20 ساۋىردە ءماجىلىس الەۋمەتتىك جەلىلەردى "رەتتەۋگە باعىتتالعان" زاڭ جوباسىنا سەنات ەنگىزگەن وزگەرىستەرمەن كەلىسىپ، قۇجاتتى تالقىلاماي قابىلدادى. الەۋمەتتىك-مادەني دامۋ كوميتەتىنىڭ ءتورايىمى ءجاميلا نۇرمانبەتوۆا سەنات ۇسىنعان وزگەرىستەر مەن تولىقتىرۋلار زاڭ جوباسىنىڭ (رەسمي اتاۋى – "بالا قۇقىقتارىن قورعاۋ، ءبىلىم، اقپارات جانە اقپاراتتاندىرۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى") كونسەپسياسى مەن مازمۇنىن وزگەرتپەيتىنىن ايتىپ، جوبانى ماقۇلداۋدى ۇسىندى.
– سەناتتىڭ تۇزەتۋلەرى بالاعا زيان كەلتىرەتىن، تىيىم سالىنعان نەمەسە وزگە دە تۇردە تاراتىلۋى شەكتەلگەن اقپاراتتى ورنالاستىرۋعا جول بەرگەن ينتەرنەت-رەسۋرستارمەن مەملەكەتتىك ورگانداردىڭ ءوزارا ءىس-قيمىل جاساۋ تەتىگىن وزگەرتۋگە باعىتتالعان. سەنات دەپۋتاتتارى بۇقارالىق اقپارات قۇرالدارى سالاسىنداعى ۋاكىلەتتى ورگانعا بالاعا قاتىستى كيبەربۋللينگ فاكتىلەرى بويىنشا ساراپتاما جۇرگىزۋ ءتارتىبىن ايقىنداۋ جونىندە قۇزىرەت بەرۋدى، سونىمەن قاتار ينتەرنەت-رەسۋرستارعا قول جەتكىزۋدى توقتاتا تۇرۋعا نەگىز رەتىندە كيبەربۋللينگ فاكتىلەرىن زاڭنامالىق تۇردە ايقىنداۋدى ۇسىندى، - دەدى كوميتەت ءتورايىمى ءجاميلا نۇرمانبەتوۆا. ونىڭ سوزىنەن قازاقپارات ءۇزىندى كەلتىرەدى.
101 دەپۋتاتتىڭ 100ء-ى قۇجاتتى "قولداپ" داۋىس بەردى، ءبىر دەپۋتات "قالىس قالدى".
ءساۋىر ورتاسىندا سەنات قوعامدى الاڭداتقان قۇجاتقا بىرنەشە تۇزەتۋ ەنگىزىپ، ماجىلىسكە قايتارعان ەدى. سەنات ۇسىنعان وزگەرىستەرگە سايكەس، بالالارعا كيبەربۋللينگ جاساعانى تۋرالى فاكتىلەردى ارنايى ساراپشىلار توبى قارايدى. بۇعان دەيىنگى جوبا بويىنشا، بۇل ماسەلەنى تەك ۋاكىلەتتى ورگان عانا قاراۋى ءتيىس بولعان. قۇجاتتان ۋاكىلەتتى ورگانعا ينتەرنەت-رەسۋرس، الەۋمەتتىك جەلىلەر مەن مەسسەنجەرلەردىڭ جۇمىسىن ءوز بەتىنشە شەكتەۋ نەمەسە توقتاتۋ وكىلەتىن بەرۋ تۋرالى نورما دا الىنىپ تاستالعان ەدى.
دەگەنمەن "پراۆوۆوي مەدياسەنتر" باسپا ءسوز قورعاۋ ۇيىمىنىڭ ديرەكتورى ديانا وكرەموۆا وسىعان دەيىن ازاتتىققا ساراپشىلار توبىنىڭ جۇمىسى، ينتەرنەت-رەسۋرستارداعى ماتەريالداردى ىزدەۋ ءتارىزدى ماسەلەلەر بويىنشا سۇراقتار قالعاندىقتان قۇجاتتى ءبىراز جەتىلدىرۋ قاجەتتىگىن ايتقان.
بىلتىردان بەرى قوعامدا داۋ تۋعىزىپ كەلە جاتقان زاڭ جوباسىنا سايكەس، شەتەلدىك الەۋمەتتىك جەلىلەر مەن مەسسەنجەرلەر قازاقستان اۋماعىندا جۇمىس ىستەۋى ءۇشىن زاڭدى تۇلعا رەتىندە تىركەلىپ، وكىلدىگىن اشۋى ءتيىس. بۇل ەرەجەنى ورىنداماسا، قۇجات كۇشىنە ەنگەننەن كەيىن جەلىلەر بۇعاتتالا باستايدى. بۇعان قوسا، قۇجات تىركەلگەن وكىلدىكتەردى قازاقستاننىڭ وكىلەتتى ورگاندارى تىيىم سالعان نەمەسە شەكتەۋ قويعان اقپاراتتارعا توسقاۋىل قويۋعا مىندەتتەيدى.
جوبا سىنشىلارى زاڭعا ەنەتىن تۇزەتۋلەر سەنزۋرانى كۇشەيتىپ، اقپارات الۋ ەركىندىگىن شەكتەيدى دەپ سانايدى. Facebook، Instagram، Telegram، Whatsapp جانە وزگە دە تانىمال الەۋمەتتىك جەلىلەردىڭ ەركىن پايدالانىلۋىنا بوگەت جاسايدى دەيدى.
ال زاڭ جوباسى اۆتورلارى مۇنداي ۋاجدەرمەن كەلىسپەيدى. جوبا اۆتورلارى "قۇجات بالالاردى كيبەربۋللينگتەن قورعايدى، الەۋمەتتىك جەلىلەردى بۇعاتتامايدى، تەك ءبىرقاتار شەكتەۋ قويادى" دەپ مالىمدەگەن.
