ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

نەگاتيۆ جازىپ، اپاتتان ابىروي جيناماي-اق قويايىق - باعلان ءابدىرايىموۆ

11 ءساۋىر 2024 320

ءانشى باعلان ءابىدىرايىموۆ ءوز ينتاگرام پاراقشاسىندا سۋ تاسقىنىنان زارداپ شەككەن حالىقتى ودان ءارى ىزالاندىرىپ، ءتۇرلى ۆيدەولار سالۋدى قىسقارتۋ كەرەگىن ايتتى، دەپ حابارلايدى Alash.kz.

ول ءوز جازباسىندا قاسيەتتى رامازان ايى اياقتالىپ، ەلىمىزدىڭ كوپ ءوڭىرىن توپان سۋ باسىپ، حالىقتىڭ باسىنا قارا بۇلت ۇيىلگەنىن ايتتى. ءدال وسى سىندارلى ۋاقىتتا حايپ قۋىپ، نەگاتيۆ پىكىرلەرمەن حالىقتىڭ اشۋىنا تيمەۋگە كەڭەس بەردى. 

"ايتىپ كەلمەيتىن اپات باتىسىمىزدى باستى، سولتۇستىگىمىزدى شايىپ جاتىر. امال نەشىك، تابيعي اپات اللانىڭ قالاۋى دەيمىز… بۇل كۇن دە وتەر، ءبىز ءجيى ايتاتىن ءبىر قيىندىقتان كەيىن ەكى جەڭىلدىك بار ەكەنى انىق. كۇن جىلىپ، سۋ ءسىڭىپ، اپاتتى ايماقتارداعى قيراعان ۇيلەر قايتادان قالپىنا كەلتىرىلەر. وسى تۇستا حايپ قۋىپ، قاسىرەت ۇستىنە نەشە ءتۇرلى پريكول سوزدەردى قوسىپ، نەگاتيۆتى ۆيدەولار تاراتىپ جاتقان جاندارعا، اپاتتان ابىروي جيناماي-اق قويايىق، - دەگىم كەلەدى. ودان وحۆاتىڭ ارتىپ، وقىرمانىڭ كوبەيمەيدى. ءبارى بىتكەسىن الەۋمەتتىك شىعىنعا ۇشىراعان حالىقتىڭ تالابىن مەملەكەتتەن ساۋاتتى تۇردە تالاپ ەتىپ، قايتا ءوندىرىپ الاتىن بولامىز، ات سالىسايىق!"،-دەپ جازدى ول جەلىدە.

"قۋانىشتى بولىسسەڭ كوبەيەدى" دەگەندەي باعلان ءابدىرايىموۆ نەگاتيۆ پىكىرلەردىڭ ورنىنا قيىن-قىستاۋ زاماندا حالىققا ازىق-تۇلىك، گۋمانيتارلىق كومەك جىبەرىپ جاتقان جاندار تۋرالى جازىپ، كۇشىمىز بىرلىكتە ەكەنىن كورسەتۋ كەرەكتىگىن جازدى.

"سوندىقتان بولاتىن ىسكە كوشەيىك. 10 توننا ازىق-تۇلىك جيناپ، باتىسىمىزعا جونەلتىپ جاتقان ماليك حاسەنوۆ سەكىلدى قانشاما تانىمال تۇلعالار سبور ەشىپ، ەتىگىمەن سۋ كەشىپ، ەل اراسىندا ءجۇر. سونداي ەرلىكتى ايتايىق. ون توننا ازىق تۇلىكتى تىك ۇشاقپەن جەدەل جەتكىزۋگە اتسالىسقان مەملەكەتتىك ورگانداردىڭ ءىسىن ايتايىق. “قۋانىشتى بولىسسەڭ كوبەيەدى، قايعىنى بولىسسەڭ ازايادى”،- دەگەن ەمەس پە؟! قۋانىشتى كۇنىمىز الدا!
سابىر ەتەيىك. ەلىمىزدىڭ ەڭسەسى تۇسپەسىن!"،-دەپ ءسوزىن اياقتادى. 

بۇل ماقالا تۋرالى نە ويلايسىز؟