ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"ءولىپ الايىنشى، مىنالار مەنى ولتىرەدى". استانادا مەكتەپ تەرەزەسىنەن سەكىرىپ كەتكەن وقۋشىعا قانداي قىسىم جاسالعان؟

19 ءساۋىر 2024 3429

مەكتەپتەردەگى الىمجەتتىك ءالى تىيىلماي تۇر. استانادا مەكتەپتىڭ ءتورتىنشى قاباتىنان وقۋشى سەكىرىپ كەتتى. بالا ءقازىر اۋرۋحانادا جاتىر، جاعدايى اۋىر. ءجاسوسپىرىمنىڭ مۇنداي قادامعا نە سەبەپپەن بارعانىن پوليسيا انىقتاپ جاتىر. ال تۋىستارىنىڭ ءوز بولجامى بار. ولار بالانى باسقا وقۋشىلار بوپسالاعان دەپ ەسەپتەيدى. 

كتك تەلەارناسىنىڭ حابارلاۋىنشا، 8 سىنىپ وقۋشىسى بەكبولات سايلاۋ كەشە تۇستە اۋىر جاعدايدا اۋرۋحاناعا جەتكىزىلگەن. قولى، ەكى اياعى سىنعان، بەلىنە زاقىم كەلگەن. دارىگەرلەر وتا جاساپ، بالا بۇگىن عانا ەسىن جيدى.

"وڭ اياعى، وڭ قولىنا وتا جاسادىق. بۇگىن تاڭەرتەڭ جالپى پالاتاعا اۋىستىرىلدى"،-دەيدى ارسلان دۇيسەنبايەۆ، №2 كوپبەيىندى بالالار اۋرۋحاناسىنىڭ ءبولىم مەڭگەرۋشىسى.

بالا ەسىن جيعان سوڭ عانا ءمان جايدى اتا-اناسى بۇگىن ءبىلىپ وتىر.

"ەرداۋلەت دەگەن بالا، ارۋجان ەكەۋى «مەنى بوسپاسالاعان» دەدى. «ونى ازىرگە ايتپايمىن» دەدى. ال ەرداۋلەت، ديماش، ادىلەت دەگەن سىنىبىنداعى بالا مەنى دارەتحانادا ۇرىپ، «قوڭىراۋ بولعانشا سەنى ولتىرەمىز، پوليسياعا بەرەمىز، ءازىر كورەسىڭ، ساباقتان شىققاندا ولتىرەمىز» دەپ ايتتى دەيدى. سودان اشۋلانىپ كەتتىم دە، قوڭىراۋ شالىندى، اعىلشىن ءپانىنىڭ ءمۇعالىمى كىردى، ساباق بىتەيىن دەگەنشە، تەرەزەگە قاراپ وتىردىم، ساباق بىتكەننەن كەيىن «ءولىپ الايىنشى، مىنالار مەنى ولتىرەدى، پوليسياعا بەرەتىن بولدى دەپ» سەكىرىپ كەتتىم» دەدى"،-دەيدى وقۋشىنىڭ اناسى ءلاززات راحماش.

تۋىستارى بالا بۋللينگتىڭ قۇربانى بولدى دەپ سانايدى. «وسى مەكتەپكە اۋىسقالى قىسىمنان كوز اشپاي كەلەدى، بىرنەشە رەت ۇيگە بەتى كوگەرىپ كەلدى» - دەيدى جاقىندارى. مەكتەپ باسشىلىعى دا وسى وقيعادان كەيىن ابدىراپ وتىر. بەكبولاتتى تىنىش، سابىرلى بالا دەپ مىنەزدەمە بەرگەن ديرەكتور «ودان مۇندايدى كۇتپەدىك» دەيدى.

"ەشكىم بايقاماي قالدى. بالالار تاپسىرما ورىنداپ وتىرعان، ءمۇعالىم كىتاپ قاراپ وتىرعان. ءبارى تەز بولعان. ءمۇعالىم ساناۋلى سەكۋندتا باسىمدى كوتەرگەندە، بالانىڭ تەرەزەدە ءىلىنىپ تۇرىپ، قۇلاعانىن كوردىم دەپ وتىر"،—دەيدى  №72 مەكتەپ-ليسەي ديرەكتورى ايمان دۇيسەنوۆا.

شوشىنىپ قالعان وقۋشىلار مەن مۇعالىممەن پسيحولوگتار جۇمىس ىستەپ جاتىر. ال ديرەكتورى ءبىلىم ورداسىندا «بۋللينگ بولعان جوق» دەپ ازار دا بەزەر. ءمان-جايدى ءقازىر پوليسيا انىقتاپ جاتىر. ءىس ىشكى ىستەر مينيسترلىگىنىڭ باقىلاۋىندا.

"وقيعانى سوتقا دەيىنگى تەرگەۋ رەەسترىنە تىركەدىك. تەرگەۋ باستالدى، سونىڭ ناتيجەسى بويىنشا قورىتىندى شىعارا الامىز. وقيعانىڭ سەبەبىن ءدال ءقازىر ناقتى ايتا المايمىن"،— دەيدى  ق ر ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ.

ءبىر ولىمنەن امان قالعان وقۋشى ەندى ۇزاق ەمدەلۋى كەرەك. اق حالاتتىلار تاياۋ ارادا ونىڭ ەكىنشى اياعىنا وتا جاساۋدى جوسپارلاپ وتىر.

بۇل ماقالا تۋرالى نە ويلايسىز؟