ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

فيلارمونيا ارداگەرلەردى جۇمىستان قۋىپ جاتىر

28 قاڭتار 2022 122
الماتى وبلىستىق ءسۇيىنباي اتىنداعى فيلارمونيا قىزمەتكەرلەرى جۇمىستارىنان قۋىلىپ جاتىر. بۇل تۋرالى بەلگىلى ەرلى-زايىپتى انشىلەر قانات پەن ايتگۇل قۇدايبەرگەنوۆتەر الەۋمەتتىڭ جەلىدەگى پاراقشالارىندا جازدى. ولار:



 

"قۇرمەتتى حالايىق، ارمىسىزدار! ءبىز الماتى وبلىستىق ءسۇيىنباي اتىنداعى فيلارمونياسىندا 45 جىلعا جۋىق جۇمىس ىستەپ كەلەمىز. ەڭبەگىمىز ەلەنىپ مەمەلەكەتتىك ماراپات تا الدىق. ەندى وبلىستىق مادەنيەت باسقارماسى مەن فيلارمونيا باسشىلارى ءبىزدى جۇمىستان شىعىپ، كيەلى ساحنانى بوساتىڭدار دەگەن تالاپ قويىپ وتىر. سىزدەردىڭ پىكىرلەرىڭىز قاجەت بولىپ تۇر. نۇرعالي اعامىز، بيبىگۇل اپايىمىز، باسقادا ساحنا ساڭلاقتارى ءالى كۇنگە دەيىن ءوز ۇجىمدارىندا جۇمىس ىستەپ ونەرلەرىن پاش ەتىپ ءجۇر. فيلارمونيامىزدا بار-جوعى 4-5 رەسپۋبليكاعا ەڭبەك سىڭىرگەن ونەر قايراتكەرلەرى بارمىز، ءبارىمىزدى زەينەتكەر دەپ ساحنادان قۋىپ شىعۋ ادىلدىك پە؟ كەيىنگى ونەرلى جاستارعا وبلىسىمىزدىڭ ماقتان تۇتار بەتكەۇستار ونەر تارلاندارى دەپ ۇلگى ەتۋدىڭ ورنىنا ساحنادان كەتىڭدەر دەگەنى قانشالىقتى دۇرىس دەپ ويلايسىزدار؟ ءبارىمىزدىڭ كاسىبي دەڭگەيىمىز جوعارى. فونوگرامما دەگەندى قولدانبايمىز، ساعاتتاپ ءان سالىپ، كۇي تارتۋعا بارمىز حالىق ءۇشىن" دەپ جازىپتى.

ال ۇلجان ايناقۇلوۆا دا ءوزىنىڭ ۇزاق جىل ەڭبەك ەتكەن قاراشاڭىراعىنان قۋىلىپ جاتقانىن ايتىپ، جانايقايىن ءبولىسىپتى. ول "ءسۇيىنباي فيلارمونياسىندا ديرەكتور ءىنىم "ۋپراۆلەنيەدەن (جوعار جاقتان) پەنسياداعىلار جۇمىستى بوساتسىن دەپ جاتىر ، 4-5 كۇندە ورىندالۋ كەرەك !" دەدى. قانات، ايتكۇل قۇدايبەرگەنوۆتەردە بار. جارتى ستاۆكىدە ەدىك، ونىدا كوپ كوردى مە؟! ونەر ادامىن تەك ونەر ادامى تۇسىنەدى! ۇجىمدا 38 ءانشى بار ەكەن، ءتىزىمىن كورەرمەنگە كورسەتەر بولسا ، كوپ بولسا 7-8 ءانشىنى تانىر. مەن ارىپتەستەرىمە ، جاستارعا توپىراق شاشپايمىن! ءبىز ءبىر ءان ايتساق تا حالىقتى جاندىرا الاتىن اللادان بەرگەن ونەرىمىز بار. ءبىزدىڭ ءوز ورنىمىز، سالماعىمىز بار ونەرپازدار ەمەسپىز بە؟! ونەردەن حابارى جوق، ادامشىلىق قىلىعى جوق، جۇرەگى مۇلدەم جوق مادەنيەت باسشىسىنا نە دەيىك؟! ال كەيبىر تىرەۋى بار زەينەتكەر 1 جارىم ستاۆكىدەدە ىستەي بەرەدى. زاڭ نەگە بارىنە بىردەي ەمەس؟!" دەپ جازدى. 

ونەرگە جاستاردىڭ كەلگەنى دۇرىس. ءبىراق اعابۋىن ونەرپازداردىڭ جاستارعا ۇلگى كورسەتىپ جۇرگەندەرى قاي سالادا بولسىن ارتىق بولماس. 

ەرمەك كەمەش ۇلى 
بۇل ماقالا تۋرالى نە ويلايسىز؟