ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"وبلىس اكىمدەرى جازعى ماۋسىمعا دا دايىن بولۋى قاجەت". پرەزيدەنت سۋ تاسقىنىنا جاۋاپتى شەندىلەردى سىنادى

01 ءساۋىر 2024 279

"قازىرگىدەي قامسىز وتىرماي، الدىن الا ارەكەت ەتۋ كەرەك. سۋ تاسقىنىن كورگەندە، كوكتەن تۇسكەندەي ابدىراپ قالدىڭىزدار". مەملەكەت باسشىسى قاسىم-جومارت توقايەۆ رەسپۋبليكالىق شتاب وتىرىسىندا وسىلاي دەدى. جيىن بارىسىندا پرەزيدەنت وسى جولعى توتەنشە جاعدايعا جاۋاپتى شەنەۋنىكتەردى قاتاڭ سىنادى.

"سۋ تاسقىنى مەن ورتكە قاتىستى جاعداي جىل سايىن قايتالانادى. جاۋاپتى ورگاندار مەن سالالىق قىزمەتتەردىڭ (قازسۋشار، قازگيدرومەت) جوبالاۋ، ساراپتاما جاساۋ جۇمىستارى ناشار ۇيىمداستىرىلعان. ءتيىستى شارالار، نەگىزىنەن، جاعداي ورىن العاننان كەيىن نەمەسە تولىققاندى بولجام جاسالماي قابىلدانادى. سوندىقتان بىزگە داعدارىس جاعدايلارىن بولجاۋدىڭ ناقتى تەتىگى وتە قاجەت. سيفرلىق دامۋ مينيسترلىگى ەكولوگيا، سۋ رەسۋرستارى جانە توتەنشە جاعدايلار مينيسترلىكتەرىمەن بىرلەسىپ جىل سوڭىنا دەيىن بارلىق ىقتيمال توتەنشە جاعدايلاردى (سۋ تاسقىنى، ءورت جانە ت.ب.) مودەلدەۋگە، ءتيىستى بولجامدار، ۇسىنىمدار مەن ءىس-قيمىل جوسپارىن جاساۋعا مۇمكىندىك بەرەتىن اقپاراتتىق جۇيە ازىرلەۋگە ءتيىس. ايتپاقشى، ۇكىمەت پەن جەرگىلىكتى اتقارۋشى ورگاندار، ەڭ الدىمەن، وبلىستاردىڭ اكىمدەرى جازعى ماۋسىمعا دا دايىن بولۋى قاجەت. ءورت نەمەسە باسقا دا تابيعي اپاتتاردىڭ بولۋى ابدەن مۇمكىن.

قازىرگىدەي قامسىز وتىرماي، الدىن الا ارەكەت ەتۋ كەرەك. سۋ تاسقىنىن كورگەندە، كوكتەن تۇسكەندەي ابدىراپ قالدىڭىزدار. وسى رەتتە ەلىمىزدىڭ شىعىس وڭىرلەرىندەگى سۋ تاسقىنىن مودەلدەۋ جونىندەگى تجم مەن "قازاقستان عارىش ساپارى" ۇلتتىق كومپانياسىنىڭ بىرلەسكەن جۇمىس تاجىريبەسىن قولدانۋعا بولادى"، – دەدى قاسىم-جومارت توقايەۆ.

پرەزيدەنت قارعىن سۋدى اۋىل شارۋاشىلىعى قاجەتىنە جاراتۋ ءۇشىن جوسپار ازىرلەۋ جانە پارمەندى شارالار قابىلداۋدى تاپسىردى. پرەزيدەنتتىڭ ايتۋىنشا، اكىمدىكتەر ەرىگەن قار سۋىن ەلدى مەكەندەردەن وزەن ارنالارىنا نەمەسە توعاندارعا بۇرۋ جۇمىستارىن جۇرگىزۋى كەرەك.

بۇل ماقالا تۋرالى نە ويلايسىز؟