قازاقستاندا اۆتوكولىك جانە اۋىل شارۋاشىلىعى تەحنيكاسىنا ۋتيليزاسيا الىمىنىڭ مولشەرى 50 پايىزعا ازايادى. بۇل جونىندە 23 اقپان كۇنى مەملەكەتىك "حابار 24" تەلەارناسىنا بەرگەن سۇحباتىندا پرەمەر-مينيستردىڭ ورىنباسارى رومان سكليار حابارلادى.
ونىڭ ايتۋىنشا، اۆتوكولىكتىڭ بارلىق ءتۇرى مەن اۋىل شارۋاشىلىعى تەحنيكاسىنا ۋتيليزاسيا الىمىن 50 پايىزعا ازايتۋ تۋرالى شەشىم قابىلدانعان.
ءقازىر ەلدە مۇنداي الىم مولشەرى كولىك كولەمىنە قاراي 437 مىڭ تەڭگەدەن باستالىپ، 5،9 ميلليون تەڭگەگە دەيىن بارادى.
بۇعان دەيىن وعان قارسى ازاماتتار دامىعان ەلدەردە ۋتيليزاسيا الىمى 100 مىڭ تەڭگەدەن اسپايتىنىن، ال كەي مەملەكەتتە كولىكتى ۋتيليزاسيادان وتكىزەتىن زاۋىتتار ءوزىن-وزى قامتاماسىز ەتەتىنىن ايتقان.
قاڭتار وقيعاسىنان كەيىن پرەزيدەنت قاسىم-جومارت توقايەۆ ۋتيليزاسيا الىمىن جيناۋمەن جەكە كومپانيا ەمەس، مەملەكەتتىك ورگان اينالىسۋى كەرەك دەپ مالىمدەپ، ەكس-پرەزيدەنتتىڭ كىشى قىزى ءاليا نازاربايەۆامەن بايلانىستى "وپەراتور روپ" كومپانياسىن جابۋدى تاپسىرعان. ارتىنشا ونىڭ فۋنكسياسى "جاسىل دامۋ" اكسيونەرلىك قوعامىنا جۇكتەلىپ، اقپان ايىنىڭ باسىندا ۋتيليزاسيا الىمىن قابىلداي باستاعان.
23 اقپان كۇنگى سۇحباتىندا رومان سكليار ۇكىمەت جاڭا وپەراتوردىڭ ەسەپشوتىنداعى 200 ملرد تەڭگە قاراجاتتىڭ 130 ملرد تەڭگەسىن كولىك نەسيەسىنىڭ شارتتارىن جەڭىلدەتۋ مەن اۆتوبۋستار ساتىپ الۋعا جۇمساۋ تۋرالى شەشىم قابىلداعانىن حابارلادى.
– "جاسىل دامۋدىڭ" ەسەپشوتىندا قالعان قاراجات حالىق يگىلىگىنە جۇمسالۋى ءتيىس. مۇنى قالاي جۇزەگە اسىرامىز؟ 100 ملرد تەڭگە وتاندىق كولىكتەردى جەڭىل شارتتارمەن نەسيەگە بەرۋگە جۇمسالادى. جىلدىق سىياقى مولشەرى – 4 پايىز، العاشقى جارناسى ءنول تەڭگەمەن جەتى جىلعا بەرىلەدى" دەدى سكليار.
ونىڭ ايتۋىنشا، ناقتى جاعدايدا 71 مىڭ ازامات اسا قىمبات ەمەس جاڭا كولىكتەردى ساتىپ الا الادى. ال 30 ملرد تەڭگە اۆتوبۋس پاركتەرىن جاڭالاۋعا جۇمسالادى.
ەلدە بىلتىردان بەرى ۋتيليزاسيا الىمىن ازايتۋدى نەمەسە مۇلدە الىپ تاستاۋدى تالاپ ەتكەن جۇرگىزۋشىلەر نارازىلىعى كوبەيگەن شاقتا يندۋستريا جانە ينفراقۇرىلىمدىق دامۋ مينيسترلىگى قاڭتاردا ۋتيليزاسيا الىمىن جاڭا ءادىس بويىنشا ەسەپتەيتىنىن حابارلاعان.
