مەن تەرەڭ دەپرەسسياعا ءتۇستىم. قازاقستان دەگەن - ۇلكەن جىندىحانا. مەن سونىڭ جالعىز پاسيەنتى سياقتىمىن.
ءاربىر قارالى اقپارات مەنى ەزىپ-جانىشتاپ جاتتى.
قارالى قاڭتار كەزىندە ءار ۇيدەن شىققان ولىك مەنىڭ ۇيىمنەن شىعىپ جاتقانداي، ءاربىر قارا جامىلعان وقيعا مەنىڭ شاڭىراعىمدا بولىپ جاتقان سياقتى سەزىم كەشتىم.
4-جاسار ولگەن قىز — مەنىڭ قىزىم سياقتى. 15 جاسار باسىنىڭ جارتىسىن وق جۇلىپ كەتكەن ءجاسوسپىرىم قىز — مەنىڭ ءسىڭىلىم سياقتى. ەسگۋماسياعا قارسى ەڭكىلدەپ بەيىت باسىندا جىلاعان قاريا — مەنىڭ اكەم سياقتى.
تاڭەرتەڭ تۇرىپ الەۋمەتتىك جەلىنى اشىپ وقىعاننان ءتۇن اۋا ونى ازەر جاباسىڭ. كۇنىنە بوتاداي بوزداپ بىرنەشە رەت جىلايسىڭ.
بۇكىل جۇيكە جۇيەڭ شيرىعىپ، اتىلاتىنداي دارەجەگە جەتتى. جۇرەگىم اۋىرىپ، ازەر دەمالاتىن بولدىم. ءالىم قۇرىپ، كۇش-قۋاتىم جوعالدى.
ەشنارسە قۋانتا المايدى. قايداعى قۋانۋ؟ ءبىر كۇندى جىلاماي وتكىزۋدىڭ ءوزى مۇڭ بولدى.
بارلىق ادامنىڭ ىشىندە «ەسكەندىردىڭ ءمۇيىزى بار!» دەگەن سىرتقا شىعا الماعان جان ايقايى جاتتى!
بۇل وقيعا بىزگە نەنى ءتۇسىندىردى؟
ءبىز – ەشكىم ەمەس ەكەنبىز! ءبىز – قازاقستان دەيتىن ەلدى مەكەندە ءتىرى ارۋاقپىز. ەلەسپىز. حالىق دەگەن ۇعىم جوق. قۇلدىڭ دا قاقىسى بار. ال قازاقتىڭ سول قۇل سەكىلدى دە قاقىسى جوق ەكەن.
ءسابيدى سنايپەر اتقان. ياعني ماقساتتى تۇردە ولتىرگەن. وعان تيگەن وق - ۇرىس دالاسىنداعى قاڭعىعان وق ەمەس. دالدەپ اتىلعان وق! ميعا سىيمايدى. ەلەستەتۋدىڭ ءوزى قورقىنىشتى!
ياعني بۇل سوعىس جازىعى جوق 4-جاسار پەرىشتەگە جاريالاندى. ول پەرىشتە – قازاقتىڭ بولاشاعى بولاتىن.
ءبىز سەندەردى بەسىكتەرىڭدە ولتىرەمىز دەگەنى.
بالا ەمىزىپ وتىرعان ايەلدى دە سنايپەر اتقان! ءبىر وق باسىن تەسىپ وتكەن. بۇل سوعىستىڭ، ياعني، جاپپاي ەسكەرتۋسىز اتۋدىڭ ارتىندا – الاڭعا شىققان ءاربىرىڭ وسى كەپتى كيەسىڭدەر! 4-جاسار ءسابيدى دە، بالا ەمىزگەن ايەلدى دە ايامايمىز!-دەگەنى.
قازاقستاننىڭ نيكاراگۋا مەن اۋعانىستاننان ايىرماشىلىعى جوق ەكەن.
مۋسور شىعارىپ، نە نانعا بارا جاتقان جەرىڭنەن سەنى اتا سالادى. سۇراۋىڭ جوق. سوت جوق. ەشكىم بۇل ولىمگە ءالى كۇنگە جاۋاپ بەرمەدى، جازالانبادى.
فەيسبۋكتە سۋرەتتەرى الدىمنان شىققان بارلىق بيلىك وكىلدەرىن جانە وعان لويالدى جۋرناليست ارىپتەستەردى، ءۇنسىز قالعان بارلىق اقىن-جازۋشىلاردى ءيتتىڭ ەتىنەن جەك كورىپ كەتتىم.
ىزا مەن كەككە تولى كەۋدەم ۇيگە سىيمادى. تۇرمەلەردە ادامدار ازاپتالىپ جاتقاندا ىشكەن تاماعىڭ ءىرىڭ، جەگەنىڭ جەلىم بولادى ەكەن.
استانا كوشەلەرىندەگى الاڭسىز كۇلىپ بارا جاتقان ادامدارعا قاراپ ىشتەي قان جىلايسىڭ.
ءبىر اي بويى باس كوتەرتپەگەن دەپرەسسيا ءوز ناتيجيەسىن بەردى.
قىزۋىم كوتەرىلىپ اۋىرىپ قالدىم.
ادامزاتقا قارسى، ونىڭ ىشىندە قازاققا قارسى ۇلكەن قىلمىس جاسالىپ جاتقاندا ءاربىر ءۇنسىز قالعان ادام - قىلمىسكەر.
30-جىل بويى وسى دارەجەگە جەتكىزگەن – ول ءسىزدىڭ ۇنسىزدىگىڭىز! ول ءسىزدىڭ «جانى ءتاتتى ەكىجۇزدىلىگىڭىز»!
30 جىل بويى قورقىنىش تۇرمەسىن جەڭە الماعانىمىز - بۇگىن ارقامىزعا ىستىق ۇتىك بوپ باسىلۋدا!
بۇگىن كوبى اۋىزبەن بولسا دا قارسىلىق بىلدىرۋدە! ءبىراق ءبارى ەمەس. بۇكىل قازاق ءبىر جۇدىرىق بولىپ جۇمىلعاندا عانا بۇل فاشيست رەجيم كۇيرەيدى.
كامەلەتكە تولماعان جاسوسپىرىمدەردىڭ ءتىسىن پلاسكوگۋبسىمەن تىرىدەي سۋىرىپ جاتقاندا قىزمەت ءۇشىن، جان ءۇشىن ءۇنسىز قالعان ءاربىرىڭدى جەك كورەتىنىمىدى مالىمدەيمىن!
مەنىڭ جەك كورۋ، جەك كورمەۋىم ەشقانداي پروبلەمانى شەشپەيدى عوي. ول تەك ءوزىمدى عانا كۇيرەتەتىنىن بىلەمىن.
ءبىراق ءبىر كۇنى مۋسور شىعارۋعا بارا جاتقاندا سول جىلميعان ۇنسىزدىگىڭ ماعدايىڭا وق بولىپ قادالماسىن. ول كەزدە توچنو ءۇنسىز ءتىل تارپاي كەتەسىڭ!
تاناكوز تولقىن قىزى، اقىن
