ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ورالدا تولاسسىز جاڭبىردان ۇيلەرگە قار سۋى كىرىپ جاتىر

26 ناۋرىز 2024 222

ورال قالاسىندا ۇيلەرگە قار سۋى كىردى. بۇعان تولاسسىز جاۋعان جاڭبىر دا اسەر ەتتى.

ورال قالاسى اكىمدىگىنىڭ باسپا ءسوز قىزمەتىنەن ءمالىم ەتكەندەي، رەسمي تۇردە ناقتى انىقتالعانى – ازىرگە ءۇش ۇيگە سۋ كىرگەن. اتاپ ايتقاندا، قاسىم احميروۆ كوشەسى 3، قوبىلاندى باتىر كوشەسى 34 جانە كوشىم كوشەسى 34-مەكەنجايىندا وسىنداي وقيعا بولدى.

«قازىرگى كەزدە قالا اكىمدىگى مەن توتەنشە جاعداي باسقارماسىنىڭ قىزمەتكەرلەرى وقيعا ورنىنا بارىپ، ماسەلەنى انىقتاپ، قولۇشىن سوزىپ جاتىر. سۋ سورۋ جانە باسقا جۇمىستار اتقارىلۋدا»، - دەپ حابارلادى ۆەدومستۆودان.

ۇيىنە سۋ كىرگەن تۇرعىندار بەينەجازبالارىمەن ءبولىسىپ جاتىر. زاچاگان كەنتىندە ەسەت ازەربايەۆ كوشەسى 13-ۇيدە تۇراتىن التىناي مولداعالييەۆانىڭ ايتۋىنشا، كوشەنىڭ سۋى اۋلاعا قاراي اعىپ، تولتىرعان.

«اۋلانىڭ ءىشى، ساراي، جەرقويما سۋعا تولدى. سۋ سەنەگە، زالعا كىردى. مانا ءۇش ماشينا كەلىپ، سورىپ كەتكەن. تاعى دا كۇتىپ وتىرمىز»، - دەدى ا.مولداعالييەۆا.

بقو تج دەپارتامەنتىنىڭ مالىمەتى بويىنشا تاۋلىك ىشىندە ەرىگەن قار سۋىن سورۋ بويىنشا 696 ءوتىنىم تۇسكەن. سونىڭ ىشىندە توتەنشە جاعدايلار دەپارتامەنتى جانە جەرگىلىكتى اتقارۋشى ورگاندار 609 ءوتىنىمدى پىسىقتاعان، 87 ءوتىنىم باقىلاۋدا. ءبىر تاۋلىكتە 39 835 سۋ سورىلىپ، وعان 370 ادام جۇمىلدىرىلىپ، 157 تەحنيكا، 85 موتوپومپا تارتىلعان. سونداي-اق وبلىستا سۋ شايىپ كەتكەن جولدار سانى بەسەۋگە جەتتى. بۇگىن تەرەكتى اۋدانى اڭقاتى اۋىلدىق وكرۋگىندە قاندىق اۋىلى تۇسىندا اۋداندىق ماڭىزى بار ءسارىومىر-اڭقاتى جولىنىڭ ۇستىنە سۋ شىعىپ كەتتى. تەرەكتى اۋدانىنىڭ بوگدانوۆ اۋىلى ماڭىندا وبلىستىق ماڭىزى بار تەرەكتى-اقساي اۆتوجولىنىڭ 19-شاقىرىمىندا وسىنداي وقيعا بولدى. ەكى جەردە دە كولىك قوزعالىسى بۇزىلعان جوق.

بۇل ماقالا تۋرالى نە ويلايسىز؟