"قازاقستان مۇشە بولىپ تابىلاتىن ۇجىمدىق قاۋىپسىزدىك شارتى ۇيىمىنان ۋكراينا شىعىسىنداعى سەپاراتيستىك رەسپۋبليكالار اۋماعىنا اسكەر جىبەرىلۋى مۇمكىن بە؟" دەگەن سۇراققا قازاقستان سىرتقى ىستەر ءمينيسترى مۇحتار تىلەۋبەردى "جوق" دەپ جاۋاپ بەردى.
– ۇقشۇ جارعىسى اسكەر مەن بىتىمگەرشىلىك كۇشتەردى پايدالانۋدى قاتاڭ شەكتەيدى. ولار تەك ۇقشۇ اۋماعىندا عانا (وعان رەسەي، ارمەنيا، قازاقستان، بەلارۋس، قىرعىزستان، تاجىكستان مۇشە – رەد.) پايدالانىلا الادى. وزدەرىڭىز بىلەسىزدەر، جۋىردا ۇقشۇ باس حاتشىسى بىتىمگەرشىلىك كونتينگەنتتى "دونەسك حالىق رەسپۋبليكاسى" مەن "لۋگانسك حالىق رەسپۋبليكالارىنا" جىبەرۋ ىقتيمالدىعى تۋرالى ماسەلەگە تۇسىنىكتەمە بەردى. ونىڭ ايتۋىنشا، بۇل ءىس جۇزىندە مۇمكىن ەمەس. ونى جىبەرۋ ءۇشىن ارنايى رەزوليۋسيا بار، بۇۇ قاۋىپسىزدىگىنىڭ ارنايى مانداتى بار. سول سەبەپتى بۇل ماسەلە [كۇن تارتىبىندە] تۇرعان جوق، – دەدى مينيستر.
وتكەن اپتادا ءماجىلىس رەسەيمەن اسكەري ىنتىماقتاستىق ورناتۋ تۋرالى كەلىسىمدى راتيفيكاسيالاعان. سەيسەنبى كۇنى جۋرناليستەر مينيسترگە "وسى كەلىسىمگە سايكەس، قازاقستان رەسەيگە اسكەري كومەك جىبەرۋى مۇمكىن بە؟" دەگەن سۇراق قويدى.
"اتالعان كەلىسىم تەك اسكەري-تەحنيكالىق ىنتىماقتاستىقتى قاراستىرادى" دەدى مينيستر. "ەڭ بىرىنشىدەن، ول اسكەري تەحنيكانى ساتىپ الۋ، بىرگە اسكەري جاتتىعۋلار وتكىزۋ، سونداي شارالاردى كوزدەيدى" دەپ جاۋابىن ناقتىلادى.
ءبىر كۇن بۇرىن رەسەي پرەزيدەنتى ۆلاديمير پۋتين ۋكراينا شىعىسىنداعى سەپاراتيستىك رەسپۋبليكالاردىڭ تاۋەلسىزدىگىن مويىنداۋ تۋرالى قاۋلىعا قول قويىپ، اسكەر جىبەرۋ تۋرالى بۇيرىق بەرگەن. ناتو رەسەيدىڭ شەشىمىن ايىپتاپ، ماسكەۋ "ۋكراينا شىعىسىنداعى قاقتىعىستى ۋشىقتىرىپ، ۋكراينانى باسىپ الۋعا سىلتاۋ ىزدەپ وتىر" دەپ مالىمدەدى. بۇۇ رەسەيدىڭ سەپاراتيستىك رەسپۋبليكالار تاۋەلسىزدىگىن مويىنداۋ تۋرالى شەشىمىنە الاڭداۋشىلىق ءبىلدىرىپ، ۋكراينا تۇتاستىعىن قولداي بەرەتىنىن مالىمدەدى.
ۋكراينا پرەزيدەنتى ۆلاديمير زەلەنسكيي "ماسەلەنى ديپلوماتيالىق جولمەن رەتتەۋ ساياساتىن ۇستانىپ، ارانداتۋعا ەرمەيمىز" دەپ مالىمدەدى. "ۋكراينانىڭ ءوز شەكاراسىن قورعاۋعا قۇقىعى بار" دەدى ول. ۋكراينا باس پروكۋراتۋراسى "بيلىك وكىلىنىڭ مەملەكەت شەكاراسىن وزگەرتۋگە شاقىرۋىنا تىيىم سالاتىن" باپ بويىنشا قىلمىستىق ءىس قوزعالعانىن حابارلادى.
