بۇگىن ءماجىلىس ءتوراعاسى ەرلان قوشانوۆ كونستيتۋسيادان ەلباسىنىڭ مارتەبەسى مەن ارتىقشىلىعى تۋرالى باپتار الىنىپ تاستالعانىن ءتۇسىندىردى.
«كونستيتۋسيادا تەك قانا مەملەكەتتىڭ نەگىزىن قالاۋشى دەگەن تاريحي ءرولى عانا قالادى. سوندىقتان كونستيتۋسيا قابىلدانعاننان كەيىن، تۇڭعىش پرەزيدەنت تۋرالى كونستيتۋسيالىق زاڭ دا كۇشىن جويادى دەپ كۇتىلۋدە» دەدى قوشانوۆ.
ەندى نۇرسۇلتان نازاربايەۆقا قاتىستى ەكس-پرەزيدەنت تۋرالى نورما قولدانىلادى. بۇگىندە بۇل نورما كونستيتۋسيادا دا، پرەزيدەنت تۋرالى زاڭدا دا بار. ەرلان قوشانوۆ كونستيتۋسيادان ەلباسى دەگەن ءسوز الىنىپ تاستالعانىن ءتۇسىندىردى. بۇل رەتتە ءماجىلىس ءتوراعاسى ەكس-پرەزيدەنت تۋرالى نورما نازاربايەۆقا قانداي قۇقىق پەن قۇزىرەت بەرەتىنىن ناقتىلاپ ءوتتى.
«بىرىنشىدەن، ار-نامىسى مەن ابىروي-بەدەلىن قورعاۋعا قۇزىرەت بەرەدى. ەكىنشىدەن، الەۋمەتتىك جاعىنان قورعاۋ، ياعني زەينەتاقىسى، كولىگى، كۇزەتى بار. وسى ماسەلەلەر مەملەكەت تاراپىنان رەتتەلەدى» دەدى ءماجىلىس ءتوراعاسى.
جاڭا كونستيتۋسيالىق زاڭ بويىنشا نازاربايەۆتى ۇستاۋعا، قاماۋعا، تىنتۋگە، ودان جاۋاپ الۋعا نە جەكە باسىن جەتە تەكسەرۋگە، كۇزەتپەن ۇستاۋعا بولمايدى.
سونىمەن قاتار، ەلباسى مەن ونىمەن بىرگە تۇراتىن وتباسى مۇشەلەرىنە تيەسىلى بارلىق جەكە مۇلىككە تيىسۋگە جانە شەكتەۋ قويۋعا بولمايدى.
دەرەككوز
