بۇگىن ق ر پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياسىندا مادەنيەت جانە اقپارات مينيسترلىگىنىڭ رەسمي وكىلى ەلۆيرا جۇرگەنبايەۆا مەن «Qazaq Culture» سايتىن ازىرلەۋشى مەرەي زەينەش «Qazaq Culture» بىرەگەي جوباسىن تانىستىردى.
سپيكەرلەر مادەنيەت جانە اقپارات مينيسترلىگىنىڭ اقپاراتتىق-تانىمدىق پلاتفورماسىن قۇرۋداعى باستى ماقساتى – ەلدىڭ مادەني مۇراسىن ناسيحاتتاۋ، ۇلتتىق برەندتى تانىتۋ ەكەنىن اتاپ ءوتتى. بۇل سايت قازاقستان مادەنيەتى مەن تاريحى تۋرالى تىڭ مالىمەت تاراتاتىن اقپارات كوزى بولاتىنىن ءسوز ەتتى.
سايتتىڭ قۇرىلۋى قازاقستاننىڭ مادەني مۇراسى مەن الۋان تۇرلىلىگىنە الەمدىك قوعامداستىقتىڭ نازارىن اۋدارۋداعى ماڭىزدى قادام بولىپ تابىلادى. قازاقستاندا، سونداي-اق جاقىن جانە الىس شەتەلدەردە مادەني قۇندىلىقتاردى ناسيحاتتاۋ مەملەكەت باسشىسىنىڭ ۆەدومستۆو الدىنا قويعان باسىم باعىتتارىنىڭ ءبىرى بولىپ قالا بەرەدى.
ەلىمىزدەگى مادەني مۇرانىڭ سان تۇرلىلىگىن كورسەتەتىن اۋقىمدى جوبا بۇۇ-نىڭ التى رەسمي تىلىندە جانە قازاق، تۇرىك تىلدەرىندە اقپارات تاراتادى.
اقپاراتتىق پورتالدا قازاقستاننىڭ بىرەگەي مۇراعات قورىنىڭ دەرەكتەرى ەرەكشە ورىن الادى. قازاقستاننىڭ قۇجاتتارى مەن مۇراعات ماتەريالدارىنىڭ باي تاريحي جيناعىنا قول جەتكىزۋدى قامتاماسىز ەتەتىن ءبولىم – زەرتتەۋشىلەرگە، تاريحشىلار جانە ەلدىڭ وتكەنىنە قىزىعاتىندار ءۇشىن باعا جەتپەس رەسۋرس.
سايتتىڭ نەگىزگى ءبولىمى – ەلدەگى، الەمدەگى بارلىق مادەني جاڭالىقتاردان حاباردار ەتەتىن جاڭالىقتار بلوگى. بۇل بولىمدە قىزىقتى فەستيۆالدار، جارمەڭكەلەر، كونكۋرستار، سونداي-اق تەاتر قويىلىمدارى مەن وتاندىق كينوكارتينالاردىڭ پرەمەرالارى، تانىمال جانە جاس جازۋشىلار كىتاپتارىنىڭ تۇساۋكەسەرلەرى، كوركەم كورمەلەر، مەرەيتويلىق مەرەكەلەر، ءتۇرلى كولەمدەگى وڭىرلىك جوبالار جاريالاناتىن بولادى.
سونداي-اق، پلاتفورمادا ەلىمىزدىڭ ونەرى مەن مادەنيەتىندەگى سوڭعى جاڭالىقتار قامتىلاتىن وتاندىق ءموبيلدى قوسىمشالار تۋرالى اقپارات بەرىلەدى.
«قازاقستان مادەنيەتى جاساندى ينتەللەكت پريزماسى ارقىلى» ءبولىمى ۆيرتۋالدى شىندىق ارقىلى بارلىق وڭىرلەر مەن ولاردىڭ كورىكتى جەرلەرىن زەرتتەۋگە مۇمكىندىك بەرەدى.
پورتالدا اقپاراتتىق تەحنولوگيالارعا ەرەكشە ءمان بەرىلگەن.
«Qazaq Culturە» كورەرمەندەرگە ۆيرتۋالدى 3D-تۋرلار ارقاسىندا قازاقستاننىڭ ءتۇرلى وڭىرلەرىنە ساپار شەگىپ، ولاردىڭ كورىكتى جەرلەرىن زەرتتەۋگە تاپتىرماس مۇمكىندىك بەرەدى. ال جاساندى ينتەللەكتتىڭ كومەگىمەن سايتقا كىرگەن ءار قوناق فوتوسۋرەتىن ەنگىزىپ، ءوزىن باتىر نەمەسە ۇلى دالا جاۋىنگەرى بەينەسىندە كورە الادى.
سايتتى دايىنداۋ بارىسىندا شەتەلدىك وزىق تاجىربيەلەر پايدالانىلدى. اتاپ ايتقاندا، تىركەلىپ، جازىلۋ ارقىلى تۋريستەر بەلگىلى ءبىر قالانىڭ نەمەسە جالپى ەلدىڭ كەز كەلگەن مۋزەيلەرىنە (تۇركيا تاجىريبەسى) بارا الاتىن ءبىرىڭعاي بيلەتتى ونلاين راسىمدەۋ قاراستىرىلعان.
سايتتىڭ باستى ەرەكشەلىگى – دەلدالدار قىزمەتى ءۇشىن ارتىق قارجى جۇماساماي، بارلىق مادەني نىساندارعا كىرەتىن ءبىرىڭعاي بيلەت جۇيەسى. بۇل قىزمەتتى قوسۋ ارقىلى «استانا حاب» ايتي اكسەلەراتورىنىڭ ستارتاپىن قولداۋ كوزدەلگەن. پورتال قولدانۋشىلارىنا ىڭعايلى بولۋ ءۇشىن بەلگىلى ءبىر مادەني ءىس-شارانىڭ بيلەتىن ساتىپ الۋعا سىلتەمە بەرىلەدى.
«Qazaq Culture» - قازاقستاننىڭ مول مادەني مۇراسى مەن تەرەڭ تاريحىنا قىزىعۋشىلىق تانىتاتىندار ءۇشىن امبەباپ قۇرال.
ق ر مادەنيەت جانە اقپارات مينيسترلىگىنىڭ باسپا ءسوز قىزمەتى
