ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"ءقاۋىپ ءالى سەيىلگەن جوق". شقو-دا 7 ەلدىمەكەندە تاسقىن ءقاۋپى بار

05 ءساۋىر 2024 212

قازاقستاننىڭ ۇكىمەت باسشىسى ولجاس بەكتەنوۆ شىعىس قازاقستانداعى سۋ تاسقىنى جاعدايىن تەكسەرىپ، توتەنشە جاعدايلاردىڭ الدىن الۋ شارالارىن كۇشەيتۋدى تاپسىردى. بۇل تۋرالى اقپارات پرەمەر-مينيستردىڭ تەلەگرام-ارناسىندا جازىلدى. 

ۇكىمەت باسشىسى وبلىستىڭ گلۋبوكوە جانە التاي اۋداندارىنىڭ تاۋلى ايماقتارىن تىكۇشاقپەن ارالاپ، وزەن القاپتارىنداعى سۋ تاسقىنى ءقاۋپى بار ۋچاسكەلەردەگى جاعدايمەن تانىستى، سونداي-اق ءوڭىر اكىمىنىڭ سۋ تاسقىنىنا قارسى ءىس-شارالار تۋرالى بايانداماسىن تىڭدادى.

– شىعىس قازاقستان وبلىسى اۋماعىنىڭ باسىم بولىگىندە جاعداي تۇراقتى. سونداي-اق قىستىڭ سوڭىندا قار قالىڭ جاۋعان مارقاكول، كاتونقاراعاي، گلۋبوكوە، ۇلكەن نارىن جانە التاي اۋداندارى – تاۋەكەل ايماعىندا. وزەندەردەگى سۋ دەڭگەيى ازىرگە ءقاۋىپتى مەجەگە جەتكەن جوق – مۇزدىڭ ەرۋى ەندى باستالدى، ال تاۋلى ايماقتارداعى سۋ قويمالارىندا مۇز قاباتىنىڭ جۇقارۋى بايقالادى. الايدا بولجام بويىنشا، وبلىستا داۋىلدى ەسكەرتۋ جاريالانعان، +19°C دەيىن كۇننىڭ كۇرت جىلىنۋى كۇتىلۋدە – ءساۋىر ايىنىڭ ورتاسىنا قاراي ايماقتا سۋ تاسقىنى ءقاۋپى جوعارىلايدى، – دەپ حابارلايدى ۇكىمەتتەن.

ولجاس بەكتەنوۆكە سۋ تاسقىنىنىڭ الدىن الۋ بويىنشا قابىلدانىپ جاتقان شارالار تۋرالى باياندالدى. 

– ءقازىر ەلىمىزدىڭ وڭىرلەرىندە، سونىڭ ىشىندە شىعىس قازاقستان وبلىسىندا قالىپتاسقان جاعداي بىزدەن ءۇزدىسىز باقىلاۋدى تالاپ ەتەدى. وبلىس اۋماعىنىڭ 70%-ىن قالىڭ قار باسىپ جاتىر، ال قار جامىلعىسىنداعى سۋ قورى نورمادان 2 ەسە ارتىق. بۇل ءقاۋىپتىڭ ءالى سەيىلمەگەنىن كورسەتەدى. مەملەكەت باسشىسى اتاپ وتكەندەي، سۋ تاسقىنى كەزەڭىندە جاعدايدىڭ دامۋ سەنارييلەرىن قالىپتاستىرۋ قاجەت. ءقازىر قولداعى بولجامداردى ەسكەرە وتىرىپ، سۋ تاسقىنىنىڭ الدىن الۋ شارالارىن كۇشەيتۋىمىز كەرەك. ۇكىمەت تاراپىنان ءتيىستى جۇمىستاردى جۇرگىزۋگە بارلىق قاجەتتى كومەك كورسەتىلەتىن بولادى، — دەپ اتاپ ءوتتى ولجاس بەكتەنوۆ.

وڭىردە جوعارى دايىندىق رەجيمى، تج جويۋ جونىندەگى وبلىستىق جەدەل شتاب جۇمىس ىستەيدى. 

جاعداي ۋشىعىپ كەتسە، 1 118 ادامنان تۇراتىن كۇشتىك قۇرىلىمدار، 315 بىرلىك تەحنيكا جاساقتالىپ، 6 مىڭ توننادان استام ينەرتتى ماتەريالدار، 468 توننا ججم، 43 مىڭ بىرلىك قاپشىق دايىندالدى.

پرەمەر-مينيستر وسكەمەن جانە بۇقتىرما گەس-ىن دە قاراپ شىققان. بارلىق گيدروتەحنيكالىق قۇرىلىستار شتاتتىق رەجيمدە جۇمىس ىستەپ جاتىر. بوگەتتەردە سۋ دەڭگەيى الدىن-الا تومەندەتىلەدى.  وڭىردە قازاقستانداعى ەڭ ءىرى بۇقتىرما سۋ قويماسى ورنالاسقان. قازىرگى ۋاقىتتا ول تاعى 20 تەكشە كم كولەمىندە وزەن سۋىن قابىلداۋعا مۇمكىندىك بەرەدى. بولجالدى مالىمەتتەر بويىنشا، الداعى 3 ايدا 15 تەكشە كم-گە دەيىن سۋ كەلەدى دەپ كۇتىلۋدە.

جۇمىس ساپارىنىڭ قورىتىندىسى بويىنشا ۇكىمەت باسشىسى ولجاس بەكتەنوۆ وڭىردەگى جاعدايدىڭ ۋشىعۋىنا جول بەرمەۋ ءۇشىن بارلىق قاجەتتى شارانى قابىلداۋدى تاپسىرعان.

بۇل ماقالا تۋرالى نە ويلايسىز؟