21 ساۋىردە "QANTAR قۇقىقتىق قولداۋ ورتالىعى" قورىنىڭ زاڭگەرلەرى پرەزيدەنت قاسىم-جومارت توقايەۆقا اشىق حات جازىپ، قاڭتار قىرعىنىن زەرتتەۋگە حالىقارالىق ساراپشىلاردى تارتۋعا ۇندەدى. ولار بۇعان قوسا، قۇقىق قورعاۋ ورگاندارىن اي سايىن قاڭتار وقيعاسى بويىنشا اشىلعان ءاربىر ءىس بويىنشا ەسەپ بەرۋگە مىندەتتەۋدى سۇرادى. قاڭتار قىرعىنى بويىنشا ءاربىر ازاپتاۋ، جارالانۋ جانە ادام ءولىمى فاكتىسىن اشىق، ءادىل، جىلدام تەرگەۋدى سۇرادى. بۇل جونىندە Vlast سايتى حابارلادى.
جيىن بارىسىندا زاڭگەرلەر قاڭتار قىرعىنى ءتيىستى دارەجەدە تاۋەلسىز ءارى اشىق زەرتتەلمەي وتىرعانىن العا تارتىپ، ازاپتاۋ فاكتىلەرى باياۋ ءجۇرىپ جاتقانىن جەتكىزدى. كەمىندە 238 ادامنىڭ ءومىرىن قيعان قاندى قىرعىن كەزىندە بەيبىت ازاماتتارعا وق اتقانداردىڭ ءالى كۇنگە دەيىن جاۋاپقا تارتىلماعانى ايتىلدى.
"قور جۇمىس ىستەگەن ءۇش ايعا جۋىق ۋاقىت ىشىندە ادۆوكاتتار وقيعالاردىڭ جالپى سيپاتىن انىقتادى. قۇقىق قورعاۋ جانە سوت ورگاندارى قاڭتار وقيعاسىنا قاجەتتى دارەجەدە رەاكسيا ءبىلدىردى دەپ ايتا المايمىز. ادۆوكاتتار قىلمىستىق ىستەردىڭ ءتيىستى دارەجەدە تەرگەلمەگەنىن ايتىپ وتىر. وق جاراقاتىمەن بايلانىستى ىستەردى مەملەكەتتىك ورگانداردىڭ بىر-بىرىنە سىلتەگەنى تۋرالى فاكتىلەر بار. ءىس ءبىر ورگاننان ەكىنشى ورگانعا جەتكەنشە دالەلدەر جوعالادى" دەدى ادۆوكاتتار توبىنىڭ ۇيلەستىرۋشىسى دانيار قانافين.
زاڭگەرلەر قاڭتار وقيعاسىنا بايلانىستى سوت پروسەستەرىن سوزباۋدى، باياۋ ءجۇرىپ جاتقان ازاپتاۋ ىستەرىن تەرگەۋدى جىلدامداتۋدى تالاپ ەتتى.
تالدىقورعاندا ءبىر وتباسىنان ءۇش ادامنىڭ وققا ۇشۋى جانە وتباسىمەن بىرگە كولىكتە وتىرعاندا اتقىلاۋعا ۇشىراعان ەر ادامنىڭ ءىسىن جۇرگىزىپ جاتقان ادۆوكات رينات بايبولدا قىلمىستىق ىستە قازا بولعاندار مەن جابىرلەنۋشىلەر بار بولعانمەن، ءالى كۇنگە دەيىن كۇدىكتى جوق ەكەنىن ايتتى.
– اسكەري-تەرگەۋ باسقارماسى ءىستى تەرگەپ جاتقانمەن ولارمەن بۇرىنعى ادىسپەن بايلانىس ورناتىپ وتىرمىز، سەبەبى ولار ءتىپتى ەلەكتروندى ۇكىمەت پورتالىندا دا جوق. كوپ شاعىمعا قاراماستان بىزدە جابىرلەنۋشىلەر مەن قازا بولعاندار بار دا، ءالى كۇنگە دەيىن كۇدىكتى جوق. قىلمىس جاسالدى، ال كىنالى جازالانا ما؟ زارداپ شەككەندەر، قازا بولعاندار، ونىڭ ىشىندە كىشكەنتاي بالا قانداي دا ءبىر ءقاۋىپ ءتوندىردى مە؟ - دەدى ادۆوكات رينات بايمولدا.
جيىن بارىسىندا قاڭتار وقيعاسى كەزىندە اۋىر جارالانىپ، اۋرۋحاناعا تۇسكەن، ىزىنشە اۋرۋحانادان ۇستاپ اكەتىلگەن قوساي ماحانبايەۆ ەسىمدى ەر ادام سويلەدى. ول 37 كۇن بويى تەرگەۋ يزولياتورىندا كورگەن ازابىن باياندادى.
"مەنىڭ ازاپتالۋىم بويىنشا ءىستى جاسىرعىسى كەلەدى. تەرگەۋ يزولياتورىنىڭ تىركەۋ جۋرنالىندا 13 قاڭتارعا دەيىنگى جازبالاردىڭ ءبىرى دە جوق، ابىر-سابىر كەزدە تىركەلمەي قالعان دەپ ايتىلادى. ءقازىر بارلىق اۋرۋحانانىڭ كامەرالارىنان ۆيدەولاردىڭ وشىرىلگەنى انىقتالدى. سەبەبى ولار تەك 15 كۇن عانا ساقتالادى دەيدى. ءبىزدى اۋرۋحانادان الىپ كەتكەننەن كەيىن دۇمبىمەن ۇرىپ-سوقتى، تەپتى، التى ورىندىق اۆتوزاكقا بىردەن 16 ادامدى تىقتى. سي-18 تەرگەۋ يزولياتورىندا بەتوندا جاتتىق. ەكىنشى قاباتتاعى مەدبيكەلەر ءبىزدى تەكسەرىپ، قانداي اۋىر حالدە جاتقانىمىزدى كوردى. ءبىراق ءقازىر ولار ەشتەڭە كورمەدىك دەپ جالعان كۋالىك بەرىپ وتىر. ءۇش كۇن اس-سۋ بەرمەي، اشتىقپەن قينادى، ازاپتاپ تەرگەدى. جەتى كۇن بويى سۋىق ەدەندە ماتراسسىز، جامىلعىسىز دالادا جاتقانداي جاتتىق. بىزگە مورالدىق قىسىم كورسەتتى. "تەرروريست، زورلىقشى" دەپ اتادى"، - دەدى ماحانبايەۆ.
جيىننان تەلەگرامدا بلوگەر الىشەر ەلىكبايەۆ ترانسلياسيا جاسادى. ول كاسىپكەر بولات ءابىلوۆتىڭ سوزىنەن ءۇزىندى كەلتىرەدى.
"قاڭتارداعى 200 ادامنىڭ ولىمىنە بايلانىستى بىردە-بىر كۇدىكتى جوق. ولار تاعى دا قانىشەرلەردى جاسىرعىسى كەلەدى، ۇستاپ بەرگىسى كەلمەيدى. ادامداردى تيرەدەن اتقانداي اتقان. قازا بولعان قىزدىڭ اكەسى رەسپۋبليكالىق بەس ارناعا سۇحبات بەرگەن، ءبىراق ەشقايسىندا شىقپاعان" دەدى كاسىپكەر.
اقپاراتقا قاراعاندا، "Qantar قۇقىقتىق قولداۋ ورتالىعى" قورىن قازاقستاندىق كاسىپكەرلەر مەن قوعام بەلسەندىلەرى قۇرعان. قور اياسىندا 26 ادۆوكات قاڭتار وقيعاسىنا بايلانىستى 55 ءىستى جۇرگىزىپ جاتىر.
- قاڭتار وقيعاسى كەزىندە جانە ودان كەيىن مىڭداعان ازامات ۇستالىپ، جۇزدەگەن ادامعا "تەرروريزم"، "جاپپاي تارتىپسىزدىك ۇيىمداستىرۋ"، "زاڭسىز قارۋ-جاراق ساقتاۋ" سەكىلدى ايىپتار تاعىلدى. قاماۋدا بولعانداردىڭ اراسىندا ازاپتالعانىن ايتىپ شاعىمدانعاندار كوپ، ءبىراق ولاردى ازاپتاۋ فاكتىسى بويىنشا ۇستالعاندار نەكەن-ساياق.
- قاڭتاردىڭ باسىندا ەلدە سۇيىتىلعان گاز باعاسىنىڭ قىمباتتاۋىنا بايلانىستى ميتينگ ءوتىپ، نارازىلىقتىڭ سوڭى قانتوگىسكە ۇلاسقان. رەسمي دەرەك بويىنشا، 230 ادام قازا بولدى. قازا تاپقاندار اراسىندا كۇشتىك قۇرىلىمنىڭ 19 قىزمەتكەرى بار. بۇعان قوسا، قاڭتار وقيعاسىنا بايلانىستى ۇستالعان تاعى سەگىز ادامنىڭ تەرگەۋ يزولياتورىندا كوز جۇمعانى حابارلاندى. بيلىك وپات بولعانداردىڭ ەسىمىن جاريالامادى. حالىقارالىق ۇيىمدار قاڭتار وقيعاسىن حالىقارالىق ساراپشىلاردىڭ كومەگىمەن زەرتتەۋگە ۇندەگەنمەن نۇر-سۇلتان ۇسىنىستى كەرى قايتارعان.
