ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"قازاقستان بايلىعى 162 ادامنىڭ قولىندا" - توقايەۆ

21 قاڭتار 2022 103

پرەزيدەنت قاسىم-جومارت توقايەۆ حالىقتىڭ جارتىسىنىڭ تابىسى 50 مىڭ تەڭگەدەن اسپايتىنىن، جاعدايدى شۇعىل وزگەرتۋ كەرەك ەكەنىن مالىمدەدى، Alash.press اگەنتتىگى. 





توقايەۆ ۇلتتىق تابىس بويىنشا 2020 جىلى بيزنەس ەڭ جوعارى ۇلەسكە يە ەكەنىن ايتتى.





"ءبىراق ءبىز كۇتكەن ناتيجە تولىققاندى شىققان جوق. ءقازىر قولىمىزدا نە بار؟ 2020 جىلى ۇلتتىق تابىستىڭ باسىم بولىگى - 61،5% بيزنەسكە تيەسىلى. سالىقتىڭ كولەمى بار بولعانى 7،3%، ال قازاقستاندىقتاردىڭ جالاقىسىنا 31% جۇمسالادى. بۇل – وتە تومەن كورسەتكىش. مىسالى، رەسەيدە وسىنداي ەكونوميكا بولعانىنا قاراماستان، جالاقى 46،7 پايىز بولادى، ياعني بىزدەن 1،5 ەسە كوپ. ۇلتتىق تابىستى ءبولۋدىڭ ايقىن تەڭگەرىمسىزدىگى بايقالادى ءارى ادىلدىك جاعىنان ماسەلە بار”، – دەدى توقايەۆ. 









پرەزيدەنتتىڭ ايتۋىنشا، ەلىمىزدە بەلگىلى ءبىر ەليتالىق توپتار عانا ەكونوميكالىق ءوسىمنىڭ پايداسىن كورىپ وتىر. 





"ءبىزدىڭ ەلىمىزدە بەلگىلى ءبىر ەليتالىق توپتار عانا ەكونوميكالىق ءوسىمنىڭ پايداسىن كورىپ وتىر. ال حالىقتىڭ باسىم بولىگىنىڭ تابىسى تومەندەپ كەلەدى نەمەسە ەش وزگەرىسسىز قالدى. بۇل مەملەكەتىمىزدىڭ قاۋىپسىزدىگىنە تونگەن ۇلكەن قاتەر. بۇنىڭ ءبارى قوعامنىڭ ەكونوميكالىق-الەۋمەتتىك، ارتىنان ساياسي جاعىنان قاق بولىنۋىنە اكەلىپ سوقتىرۋى مۇمكىن. وسىنداي داعدارىستىڭ العاشقى بەلگىلەرى كورىنە باستادى.





حالىقارالىق ساراپشىلار، اتاپ ايتقاندا، KPMG قازاقستان بايلىعىنىڭ تەڭ جارتىسىنا بار-جوعى 162 ادام يەلىك ەتەدى دەپ مالىمدەدى. سونىمەن قاتار حالىقتىڭ جارتىسىنىڭ ايلىق تابىسى 50 مىڭ تەڭگەدەن اسپايدى نەمەسە جىلىنا 1300 دوللاردان ءسال عانا اسادى. مۇنداي اقشاعا ءومىر ءسۇرۋ مۇمكىن ەمەس. تەز ارادا جاعدايدى وزگەرتۋ كەرەك جانە كوپ نارسە سىزدەرگە بايلانىستى، قۇرمەتتى كاسىپكەرلەر"، – دەپ مالىمدەدى ول.





مەملەكەت باسشىسىنىڭ ايتۋىنشا، تاۋەلسىزدىك العالى بەرى بيزنەس ءۇشىن بارىنشا قولايلى جاعدايلار جاسالدى. مەملەكەت كاسىپكەرلىك ورتانى دامىتۋعا كۇش سالدى. سالىقتىق جەڭىلدىكتەر مەن قارجىلاي كومەك تە كورسەتىلدى. وسىلايشا، ەكونوميكالىق مودەل بويىنشا بيزنەس دامىسا، جۇمىس ورىندارى اشىلادى، ادامداردىڭ تابىسى ارتادى دەگەن سەنىم بولعان.


بۇل ماقالا تۋرالى نە ويلايسىز؟