ەۋروپا وداعى ۋكرايناعا اسكەري جويعىش ۇشاقتارىن كومەككە بەرەدى. بۇعان دەيىن كييەۆ رەسەيدىڭ جەردەگى جانە ۋەدەگى شابۋىلىنا تويتارىس بەرۋ ءۇشىن ەۋروپا وداعىنان كومەك سۇراعان.
بۇل جونىندە 27 اقپاندا ەۋروپا وداعىنىڭ سىرت ساياسي ۆەدومستوۆوسىنىڭ باسشىسى جوزەپ بوررەل حابارلادى. ول بريۋسسەلدىڭ ۋكرايناعا مەيلىنشە كومەكتەسۋگە دايىن ەكەنىن اتاپ وتكەن.
بوررەلل سوزىنشە، رەسەي ۋكرايناعا قولداۋ كورسەتكەن ەلدەرگە يادرولىق قارۋ قولدانۋى مۇمكىن ەكەنىن انىق اڭعارتقان.
"ۆلاديمير پۋتين ۋكراينا سولداتتارىن قارۋلارىن تاستاۋعا شاقىردى جانە ۋكرايناعا كومەكتەسكىسى كەلەتىن ەلدەرگە قاراتا "كىمدە-كىم بىزگە كەدەرگى جاساعىسى كەلسە، رەسەيدىڭ جىلدام جاۋاپ بەرەتىنىن جانە ونىڭ بۇرىن-سوڭدى تاريحتا بولماعان زاردابىن تارتاتىنىن" ايتتى. ءپۋتيننىڭ جەكسەنبىدەگى سوزىنە وراي سويلەگەن بوررەل اڭگىمە يادرولىق قارۋ تۋرالى ەكەنىن، ءبىراق ول ەۋروپا وداعىنىڭ ۋكرايناعا كومەگىن توقتاتا المايتىنىن ايتقان.
ۋكراينا سىرتقى ىستەر ءمينيسترى دميتريي كۋلەبا ەۋروپا وداعىنىڭ باسشىلىعىنان ۋكراين ۇشقىشتارى باسقاراتىن اسكەري جويعىش ۇشاقتارعا ءزار بولىپ وتىرعانىن ايتقان. وسىعان وراي «نەمىس تولقىنى» ۋكراينا قارۋلى كۇشتەرىندە جويعىش ۇشاقتىڭ سوۆەتتىك سۋ-27 جانە ميگ-29 تۇرلەرى بار ەكەنىن ەسكە سالعان.
جەكسەنبىدە جوزەپ بوررەل ەۋروپا بلوگىنىڭ اتىنان سويلەگەن سوزىندە رەسەيدىڭ ۋكرايناعا باسىپ كىرۋى گرۋزيا، مولدوۆا، باتىس بالقان ەلدەرىنە دا اسەر ەتۋى مۇمكىن دەدى.
27 اقپاندا ەۋروپا وداعى ەلدەرىنىڭ سىرتقى ىستەر مينيسترلەرى كەزدەسۋىنەن كەيىن رەسەيگە قاتاڭ سانكسيا سالۋعا كوشەتىنى حابارلانعان. ەۋرو كوميسسيا باسشىسى ۋرسۋلا فون دەر ليايەن سوزىنشە، ەۋروپا وداعى ۋكرايناعا قارۋ-جاراق پەن وزگە دە تەحنيكالىق قۇرالدار ساتىپ الۋ، جەتكىزۋدى قارجىلاندىرادى. فون دەر ليايەن ەۋروپا وداعىنىڭ مۇنداي قادامعا العاش رەت بارىپ وتىرعانىن اتاپ ءوتتى.
جەكسەنبى كۇنى Bloomberg اگەنتتىگى ەۋروپا وداعى ءپۋتيننىڭ اينالاسىندا جۇرگەن رەسەي شەنەۋنىكتەرى مەن وليگارحتارىنىڭ تاعى ءبىر توبىنا سانكسيا سالۋى مۇمكىن ەكەنىن جاريالاعان ەدى. Bloomberg مالىمەتىنە قاراعاندا بۇل تىزىمگە الىشەر ۋسمانوۆ، ميحايل فريدمان، الەكسەي مورداشوۆ، دميتريي پەسكوۆ جانە سەرگەي رولدۋگين كىرۋى مۇمكىن.
