19 ساۋىردە شىمكەنت قالاسى پروكۋراتۋراسىنىڭ قاڭتار وقيعاسىنا بايلانىستى ءتورت ءىستى سوتقا وتكىزىپ، تىركەگەنى بەلگىلى بولدى. ءتورت ءىستىڭ ەكەۋى – ازاماتتىق بەلسەندى ەرعالي قۇلبايەۆ پەن مولداباي سادىبەكوۆكە قاتىستى. ەكەۋى دە "جاپپاي تارتىپسىزدىك" بابى بويىنشا ايىپتالعان. قالعان ەكى ءىس – "ۇرلىق" بابىمەن بايلانىستى.
قالالىق سوت ازاتتىققا قاڭتار وقيعاسىنا بايلانىستى اۋداندىق سوتتارعا جالپى ءتورت ءىس تىركەلگەنىن راستادى.
ءىسى سوتقا جەتكەندەردىڭ ىشىندە بەلسەندى ەرعالي قۇلبايەۆ پەن مولداباي سادىبەكوۆ تە بار. 36 جاستاعى قۇلبايەۆتىڭ تۋىستارى قىلمىستىق كودەكستىڭ "بۇزاقىلىق" جانە "عيماراتتارعا، قۇرىلىستارعا، قاتىناس جانە بايلانىس قۇرالدارىنا شابۋىل جاساۋ نەمەسە ولاردى باسىپ الۋ" بابىمەن ۇستالعان بەلسەندىنىڭ ءىسى قايتا سارالانىپ، سوتقا «جاپپاي تارتىپسىزدىك" بابىمەن وتكەنىن حابارلادى.
قۇلبايەۆتىڭ ايىپتاۋ اكتىسىندە بەلسەندىنىڭ "الدىن-الا ءسوز بايلاسۋ ارقىلى 4-6 قاڭتاردا شىمكەنت قالاسىندا بولعان جاپپاي تارتىپسىزدىككە قاتىسقانى جانە وعان جۇرتتى ۇندەگەنى" جازىلعان. بۇعان دەيىن بەلسەندى تاعىلعان ايىپپەن كەلىسپەگەن.
ال مولداباي ساندىبەكوۆتىڭ ايەلى ينديرا راحمەت قىزىنىڭ ايتۋىنشا، كۇيەۋىنە "جاپپاي تارتىپسىزدىك" بابىمەن قاتار "بيلىك وكىلىنە كۇش قولدانۋ" بابىمەن (380-باپ) دا ايىپ تاققان.
قۇقىق قورعاۋشىلاردىڭ مالىمەتىنشە، شىمكەنتتە قاڭتار وقيعاسىنا بايلانىستى ۇستالعاندار اراسىندا كەمىندە جەتى بەلسەندى بار. ولاردىڭ ەكەۋى ەشقايدا كەتپەۋ تۋرالى قولحاتپەن قاماۋدان بوساتىلعان. بەسەۋى تەرگەۋ يزولياتورىندا جاتىر. ولاردىڭ ءبىرى – ايەل.
بەلسەندىلەرگە العاشىندا ءتۇرلى ايىپ تاققانىمەن، كەيىن قايتا سارالانىپ، بارلىعى-دەرلىك "جاپپاي تارتىپسىزدىك" بابىمەن ايىپتالعان.
وسىلايشا قازاقستاندا قاڭتار وقيعاسىنا بايلانىستى "جاپپاي تارتىپسىزدىك"، "تەرروريزم" سياقتى اۋىر باپتار بويىنشا قوزعالعان ىستەردىڭ الدى سوتقا جەتىپ وتىر. قۇقىق قورعاۋشىلاردىڭ مالىمەتىنشە، ازاماتتىق بەلسەندىلەردىڭ كوبى وسى باپتارمەن كۇدىككە ىلىنگەن. بەلسەندىلەردىڭ جاقتاستارى بۇل ىستەردىڭ "ساياسي استارى" بولۋى مۇمكىن دەيدى. بۇعان دەيىن ەلدە قاڭتار وقيعاسىنا بايلانىستى "ۇرلاۋ"، "بۇزاقىلىق"، "توناۋ" جانە وزگە باپتار بويىنشا سوت ۇكىمدەرى شىققان.
باس پروكۋراتۋرا مالىمەتىنشە، قاڭتار وقيعاسىنان كەيىن قوزعالعان ىستەر بويىنشا 214 ادام سوتتالعان. ولاردىڭ 20-سى تۇرمە جازاسىنا كەسىلگەن. كوبىنە شەكتەۋ جازاسى بەرىلگەن.
قاڭتار وقيعاسى كەزىندە جانە ودان كەيىن مىڭداعان ازامات ۇستالىپ، جۇزدەگەن ادامعا "تەرروريزم"، "جاپپاي تارتىپسىزدىك ۇيىمداستىرۋ"، "زاڭسىز قارۋ-جاراق ساقتاۋ" سەكىلدى ايىپتار تاعىلدى. قاماۋدا بولعانداردىڭ اراسىندا ازاپتالعانىن ايتىپ شاعىمدانعاندار كوپ، ءبىراق ولاردى ازاپتاۋ فاكتىسى بويىنشا ۇستالعاندار نەكەن-ساياق.
شىمكەنتتە قاڭتار كوتەرىلىسىنە بايلانىستى 86 ادامعا قالمىستىق ءىس قوزعالىپ، ەكى ايعا قاماۋ تۋرالى سوت سانكسياسى شىققان. ءقازىر ولاردىڭ باسىم بولىگىنىڭ بۇلتارتپاس شاراسى جەڭىلدەتىلىپ، قاماۋدان بوساتىلعان. كەيىننەن قاماۋدا جاتقانداردىڭ قاماۋ مەرزىمى بىرنەشە رەت ۇزارتىلعان.
شىمكەنتتە رەسمي دەرەك بويىنشا قاڭتار وقيعاسى كەزىندە 20 ادام قايتىس بولدى، جۇزدەن اسا ادام جارالاندى.
