبەك سىڭىرگەن قايراتكەرى، «الاش» ادەبي سىيلىعىنىڭ يەگەرى ارمان قاني اعامىز دۇنيەدەن ءوتتى دەگەن سۋىت حابار كەلىپ جەتتى.
ۇزاققا سوزىلعان اۋىر ناۋقاس قايسار رۋحتى اعامىزدى اقىرى جەڭگەن ەكەن…
اللانىڭ سىزعان تاعدىرىنا امال جوق!
التى الاشقا، قازاق ەلىنە قايعىرىپ كوڭىل ايتامىز! – دەپ جازدى جارقىنبەك امانتاي.
قازاقتىڭ كورنەكتى قالامگەرى ارمان قاني 1954 جىلى 22 اقپاندا پاۆلودار قالاسىندا تۋعان. اقىننىڭ «ار الدىندا» (پاۆلودار، «ەكو» – 2001 ج.)، «قىزىل تۇنەكتەگى اق بۇرقاق»، «تامشىلار» (پاۆلودار، «ەكو» – 2004 ج.) «شىندىقپەن بەتپە-بەت» (الماتى، «قازاقپارات» – 2006 ج.)، «جۇلدىزدى تۇمان» (پاۆلودار، «كەرەكۋ» – 2008)، «سەن جانە مەن» (استانا، «فوليانت» – 2012)، «ۇيلەسىم» (پاۆلودار، «Brand print» – 2014) جىر جيناقتارى جارىق كورگەن.
