ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

قازاقستاندا 2030 جىلعا دەيىنگى ءقاۋىپسىز ەڭبەك تۇجىرىمداماسى قابىلداندى

27 جەلتوقسان 2023 45
ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا قازاقستان رەسپۋبليكاسىنداعى 2030 جىلعا دەيىنگى ءقاۋىپسىز ەڭبەك تۇجىرىمداماسى قارالدى.

ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا اتاپ وتكەندەي، تۇجىرىمداما مەملەكەت باسشىسىنىڭ «ءادىل قازاقستاننىڭ ەكونوميكالىق باعدارى» اتتى حالىققا جولداۋىندا كورسەتىلگەن تاپسىرماسىن ورىنداۋ ءۇشىن ازىرلەنگەن.

ول 4 نەگىزگى باعىتتى قاراستىرادى. ولار – تاۋەكەلگە باعدارلانعان ءتاسىل نەگىزىندە ەڭبەكتى قورعاۋدىڭ ۇلتتىق جۇيەسىن جاڭعىرتۋ، جۇمىس ورىندارىندا تاۋەكەلدى تومەندەتۋ جونىندەگى شارالاردى ەكونوميكالىق ىنتالاندىرۋ، كاسىبي قۇزىرەتتەر مەن عىلىمي الەۋەتتى دامىتۋ، سونداي-اق ەڭبەكتى قورعاۋ سالاسىنداعى باقىلاۋ مەن مونيتورينگتىڭ تيىمدىلىگىن ارتتىرۋ.

ءقاۋىپسىز ەڭبەكتىڭ نەگىزگى ينديكاتورلارى – وندىرىستىك جاراقات پەن كاسىپتىك اۋرۋلار كورسەتكىشتەرى. ولار، ءوز كەزەگىندە، زياندى جاعدايلاردا جۇمىس ىستەۋدىڭ سالدارى. وسىنى ەسكەرە وتىرىپ، تۇجىرىمداما اياسىندا ءتيىستى شارالار كەشەنى ىسكە اسىرىلاتىن بولادى.

پرەمەر-مينيستردىڭ ايتۋىنشا، قازاقستاندا 500 مىڭعا جۋىق ادام زياندى ەڭبەك جاعدايلارىندا جۇمىس ىستەيدى. ەىدۇ ەلدەرىندە بۇل كورسەتكىش وندىرىستىك پروسەستەردى اۆتوماتتاندىرۋ جانە قاۋىپسىزدىك تەحنيكاسى دەڭگەيىن ارتتىرۋ ەسەبىنەن جىل سايىن ازايىپ كەلەدى.
«ال بىزدە وندىرىستىك جاراقات الۋ كورسەتكىشى ءبىرشاما جوعارى ەكەنىن اتاپ وتۋگە تۋرا كەلەدى. ەلىمىزدە جىل سايىن 2 مىڭعا جۋىق ادام جۇمىس بارىسىندا جاراقات الادى. ونىڭ ىشىندە 200-دەن استام ادام مەرت بولادى»، — دەدى ءاليحان سمايىلوۆ.

ۇكىمەت باسشىسىنىڭ سوزىنشە، وندىرىستە ءقازىر قولدانىلىپ جۇرگەن جازاتايىم وقيعالاردان ساقتاندىرۋ جۇيەسى جۇمىس بەرۋشىلەردى ەڭبەك جاعدايلارىن جاقسارتۋعا ىنتالاندىرمايدى. بۇگىندە كاسىپورىنداردىڭ تەك 32%-ى عانا ءوز قىزمەتكەرلەرىن ساقتاندىرىپ وتىر.
«كوپتەگەن ەلدە ءومىردى ساقتاندىرۋ كومپانيالارى ساقتاندىرۋ سىيلىقاقىسىنىڭ بەلگىلى ءبىر بولىگىن پريەۆەنتيۆتى ءىس-شارالارعا باعىتتايدى. ياعني، ولاردا قىزمەتكەرلەردى ەڭبەك قاۋىپسىزدىگىنە وقىتۋعا،  ۇجىمدىق جانە جەكە قورعاۋ قۇرالدارىن ساتىپ الۋعا باسىمدىق بەرىلەدى. ءبىز دە وسىنداي جۇيەگە كوشۋىمىز كەرەك»، — دەدى ۇكىمەت باسشىسى.

ءاليحان سمايىلوۆتىڭ ايتۋىنشا، وسى سالادا قالىپتاسقان پروبلەمالاردى كەزەك كۇتتىرمەي شەشۋ ءۇشىن قازاقستاندا العاش رەت 2030 جىلعا دەيىنگى ءقاۋىپسىز ەڭبەك تۇجىرىمداماسى ازىرلەندى.
«بۇل قۇجات ەڭ الدىمەن، كاسىپتىك قاۋىپ-قاتەرلەر مەن وندىرىستىك جاراقاتتانۋ دەڭگەيىن جانە كاسىپتىك اۋرۋ تۇرلەرىن تومەندەتۋگە باعىتتالعان. بارلىق تاۋەكەل الدىن الا ەسكەرىلەتىن بولادى. وندىرىستەگى قاۋىپسىزدىك سالاسىن سيفرلاندىرۋ وسى ماسەلەلەردى شەشۋگە ىقپال ەتۋى ءتيىس»، — دەدى پرەمەر-مينيستر.

ونىڭ ايتۋىنشا، تۇجىرىمداما ەڭبەكتى قورعاۋ سالاسىنداعى باقىلاۋ مەن مونيتورينگتىڭ تيىمدىلىگىن ارتتىرۋى كەرەك.

ۇسىنىلعان قۇجات بويىنشا داۋىس بەرۋ راسىمىنەن كەيىن ۇكىمەت باسشىسى تۇجىرىمدامانىڭ ءىس-شارالارىنىڭ بارلىعىن ورىنداۋ بويىنشا جۇمىستى جۇيەلى تۇردە ۇيىمداستىرۋدى تاپسىردى.

وعان قوسا ءقاۋىپتى ونەركاسىپتىك وبەكتىلەردەگى اۆاريالار سانىن تومەندەتۋدى باقىلاۋدا ۇستاۋ، كاسىپتىك اۋرۋلار ينستيتۋتىن قۇرۋ ماسەلەسىن تەزدەتۋ، سونداي-اق ەمدەۋ مەن پروفيلاكتيكانىڭ ساپاسىن ارتتىرۋ قاجەت.

سونىمەن قاتار پرەمەر-مينيستر وڭىرلەردە ەڭبەكتى قورعاۋ تالاپتارىنىڭ ساقتالۋى بويىنشا پريەۆەنتيۆتى مەملەكەتتىك باقىلاۋدى قامتاماسىز ەتۋ جانە وسى باعىتتاعى اۋقىمدى ءاقپاراتتىق-تۇسىندىرۋ جۇمىسىن كۇشەيتۋ كەرەكتىگىن ايتتى.
بۇل ماقالا تۋرالى نە ويلايسىز؟