الايدا ۇقك ەكس-توراعاسىنىڭ اعىمداعى پروسەسسۋالدىق مارتەبەسى بەلگىسىز. ەگەر سوت بولماسا، ءماسىموۆتى بوستاندىققا شىعارۋ كەرەك، – دەپ جازادى ۇقك-نىڭ بۇرىنعى ءتوراعاسىن قولداۋعا قۇرىلعان karimmassimov.com توبى.
«وسى ۋاقىتقا دەيىن ءماسىموۆ ۇقك تەرگەۋ يزولياتورىندا بولعانى بەلگىلى. ونىڭ قۇقىقتىق مارتەبەسى تۋرالى اقپارات جوق. قاماۋعا الۋدى ۇزارتۋ تۋرالى سوت بولدى ما، الدە مۇنداي سوت بولعان جوق پا قوعامعا حابارلانباعان. بارلىق اقپارات قۇپيا ساقتالىپ تۇر» دەلىنگەن حابارلامادا.
ماسىموۆكە قانداي ايىپ تاعىلدى؟
ماسىموۆكە مەملەكەتكە وپاسىزدىق جاسادى، بيلىكتى كۇشتەپ باسىپ الۋعا ارەكەتتەندى جانە قىزمەتتىك وكىلەتتىگىن اسىرا پايدالاندى دەگەن ايىپ تاعىلدى. قىلمىستىق ءىس ءالى تەرگەلىپ جاتىر.
ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ءماسىموۆ قىلمىستىق كودەكستىڭ 175-بابى 1-بولىگى بويىنشا «مەملەكەتكە وپاسىزدىق جاسادى» دەگەن كۇدىكپەن قاڭتار ايىنىڭ باسىندا ۇستالعان بولاتىن.
ءماسىموۆتىڭ قانداي دۇنيەلەرى تاركىلەندى؟
ۇقك تەرگەۋ بارىسىندا كارىم ءماسىموۆتىڭ ارەكەتىندە كوپتەگەن سىبايلاس جەمقورلىق بەلگىلەرى انىقتالعانىن ايتتى.
«وتاندىق بيزنەس وكىلدەرىنەن جانە شەتەلدىك قۇرىلىمداردان جىلجىمايتىن مۇلىكتى، قىمبات سىيلىقتاردى، ونىڭ ىشىندە مادەني قۇندىلىقتاردى، قوماقتى قاراجاتتى زاڭسىز الۋ فاكتىلەرى قۇجاتتالعان. اتاپ ايتقاندا، ءماسىموۆتىڭ پارا الۋ فاكتىسى بويىنشا تەرگەۋ جۇرگىزىلۋدە. ول ۇقك ءتوراعاسى رەتىندە شەت مەملەكەت وكىلدەرىنەن 2 ملن دوللار پارا العان. جابىق كەلىسىم-شارتى بويىنشا گونكونگتان قازاقستان ۇلتتىق بانكىنە بۇل قاراجاتتى قايتارۋ قامتاماسىز ەتىلدى» دەلىنگەن حابارلامادا.
سونداي-اق ءماسىموۆتىڭ پرەمەر-مينيستر بولىپ تۇرعان كەزىندە بيزنەس قۇرىلىمدارىنىڭ بىرىنەن ەلوردادا قۇنى 2،5 ملرد تەڭگەگە جۋىق ەليتالىق قوناق ءۇي مەن جەر تەلىمىن العانى بويىنشا دا تەرگەۋ باستالدى، دەپ تولىقتىردى كوميتەت.
«2022 جىلدىڭ قاڭتارىندا ءماسىموۆ ۇستالعاننان كەيىن بۇل قوناق ۇيدەن 17،2 ملن دوللار قولما-قول اقشا تاركىلەندى. سونىمەن قاتار كوپتەگەن قۇندى زاتتار – ساعاتتار، التىن قۇيمالار، انتيكۆاريات جانە ت. ب. تاركىلەندى. نۇر-سۇلتانداعى ەكى ليۋكس پاتەرى، الماتىداعى ەكى پاتەرى مەن ءزاۋلىم سارايى، سونداي-اق شورتاندى-بۋراباي كۋرورتتىق ايماعىنداعى كول جاعاسىنداعى 1 گەكتار جەر ۋچاسكەسى تاركىلەندى. ءماسىموۆتىڭ جاقىن ادامدارىنىڭ 5،1 ملن دوللارعا باعالانعان مۇلكى تاركىلەنىپ، ولار دا قاماۋعا الىندى» دەپ تولىقتىردى باسپا ءسوز قىزمەتى.
ءماسىموۆ پەن ونىڭ اينالاسىنداعىلاردىڭ شەتەلدىك بانكتەردەگى ەسەپشوتتارىنا زاڭسىز الىپ كەتكەن بۇدان دا ءىرى كولەمدەگى قاراجاتتى ىزدەۋ، بۇعاتتاۋ جانە قازاقستانعا قايتارۋ جۇمىستارى ۇيىمداستىرىلىپ جاتقانى حابارلاندى.
وسى فاكتىلەردىڭ بارلىعى بويىنشا بەلسەندى تەرگەۋ جانە جەدەل-ىزدەستىرۋ شارالارى جۇرگىزىلىپ جاتىر.
دەرەككوز
