الماتى وبلىستىق ءماسليحاتىنىڭ دەپۋتاتى بەكەت ابىشيەۆ ميللياردتاعان تەڭگە سۋبسيديانى الاياقتىق جولمەن الدى دەگەن كۇدىككە ءىلىندى. پوليسياعا ونىڭ بۇرىنعى بيزنەس-سەرىكتەرى شاعىمدانعان.
كاسىپكەرلەردىڭ ايتۋىنشا، دەپۋتات 3 ملرد تەڭگەگە جۋىق اقشانى تاڭقۋراي ءوسىرىپ، ونى وزبەكستان مەن قىرعىزستانعا ەكسپورتتايمىن دەپ العان ەكەن. كورشى ەلدەر قازاقستاننىڭ جەمىس-جيدەگىنەن تاۋەلسىز ەكەنى ايدان انىق بولسا دا، اۋىل شارۋاشىلىعى مينيسترلىگى وعان جىل سايىن جۇزدەگەن ميلليون تەڭگەنىڭ سۋبسيدياسىن، ال اگرارلىق نەسيە كورپوراسياسى جەڭىلدەتىلگەن نەسيە بەرىپ كەلگەن. بەكەت ابىشيەۆ بۇل اقشانىڭ كوپ بولىگىن ءىنىسىنىڭ كومپانياسى ارقىلى ءوز شوتىنا اۋدارىپ وترىپتى. ءتىپتى، 160 ميلليون تەڭگەسىن كازينودا ۇتىلىپ قالعان. شاعىمدانۋشى كاسىپكەرلەردىڭ، دەپۋتاتتىڭ جانە ەسەپسىز قارجىنى سول دەپۋتاتقا بەرگەن اگرارلىق نەسيە كورپوراسياسى وكىلدەرىنىڭ پىكىرىن رەت-رەتىمەن بايانداۋعا تىرىستىق.
كاسىپكەر ەرجان حايرلييەۆ بەكەت ابىشيەۆتىڭ دوسى ءارى بيزنەس-سەرىگى بولعان. ونىڭ ايتۋىنشا، ەكەۋى جانە تاعى بىرنەشە كاسىپكەر بىرىگىپ، 2018 جىلى ۇلكەن شارۋا باستاۋعا ۋاعدالاسىپتى. جۇمىس باستالىپ، مەملەكەتتەن سۋبسيديانىڭ العاشقى لەگى تۇسكەندە ابىشيەۆ جالعان قۇجات جاساپ، شوتتاعى جۇزدەگەن ميلليون تەڭگەنى وزىنە اۋدارىپ العان كورىنەدى. شاعىمدانۋشىلاردىڭ دالەل رەتىندە اكەلگەن قۇجاتتارىندا بەكەت ابىشيەۆتىڭ جەكە شوتىنا 2،2 ملرد تەڭگەدەن استام قارجى اۋدارىلعانى كورسەتىلگەن.
«ءبىز 2018 جىلدىڭ قاراشاسىندا 700 ملن تەڭگەدەي نەسە الدىق. رايىمبەك اۋدانىنداعى 400 گەكتار جەرگە مالينا ەگەمىز دەگەن مىندەتتەمە العانبىز. جوبانى باستاپ، مەن كەپىلگە قۇنى 170 ملن تەڭگە بولاتىن جىلجىمايتىن مۇلىك رەتىندە 2 مىڭ گەكتار جەرىمدى جانە جۇك ساقتاۋ قويماسىن قويدىم. «Tengty Land» ج ش س قۇرىپ، ونىڭ ديرەكتورى بولدىم، ال ابىشيەۆ كومپانيانىڭ «گارانتى» بولدى. ابىشيەۆ «مەنىڭ اتىمدا ەشتەڭە بولماۋ كەرەك، ەرتەڭ مەن دەپۋتات بولام، سول كەزدە تازا بولۋىم كەرەك» دەدى. ول دا 480 ملن تەڭگەنىڭ جىلجىمايتىن مۇلكىن كەپىلگە قويدى. اقشا تۇسكەن سوڭ ول سىلتاۋ تاۋىپ، ۇرىس شىعاردى دا، «ەكەۋمىز بىرگە جۇمىس ىستەي المايدى ەكەنبىز، مەن ءوزىم اينالىسام، سۋبسيديانى دا ءوزىم الام، كومپانيانى سات» دەدى. سول ارالىقتا تاعى 700 ملن تەڭگە سۋبسيديانى كومپانيانىڭ اتىنان ەلەكتروندى ءوتىنىش بەرىپ الىپ العان. ەسەپشى، مەنەدجەردىڭ ءبارى ءوز ادامى، مەن قولدا بيلىگى جوق ديرەكتور بولىپ قالدىم. مالينامەن مۇلدەم اينالىسپادىق. ءبىر جىلدان كەيىن ول سەرىك ۇسەمبايەۆ دەگەن ادامدى تاۋىپ اكەلدى دە، كومپانيانىڭ قۇجاتتارىن سوعان اۋداردىق. مەن كومپانيانى 2019 جىلى 160 ملن تەڭگەگە ولارعا ساتتىم. قۇجات جۇزىندە بارلىق مىندەتتەمەلەر كومپانيانىڭ جاڭا قوجايىنىنا اۋدارىلسا دا، ولار مەنى بورىشكەر ەسەبىنەن شىعارمادى. نەسيەنىڭ اقشاسىن دا، سۋبسيديانى دا وزدەرىنىڭ ەسەپ شوتىنا اۋدارعانمەن، 700 ملن تەڭگە قارىز ءالى كۇنگە مەنىڭ موينىمدا»، – دەيدى كاسىپكەر ەرجان حايرلييەۆ.
ەرجان حايرلييەۆ
«الاياقتىق ارەكەتىن جۇزەگە اسىرۋعا مۇگەدەك ءىنىسىن پايدالانعان…»
حايرلييەۆ كومپانيادان شىعىپ كەتكەنمەن، كەپىلدەگى مۇلكى قالىپ قويعان. ەسەسىنە دەپۋتات ءوزىنىڭ اتىنان قويعان 480 ملن تەڭگەنىڭ جىلجىمايتىن مۇلكىن نەسيە تولەنبەسە دە كەپىلدەن شىعارىپ العان ەكەن. ارادا ەكى جىل وتكەندە بۇرىنعى ديرەكتور مەملەكەت قاراجاتىن تالان-تاراجىعا سالىپ، سۋبسيديانى زاڭسىز الدى دەگەن ايىپپەن تەرگەۋگە شاقىرىلادى. سول كەزدە حايرلييەۆ بارلىق قۇجاتتى قايتا كوتەرتىپ، سوت ساراپتاماسىن جۇرگىزەدى. ناتيجەسىندە دەپۋتات جالعان ءمور جاساتىپ، بۇرىنعى سەرىكتەستىكتىڭ اتىنان جۇزدەگەن ملن تەڭگەنىڭ سۋبسيدياسىن تۇراقتى الىپ وتىرعانى انىقتالادى. ءبىر قىزىعى، نەگىزگى جشس-دەن بولەك ابىشيەۆ ونداعان شاعىن كومپانيانىڭ اتىنان دا سۋبسيديا الۋعا ءوتىنىش بەرىپ، ونىڭ بۇكىل ءوتىنىشى ماقۇلدانىپ كەلگەن ەكەن.
«مەنىڭ ۇستىمنەن تەرگەۋ باستالىپ، 183 ملن 300 مىڭ تەڭگەنى زاڭسىز الدى دەپ ايىپتادى. مەنى قاماۋعا الۋ تۋرالى دا قاۋلى شىققان. اقىرى بۇل اقشاعا قاتىسىمنىڭ جوق ەكەنىن، ءبىر تيىن دا الماعانىمدى، بارلىق قاراجاتتىڭ تىكەلەي بەكەت ابىشيەۆتىڭ ەسەپ شوتىنا تۇسكەنىن مەملەكەتتىك سوت ساراپتاماسى ارقىلى دالەلدەپ شىقتىق. مەنىڭ اتىمنان قول قويىلىپ، ول اقشانى بانكتەن ابىشيەۆ شەشىپ العان كەزدە، مەن رەسەيدە ءبىر اي بالا-شاعاممەن دەمالىستا بولعانمىن. قاراجاتتى ءوزىنىڭ مۇگەدەك ءىنىسىنىڭ اتىنان اشىلعان «ابىشيەۆ» جەكە كاسىپكەرلىكتىڭ ەسەپ شوتىنا اۋدارتىپ، ونى قولما-قول اقشالاي الىپ وتىرعان. سول كەزدە بىردەن قىلمىستىق ءىس قىسقارتىلدى.
ءبىراق «Tengty Land» ج ش س اتىنان 183 ملن تەڭگە عانا ەمەس، جالپى سوماسى 700 ملن تەڭگەنىڭ سۋبسيدياسى الىنعان. سوندا اقشانى بەرۋشىلەر دە، تەرگەۋشىلەر دە الگى قالعان 500 ملن قاراجاتتى نەگە ىزدەمەيدى؟ ويتكەنى، بۇل تاپسىرىسپەن اشىلعان ءىس. مەن كىناسىز ەكەنىم دالەلدەگەندە، بارلىق قاراجاتتى ىزدەۋ بىردەن توقتاتىلدى. ءبىراق ول اقشاعا تاعى كىمنىڭ قاتىسى بار ەكەنىن، كىمنىڭ العانىن انىقتاپ، مەملەكەتكە قايتارۋ كەرەك قوي؟! قۇزىرلى ورگاندار ولاي جاساعان جوق، ءىستى جىلى جابا سالدى.
قۋدالاۋدان بولەك، 2020 جىلى مەنى ءتورت جىگىت سوققىعا جىعىپ، ءولىمشى ەتىپ تەپكىلەدى. شابۋىل دۇكەننىڭ ىشىندە تۇرعان بەينەباقىلاۋ كامەراسىنا جازىلىپ قالعان. بەت-اۋىزدارىن تۇمشالاپ، ارنايى دايىندىقپەن كەلگەن قىلمىسكەرلەردى ءالى كۇنگە پوليسيا ۇستاعان جوق. ءبىر اي جانساقتاۋ بولىمىندە جاتىپ، امان قالدىم. ونداعى ماقسات – مەنى ولتىرسە قارجىنىڭ دا سۇراۋى بولمايدى، بارلىق كىنانى ماعان جابا سالۋ ەدى»، – دەيدى كاسىپكەر حايرلييەۆ.
100 گەكتاردىڭ تەك 1 گەكتارىنا كوشەت ەگىپ، 183 ملن تەڭگە سۋبسيديا العان…
كاسىپكەردىڭ ايتۋىنشا، «Tengty Land» ج ش س مەن «دراگان» جك اراسىندا كەلىسىمشارت ءتۇزىلىپ، 766 ملن تەڭگەگە 730 مىڭ قاراقات كوشەتىن 400 گەكتار القاپقا وتىرعىزۋ كورسەتىلگەن. الايدا، سۋبسيديا بولىنگەنمەن، «بەن كونان» سورتتى كوشەت سول قالپى وسىرىلمەگەن.
سونداي-اق، دەپۋتاتتىڭ باسقارۋىنداعى كومپانيالار 2019 جىلى مەملەكەتتەن 183 ملن تەڭگەنىڭ سۋبسيدياسىن الىپ، 100 گەكتار جەرگە 666 مىڭ 700 دانا بۇلدىرگەن ءوسىرۋى ءتيىس بولعان ەكەن. ءبىراق، ءىس جۇزىندە تەك ءبىر گەكتار جەرگە عانا كوشەت وتىرعىزىلىپتى. شاعىمدانۋشىلاردىڭ سوزىنشە، الاياقتىققا قۇرىلعان مۇنداي جوبالاردىڭ سانى وتە كوپ. مەملەكەتتەن العان اقشانىڭ جالپى سوماسى ءۇش ميلليارد تەڭگەگە جۋىقتايدى ەكەن.
قازىرگى تاڭدا كاسىپكەر ەرمۇحات ساماتتىڭ ارىزى نەگىزىندە دەپۋتات بەكەت ابىشيەۆتىڭ ۇستىنەن «الاياقتىق» بابى بويىنشا قىلمىستىق ءىس قوزعالعان. ارىزدا دەپۋتات وسى ىسپەن اينالىسقان وزگە كومپانيانىڭ وكىلدەرىنە قۇجاتتا كورسەتىلگەن سورتتان باسقا، ساپاسىز وسكىندەردى 100 ملن تەڭگەگە ساتقانى، سونىڭ كەسىرىنەن شارۋالاردىڭ شىعىنعا ۇشىراعانى ايتىلعان.
«بەكەتتى 2005 جىلدان بەرى بىلەمىز. ول مادينا حايىپوۆا دەگەن بۋحگالتەرىمەن وسى الاياقتىق ارەكەتتەرىن بىرگە جاسادى. مادينا ونىڭ تەك ەسەپشىسى ەمەس، ەكەۋىنىڭ اراسىندا ءبىر بالا بار. ايەلىمەن زاڭدى تۇردە اجىراسقان. ءبىراق، بۇكىل بايلىعى سول اجىراسقان ايەلىنىڭ اتىندا جازىلىپ تۇر. مەنى شوشىندىرعانى، مەملەكەتتى، شارۋالاردى وسىنشاما شىعىنعا باتىرعان ادام قالاي دەپۋتات بولىپ سايلاندى؟ مۇنداي ادامعا دەپۋتاتتىق مانداتتى قالاي عانا سەنىپ تاپسىردى؟
بەكەتتىڭ ۇستىنەن 108 رەت قارسى شاعىم جازىپپىز. سول كەزدە ونىڭ ءموردى قولدان جاساعانى، بۇرىنعى ديرەكتوردىڭ اتىنان قول قويعانى، حايرلييەۆتىڭ ەلەكتروندى كىلتى ارقىلى وزگە وفيستەگى كومپيۋتەردەن سۋبسيديا الۋعا تاپسىرىس بەرگەندىگى، سول سۋبسيديالىق قارجىنى قولما-قول اقشاعا اينالدىرىپ، قالتاسىنا باسقانى انىقتالدى. ميلليوندار ابىشيەۆتىڭ كارتوچكاسىنا ءتۇسىپ وتىرعان. سوعان قاراماستان ول ءالى كۇنگە دەيىن دەپۋتات بولىپ وتىر. مۇنداي ادامدارمەن ءبىز قالاي جاڭا قازاقستان قۇرامىز؟
دەپۋتات بولعانى ءوز الدىنا، ابىشيەۆتىڭ الاياقتىق ارەكەتىن تولىق دالەلدەپ بەرسەك تە، قۇزىرلى ورگاندار ونى الىگە دەيىن جاۋاپقا تارتقان ەمەس. ابىشيەۆتىڭ جىمىسقى ارەكەتىن انىقتاۋ ءۇشىن كەرەمەت ءىز كەسۋشى نەمەسە تاجىريبەلى ەكونوميست بولۋدىڭ قاجەتى جوق، ول الاياقتىق ارەكەتىن وتە قارابايىر جولمەن جۇزەگە اسىرعان. ءبىزدىڭ قولىمىزدا قىلمىستى دالەلدەيتىن قۇجاتتىڭ ءبارى بار»، – دەدى كاسىپكەردىڭ قوعامدىق قورعاۋشىسى بەرەكە حايرلييەۆا.
بەرەكە حايرلييەۆا
كازينودا ءبىر كۇندە 160 ملن تەڭگە ۇتىلعان
بەكەت ابىشيەۆ ءماسليحاتتىڭ دەپۋتاتى عانا ەمەس، الماتى وبلىسى ءماسليحاتىنىڭ «ەكونوميكا، بيۋدجەت، قۇقىقتىق ءتارتىپ، سىبايلاس جەمقورلىققا قارسى كۇرەس، دەپۋتاتتىق وكىلەتتىكتەر مەن ەتيكا ماسەلەلەرى بويىنشا» تۇراقتى كوميسسيا مۇشەسى. وبلىستىق ءماسليحاتتىڭ رەسمي سايتىندا 43 جاستاعى دەپۋتاتتىڭ «Almaty Berry Plants» ءجشس-نىڭ باس ديرەكتورى ەكەنى جازىلعان.
ول شاعىمدانۋشىلاردىڭ بۇكىل ايتقانىن جوققا شىعارىپ وتىر. «بار بولعانى، ولار مەنى مالينا نارىعىنان شىعارىپ تاستاماقشى» دەپ اقتالدى. بەكەت قۇدايبەرگەن ۇلى، ءوزىنىڭ سۋبسيديا العانىن دا، جۇزدەگەن ميلليون تەڭگەنى كازينوعا ۇتقىزعانىن دا جاسىرمادى. ايتۋىنشا، وزگەلەر ايتقانداي 3 ميلليارد ەمەس، 1،8 ميلليارد تەڭگەنىڭ سۋبسيدياسىن العان ەكەن.
«مەن بيزنەسپەن اينالىسپايمىن، ونداي قۇجاتتارىم دا جوق. بيزنەستىڭ ءبارى ءىنىمنىڭ اتىندا. شاعىمدانىپ جۇرگەن بولات، ەرجاندار ماعان جالا جاۋىپ وتىر، مەن دە ولاردى سوتقا بەرىپ، ءىس قوزعاتايىن دەپ جاتىرمىن. قۇزىرلى ورگاندار بۇعان دەيىن دە ماعان قارسى 18 رەت ءىس قوزعاپ، 8 رەت سوتقا بەردى. ۇستىمنەن 6 رەت قىلمىستىق ءىس اشىلىپ، ارتىنشا جابىلدى. ءقازىر ەكى قىلمىستىق ءىس ءجۇرىپ جاتىر. ونى دا جاپقىزام. مەن شارشادىم، ءقازىر بۇكىل ءبىر ادۆوكاتتىق كونتورانى جالدادىم.
بۇلار بىزگە «سۋبسيديانى وزدەرىڭ الىڭدار» دەپ قولحات جازىپ بەردى، ءبىز وسىلايشا اقشانى الىپ وتىردىق. ەندى كەلىپ ارىز جازىپ ءجۇر. مەنى مالينا نارىعىنان شىعارىپ تاستاماقشى. ۇكىمەتتىڭ اقشاسىنا جولاماي-اق قويايىنشى دەپ بىلتىر كاسىپتى توقتاتتىم. ءبىراق، قۋدالاۋ ءالى جالعاسىپ جاتىر. پروكۋرورلارمەن جاقسى تۇرادى ما، بىلمەيمىن، ايتەۋىر تارازدا، الماتىدا، الماتى وبلىسىندا مەنىڭ ۇستىمنەن قىلمىستىق ءىس قوزعالدى. پوليسيا دەپارتامەنتى اشادى، ءىىم جاۋىپ تاستايدى، سولاي جالعاسىپ كەلە جاتىر»، – دەيدى بۇرىنعى سەرىكتەرىنە رەنجىگەن دەپۋتات.
ال، كازينوعا ۇتىلىپ قالعان قاراجات ءۇشىن بەكەت ابىشيەۆ دوسىن ايىپتاپ وتىر. ايتۋىنشا، بانك كارتوچكاسىن دوسى الىپ كەتىپ، ىشىندەگى 160 ميلليون تەڭگەسىن قۇمار ويىنعا ۇتىلىپ قالعان كورىنەدى. الايدا، وسىنشاما قاراجاتتى قولدى قىلسا دا دەپۋتات دوسىنىڭ ۇستىنەن ارىزدانباعان.
ەسەسىنە جانىنداعى بۋحگالتەرى مادينا حايىپوۆا بەس جارىم جىلعا سوتتالىپتى، سوت وعان باس بوستاندىعىن شەكتەۋ جازاسىن قولدانعان.
«ەگەر مەن وسىنشاما اقشانى جەپ قويسام سوتتاپ جىبەرەر ەدى. قاسىمداعى مادينا 5،5 جىلعا باس بوستاندىعىنان شەكتەلگەن. ول شەتەلدەن 100 مىڭ كوشەت اكەلىپ، ونى 500 مىڭ ەتىپ جازدىرعان. سودان سوتتالدى. مەن حالىققا جاقسىلىقتى دا جاسامايىن، ۇكىمەتتىڭ اقشاسىنا بۇدان بىلاي جولامايىن دەپ جوبامدى جاۋىپ تاستادىم. ءتورت جىلدا 1،8 ملرد تەڭگە شاماسىندا سۋبسيديا الدىم. ءبىر جىل بولدى سۋبسيديا الماعانىما»، – دەيدى بەكەت ابىشيەۆ.
«بۇل مەملەكەتتىڭ اقشاسىن ۇرلاۋ…»
ارادا بەس جىلعا جۋىق ۋاقىت وتكەنمەن نەسيە دە قايتارىلماعان، سۋبسيديا دا ماقساتتى تۇردە جۇمسالماعان. ءبىراق وسىنشاما مول قاراجاتتىڭ قايدا كەتكەنىن اگرارلىق نەسيە كورپوراسياسى كەش ءبىلىپ، دەپۋتاتتى قاسىنداعى ءۇش ادامىمەن قوسا سوتقا بەرىپتى. كورپوراسيانىڭ الماتى وبلىستىق فيليالى وكىلدەرىنىڭ مالىمەتىنشە، دەپۋتاتتىڭ بۇل ارەكەتى ءاۋ باستان-اق تەرىس ماقساتقا جوسپارلانعانىن كورسەتەدى. كورپوراسياسى دەپۋتاتتان نەسيە مەن شىعىندى ءوندىرۋ ءۇشىن ەكى جىلدان اسا سوتتاسقان.
«ولارعا اگرارلىق نەسيە كورپوراسياسى نەسيە بەرگەن. قارجى اۋدارىلعان سوڭ ءبىز نارىنقولداعى القاپقا بارىپ، كوشەتتىڭ وسپەگەنىن، قۋراپ قالعانىن كورىپ، جاعدايدى ورتالىققا حابارلادىق. اقشا ماقساتتى تۇردە جۇمسالماعان. استانادان مامانداردى شاقىرتىپ، جاعدايدىڭ ءماز ەمەس ەكەنىن كورسەتتىك. ساراپشىلار كوشەتتىڭ قۇجاتتا كورسەتكەن ساننان الدەقايدا از ەكەنىن، ءارى قۋراپ كەتكەن دەگەن قورتىندى بەردى. ءبىر سوزبەن ايتقاندا، جوبانىڭ بولاشاعى جوق دەدى.
ابىشيەۆ «Tengty Land» ج ش س يەسى بولدى. ولارعا سۋبسيديا دا تۇسكەن. سۋبسيديانى اۋىل شارۋاشىلىعى مينيسترلىگى بەرگەن. ولار سۋبسيدياعا نەسيەنىڭ ءبىر بولىگىن جابۋى ءتيىس ەدى. الايدا، دەپۋتات ابىشيەۆ جانە ونىڭ قاسىنداعىلار بىزدەن العان نەسيەنى دە، سۋبسيديانى دا جاپپاعان سوڭ، 2020 جىلى سوتقا جۇگىندىك. سوتتىڭ قاۋلىسى 2022 جىلدىڭ اقپانىندا شىقتى. قۇجاتتار جەكە سوت ورىنداۋشىلارىندا. ءبىراق، ابىشيەۆ نەسيە الاردا كەپىلگە قويعان مۇلكىن كەپىلدەن شىعارىپ العان. ونىڭ ەلتاي اۋىلدىق وكرۋگىندە تىركەلگەن كەپىلدەگى جەرىن قايتارىپ بەرگەن ورتالىق اپپاراتتاعى ادامدار جۇمىستان شىعارىلىپ، سوتقا تارتىلىپ جاتىر. ودان كەيىن ابىشيەۆ قانداي جوبالارعا قاتىسىپ، مۇلكىن كىمگە اۋدارتقانىن بىلمەيمىز. ءبىر سوزبەن ايتقاندا، ولاردان اقشانى قالاي قايتاراتىنىمىز بەلگىسىز. ول تەك بىزدەن اقشا الاتىن كەزدە ءوزىن كورسەتكەن. باسقا وبلىستاعى جوبالارعا ءوزى تىكەلەي قاتىسپايدى، ءوزىن كورسەتپەيدى. ويتەنى ءبىز وزگە ارىپتەستەرىمىزگە حابار بەرەمىز. سوندىقتان اقشا الاتىن باسقا دا جوبالارعا ءوزىنىڭ ادامدارىن كىرگىزىپ قويادى.
ءبىز ەكونوميكالىق تەرگەۋ سوتىنا ارىز بەردىك. ابىشيەۆ بەكەتتەن مەملەكەتتىڭ اقشاسىن ءوندىرۋ تۋرالى سوتتىڭ قاۋلىسى بار. ارى قاراي قىلمىستىق ءىس تاعى قوزعالۋ كەرەك، ويتكەنى بۇل مەملەكەتتىڭ قارجىسى. الماتى وبلىسىنداعى فيليال بويىنشا ەڭ ۇلكەن پروبلەما وسى ابىشيەۆ پەن ونىڭ قاسىنداعى ادامدارعا قاتىستى. اشىعىن ايتقاندا، بۇل مەملەكەتتىڭ اقشاسىن ۇرلاۋ. مەملەكەتتەن زاڭسىز الىنعان سۋبسيديانى انتيكور مەن ەكونوميكالىق تەرگەۋ دەپارتامەنتى ىزدەۋ كەرەك. قاراجاتتىڭ قايتارىلماۋى ءبىزدىڭ فيليالعا قيىندىق تۋدىرىپ وتىر»، – دەدى اگرارلىق نەسيە كورپوراسياسى الماتى وبلىستىق فيليالى ديرەكتورىنىڭ ورىنباسارى نۇرسۇلتان يسكەنوۆ.
نۇرسۇلتان يسكەنوۆ
شاعىم ايتقان كاسىپكەرلەردىڭ سوزىنشە، انتيكور دا، ەكونوميكالىق تەرگەۋ دەپارتامەنتى دە بۇعان دەيىن ءىس قوزعاعانمەن، بەلگىسىز سەبەپتەر ارقىلى جابىلىپ قالعان. رەداكسيا ق ر سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ اتىنا رەسمي ساۋالحات جولدادى. ال الماتى قالالىق پوليسيا دەپارتامەنتى دەپۋتاتتىڭ ۇستىنەن تەرگەۋدى جۋىردا باستاعان.
«الماتى قالالىق پوليسيا دەپارتامەنتى تەرگەۋ باسقارماسىنىڭ مالىمەتىنشە، اتالمىش دەرەك بويىنشا قازىرگى تاڭدا بەكەت ابىشيەۆكە قاتىستى الاياقتىق دەرەگى بويىنشا قىلمىستىق ءىس قوزعالىپ، سوت ەكونوميكالىق ساراپتاما تاعايىندالدى. قىلمىستىق ءىس ق ر قك 190-بابى بويىنشا قوزعالدى. ونىڭ قورتىندىسىن تەرگەۋشى ءوز قولىنا العاننان كەيىن ءتيىستى پروسەسسۋالدىق شەشىمدى قابىلدايتىن بولادى»، – دەدى الماتى قالالىق پد رەسمي وكىلى سالتانات ازىربەك.
دەرەككوز
