ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"وتباسى بانك" نەسيەنىڭ بارلىق سوماسىنا پايىزدىق مولشەرلەمە الا ما؟ بەكتەنوۆ جاۋاپ بەردى

29 ناۋرىز 2024 175

دەپۋتاتتار «وتباسى بانكىنەن» يپوتەكا العان ازاماتتار دەپوزيتكە سومانىڭ جارتىسىن جينايتىنىن ايتتى. كەيىنىرەك بانك قارىز الۋشىعا مۇلىكتى ساتىپ الۋ ءۇشىن جەتپەي تۇرعان بولىگىن بەرەدى. بۇل رەتتە بانك تۇرعىن ءۇيدىڭ بۇكىل قۇنىنا سىياقى مولشەرلەمەسىن بەلگىلەيدى. بۇل – ادامنىڭ ءوز قاراجاتى جانە بانك بەرگەن سوما.

ولجاس بەكتەنوۆ اۋەلى بانككە سالىمشى قارجىنى قالاي جينايتىنىنا توقتالدى. «وتباسى بانك» اق تۇرعىن ءۇي قۇرىلىسى جيناقتارى شارتى بويىنشا، قارىز سالىمشىعا كەمىندە 3 جىل شوتتا قاجەت سومانىڭ 50%-ىن مىندەتتى جيناعان كەزدە بەرىلەدى. بۇل رەتتە قارىز الۋشى بانكتىڭ سىياقىسىن جيناعان قاراجاتتى ەسەپكە الماي، قارىز سوماسىنا عانا تولەيدى.

سالىمشىنىڭ قاراجات جيناۋعا مۇمكىندىگى بولماسا، ءبىراق قاجەت سومانىڭ 50%-ى بار بولسا، ول ارالىق دەپ اتالاتىن قارىزدى مەرزىمىنەن بۇرىن الا الادى. بۇل جاعدايدا سومانىڭ 50%-ى سالىنعان قاراجات ارالىق قارىزدى پايدالانۋ كەزەڭىنە (3 جىل) كەپىل رەتىندە ارەكەت ەتەدى.

«بۇل تاسىلدە يپوتەكالىق قارىز كليەنتكە قاجەت سومانىڭ 100% مولشەرىندە بەرىلەدى. وعان قوسا بانكتىڭ سىياقىسى بەرىلگەن بارلىق سوماعا ەسەپتەلەدى. دەپوزيت مەرزىمى كەمىندە ءۇش جىل بولعاننان كەيىن قارىز الۋشىنىڭ بانكتە ساقتالعان سوماسىنىڭ 50%-ى مولشەرىندەگى قاراجاتى ارالىق قارىزدى وتەۋ ەسەبىنە وتەدى. القارىز الۋشى مولشەرلەمەسى جىلدىق 3،5-5%-عا دەيىن تومەندەتىلەتىن تۇرعىن ءۇي قارىزىنا اۋىسادى»، – دەپ جاۋاپ بەردى پرەمەر-مينيستر.

«وتباسى بانك» پەن كوممەرسيالىق بانكتى سالىستىرۋ

ولجاس بەكتەنوۆ «وتباسى بانكتەن» يپوتەكا الۋ مەن جەكە كوممەرسيالىق بانكتەن يپوتەكا الۋدى سالىستىردى.

«سالىستىرىپ قاراساق، تۇرعىن ءۇي قۇنى 30 ملن تەڭگە، جىلدىق مولشەرلەمە 18% جانە باستاپقى جارنا 20% بولعان كەزدە ەكىنشى دەڭگەيدەگى كوممەرسيالىق بانكتىڭ قارىز الۋشىسى 10 جىل ىشىندە اي سايىن شامامەن 430 مىڭ تەڭگە تولەيدى. ناتيجەسىندە ارتىق تولەم ەكى ەسەگە جۋىق بولادى»، – دەلىنگەن جاۋاپتا.

«وتباسى بانكىنىڭ» ارالىق قارىز جۇيەسى بويىنشا جىلدىق سىياقى مولشەرلەمەسى 7%، قارىز سوماسى 30 ملن تەڭگە جانە باستاپقى جارنا 50% بولدى دەيىك. وسىنداي مەرزىم ىشىندە قارىز الۋشى العاشقى 3 جىلدا اي سايىن 200 مىڭ تەڭگەدەن استام اقشا تولەيدى. قالعان 7 جىلدا شامامەن 160 مىڭ تەڭگە تولەيدى. ناتيجەسىندە ارتىق تولەم 8 ملن تەڭگەدەن 10 ملن تەڭگە ارالىعىندا بولادى.

بەكتەنوۆتىڭ ايتۋىنشا، وسىلاي، «وتباسى بانكىنىڭ» قولدانىستاعى جيناق جۇيەسى قارىز الۋشىعا قارجىلىق جۇكتەمەنى ايتارلىقتاي تومەندەتۋگە مۇمكىندىك بەرەدى.

«وتباسى بانككە» قاتىستى ساۋال

ايتا كەتەيىك، دەپۋتات يسلام سۇڭقار پرەمەر-مينيستر ولجاس بەكتەنوۆكە «وتباسى بانككە» قاتىستى دەپۋتاتتىق ساۋال جولداعان.

دەپۋتات يسلام سۇڭقار «وتباسى بانكىندە» يپوتەكا العان ازاماتتار قارجى ۇيىمىندا سول سومانىڭ جارتىسىن جينايتىنىن ايتادى. كەيىنىرەك بانك كليەنتكە قالعان بولىگىن بەرەدى. بۇل رەتتە تۇرعىن ءۇيدىڭ بارلىق قۇنىنا پايىز جۇرەدى. دەمەك، ادامنىڭ ءوز قاراجاتى ەسەبىنەن دە، بەرىلگەن سوماعا دا ەسەپتەلەدى.

«مىسالى، كليەنت 10 ميلليون اكەلسە، بانك وعان 10 ميلليون بەرەدى. ال سىياقى مولشەرلەمەسى 20 ميلليون تەڭگەگە ەسەپتەلەدى. ادامعا ءوز اقشاسىن پايىزبەن بەرۋ جانە بۇل ءۇشىن قوسىمشا بانك كوميسسياسىن الۋ قانشالىق ادىلەتتى؟ سالىمشىلاردىڭ نارازىلىعىنا بانك بۇل اقشا دەپوزيتتە جاتىر، وعان پايىزدىق مولشەرلەمە جانە مەملەكەت سىيلىقاقىسى دا بار دەگەن جاۋاپ بەرەدى. ءبىراق بۇل جاي عانا قارجىلىق ايلا دەپ ەسەپتەيمىز. ويتكەنى دەپوزيت مولشەرلەمەسى – نەبارى 2 پايىز. مەملەكەت سىيلىقاقىسى شەكتەۋلى سوماعا، ياعني 200 اەك بەرىلەدى»، – دەپ ءتۇسىندىردى يسلام سۇڭقار.

«وتباسى بانك» كىرىسى – 107،5 ملرد تەڭگە

2023 جىلدىڭ قورىتىندىسى بويىنشا «وتباسى بانكى» بارلىق بانك اراسىندا ەڭ كوپ كىرىس – 107،5 ملرد تەڭگە العانىن اتاپ ءوتتى.

«ەكىنشى سۇراق تۋىندايدى: اقشانى كىم تابادى، حالىق پا الدە بانك پە؟ وسىنىڭ نەگىزىندە تۇرعىن ءۇي قۇنىنىڭ بارلىق سوماسىنا بانكتىك سىياقى ەسەپتەۋدى قايتا قاراۋدى ۇسىنامىز»، – دەپ تۇيىندەدى ءسوزىن يسلام سۇڭقار.

بۇل ماقالا تۋرالى نە ويلايسىز؟