قازاقستان بويىنشا ناسىبايعا تىيىم سالىندى. ارتىنشا ناسىباي وندىرەتىن سەحتار جابىلدى. شارۋالار شىعىنعا باتىپ، اۋىل حالقى جۇمىسسىز قالدى. سەبەبى اۋدان جۇرتىنىڭ 80 پايىزى ءناپاقاسىن ناسىباي ارقىلى تابادى. بۇل تۋرالى alash.kz سايتى 31-ارنانىڭ “ينفورمبيۋرو” باعدارلاماسىنا سىلتەمە جاساپ حابارلايدى.
"ميلليونداعان تەڭگەنىڭ شيكىزاتى مەن قۇرىلعىسى شاڭ باسىپ تۇر" دەپ شىرىلداعان كاسىپكەرلەر جەرگىلىكتى بيلىكتەن كومەك سۇرادى. ايتا كەتەيىك، ناسىبايدى ساتۋعا جانە وندىرۋگە 2015 جىلدان بەرى تىيىم سالىنعان. ءبىراق پرەزيدەنتتىڭ مالىمدەمەسىنەن كەيىن عانا جاپپاي تەكسەرىستەر باستالعان.
ناسىباي شىعارۋمەن اينالىساتىنداردىڭ ءبىرى – اۋدان تۇرعىنى داۋرەن بالتابايەۆ. ءبىراق بۇل ءونىم ءقازىر كاسىپكەردىڭ قويماسىندا تاۋ بولىپ ءۇيىلىپ تۇر. شەتەلدەن قىرۋار قاراجاتقا الدىرعان پاكەت پەن پلاستيك قۇتىلار دا قوقىسقا اينالعان.
"بۇنىڭ ءبارىن وزبەكستاننان الدىرعانبىز. كەمىندە 1 ميلليون تەڭگە قاراجات كەتتى. ناسىبايعا تىيىم سالدى. ەندى بۇنىڭ ءبارىن نە ىستەيمىز؟ ءبارى قوقىس بولىپ جاتىر. اۋدان تۇرعىندارىنىڭ 80-90 پايىزى وسىمەن كۇن كورەدى، زاۋىت جوق"، – دەيدى داۋرەن بالتابايەۆ.
پرەزيدەنتتىڭ ۇلتتىق قۇرىلتايداعى مالىمدەمەسىنەن كەيىن پوليسيا جاپپاي تەكسەرىس جۇرگىزىپ، اۋدانداعى سەحتاردىڭ جۇمىسىن توقتاتقان. ءقازىر جۇرتتىڭ قىپ-قىزىل اقشاعا العان قۇرىلعىلارى مەن شيكىزاتى قويمادا شاڭ باسىپ تۇر. باسقا كادەگە اسپايتىن بۇل ءشوپتى ەندى ديقاندار كورشىلەس ەلدەرگە شىعارىپ ساتساق دەپ ارماندايدى.
ناسىبايدى تەمەكى ۇنتاعىنان جاسايدى. اۋدان ازاماتتارى تەمەكىنى ەرتە كوكتەمدە جىلىجاي ىشىنە ەگىپ، كەيىن القاپقا اپارىپ وتىرعىزادى. ءقازىر كوكتەپ تۇرعان القاپتى جىرتۋعا وبالسىنىپ وتىر. ال جۇمىسسىز قالدىق دەگەن تۇرعىندار اۋدان اكىمدىگىنە كەلگەن. اتقامىنەرلەر شىعىنعا باتقان كاسىپكەرلەردىڭ شيكىزاتى مەن ناسىباي شىعاراتىن قۇرىلعىلارىن كورشى ەلدەرگە ساتۋعا كومەكتەسۋگە ۋادە بەردى.
"بۇل ماسەلە بويىنشا وزبەكستان رەسپۋبليكاسىمەن تاۋار اينالىمى جونىندە جۇمىس ىستەپ جاتقان كاسىپكەرلەر بار. قالعان تەمەكىلەرى مەن اپاراتتارىن سول جاققا وتكىزۋ مۇمكىندىگىن قاراستىرۋدا كومەك بەرەيىك"، – دەدى كەلەس اۋدانى اكىمىنىڭ ورىنباسارى سۇلەيمەن جىلقىبايەۆ.
شەنەۋنىكتەر بيىل كەلەس اۋدانى "اۋىل اماناتى" باعدارلاماسىنا ىلىنگەنىن ايتادى. سوعان سايكەس ءار شارۋاعا 50 باعىت بويىنشا ءوز كاسىبىن جۇرگىزۋگە 9 ميلليون تەڭگەگە دەيىن اقشا بەرىلەدى. اكىمدىك وكىلدەرى ناسىباي وندىرۋمەن اينالىسىپ كەلگەن جۇرتتى جاڭا كاسىپكە باۋلۋدى باستايمىز دەپ وتىر.
