گازەتىمىزدىڭ وتكەن سانىندا دا حابار ايتىپ ەدىك: اقمولا گۋبەرناسىندا 15 اۆگۋستان قالدىرماي گۋبەرنالىق ريەۆكوم تاراتىلىپ، بولىستىق، ويازدىق ءھام گۋبەرنالىق يسپولكومدار قۇرىلماق بولدى. ەكىنشى ءتۇرلى ايتقاندا، گۋبەرنامىزدىڭ بارلىق ءىسى جوعارىدان بەلگىلەنىپ، ۋاقىتشا وتىرعان ادامداردىڭ قولىنان الىنىپ، ەلدىڭ ءوزى بىلەتىن، ءوزى سەنەتىن، ءوزى سايلاعان ادامداردىڭ قولىنا تاپسىرىلماق.
تەگىندە ۇعۋ كەرەك: سوۆەتتىڭ نەگىزگى زاڭى بويىنشا، جالپى روسسيا رەسپۋبليكاسىنىڭ ءھام رەسپۋبليكاداعى ءاربىر اۋداننىڭ توپ يەسى، انىق قوجاسى ريەۆكومدار ەمەس، يسپولكومدار، ريەۆكوم - توڭكەرىس كوميتەتى دەگەن ءسوز. ونىڭ ماعىناسى – ءار جەر توڭكەرىس بولىپ، جاۋدان جاڭا الىنسا، ياكي سول جەردە اياق استىنان ءبىر كۇشتى كوتەرىلىس شىعىپ قالسا، مىنە وسى سياقتى ىستەردىڭ ارتىنان توڭكەرىس كوميتەتى، ياعني ريەۆكوم قۇرىلماق. مۇندايدا ۋاقىت تا، ءىس تە تىعىز بولعاندىعىنان ريەۆكوم مۇشەلەرىن ەل سايلامايدى، جوعارعى وكىمەت بەلگىلەپ قويادى. ءبىر جەردە توڭكەرىس ياكي كوتەرىلىستەن كەيىن بولاتىن جۇگەنسىزدىكتەردى جونگە سالۋ ءۇشىن جوعارعى ايتىلعان تۇردە قۇرىلاتىن ريەۆكوم، ارينە، ناعىز قولايلى مەكەمە. ءبىراق ريەۆكوم مۇشەلەرى جوعارىدان، كوبىنەسە، شەت جەر ادامدارىنان بەلگىلەنەتىن بولعاندىقتان، مۇشەلەر جەرگىلىكتى تۇرمىسپەن جاقسى تانىس بولماي، كەي ۋاقىت جەرگىلىكتى ەلگە جاعدايسىز ىستەر ىستەپ تاستاۋى مۇمكىن. جانە ادامنىڭ ءبارى اۋليە ەمەس، كەي مۇشەلەر توڭكەرىس كوميتەتىندە وتىرعان سوڭ توڭكەرىس جولىمەن ەلگە كۇشتى تورەلىك، ورىنسىز اكىمدىك كورسەتىپ جىبەرۋلەرى دە ىقتيمال.
ال ەندى يسپولكوم قانداي مەكەمە، بۇعان مۇشەلەردى كىم سايلايدى؟ جاۋابى مىناۋ: يسپولكوم جوعارىدان جاسىرىپ بەرەتىن مەكەمە ەمەس، ەلدىڭ ءوزى قۇراتىن مەكەمە، ءھام ونىڭ مۇشەلەرىن ەل جيىلىس قىلىپ ءوزى سايلاماق. جاقىن بولسىن، جات بولسىن ەل ءوزى بىلەتىن، ءوزى سەنەتىن ادامداردان سايلاماق. جوعارىدا يسپولكوم ەلدىڭ ءتۇپ يەسى دەگەنىمىزدىڭ ءمانىسى وسى.
بيىل اقمولا گۋبەرناسى قازاقستان رەسپۋبليكاسىنا كوشكەن سوڭ، ءتۇرلى تولقىندى سەبەپتەرمەن ءبىزدىڭ گۋبەرنامىزدا ريەۆكوم دا قۇرىلىپ ەدى. بولىستىق، ويازدىق ءھام گۋبەرنالىق. بۇل كۇندە گۋبەرنامىزدا ريەۆكومدار قۇرىلۋعا سەبەپشى بولعان جاعدايلار جايلاندى. تولقىندار باسىلدى. سوندىقتان ۋاقىتشا قوجا ريەۆكومدار تاراتىلىپ، تۇپكىلىكتى يسپولكومدار سايلانايىن دەپ وتىر.
اقمولا گۋبەرناسىنىڭ قازاعى! وزىڭە قولايلى، جاعدايلى مەكەمە كەرەك بولاتىن بولسا، ەرتە كۇننەن دايارلانىپ، كۇنىڭە، شارۋاڭا پايدا كەلتىرەر دەگەن ازاماتتارىڭدى كىرگىزىپ، مىنا يسپولكومدارىڭدى سايلاپ ال. ءىس باسىندا جۇرگەندەر ءاربىر ءاۋ دەگەندەرىن ىستەپ، ءوز ادامدارىن سايلاپ قويادى، بىزگە تىزگىن بەرمەيدى دەپ قاراداي قاجۋعا ورىن جوق. روسسيا رەسپۋبليكاسىندا بارلىق ءىستى جۇرگىزىپ وتىرعان كوممۋنيست (بولشيەۆيك) پارتياسى بيىل جازعىتۇرىم بولىپ وتكەن 10-جيىلىسىندا بۇدان بىلاي ءىس باسىنا كوممۋنيست پارتياسىندا بولماعان ادامدار دا كىرۋى مۇمكىن، مۇمكىن ەمەس، كىرسىن؛ بولماسا ياعني پارتيادا بولماعان ەلگە سەنىمدى ادامدار ءىس باسىنا وتىرماسا، مەملەكەت ءىسىن جاقسى الىپ بارارعا بولمايدى دەپ قاۋلى شىعارىپ وتىر. مىنە، وسى ءسوز – ءسوز. جەرگىلىكتى جولداستاردىڭ بۇل ءسوزدى اڭداپ وقىپ، ەندى بيلىككە سالۋلارى مۇمكىن ەمەس، سوندىقتان يەڭدى تاپ، يە تاپقاندا، كىم بولسا و بولسىن، پايدالىسىن، ادالىن تاپ.
بۇرىنعى اۋرۋلارى ازداي-اق سوڭعى بىر-ەكى جىل ىشىڭدە ءبىزدىڭ ەل تاعى ءبىر اۋرۋ جاماپ الدى. پىسىقشا ءبىر ادام ءبىر جينالىستا دەلەگات بولىپ سايلانادى. جينالىستا بولىپ، سايلاعان ەلدىڭ جاي-كۇيىن ايتىپ ەلگە پايدالى ءىس ەتەيىن دەگەن ويمەن ەمەس، جۇمىسقا ايداماسىن، لاۋ تارتقىزباسىن دەگەن سىقىلدى ۇساق ويلارمەن. وسىنداي پىسىقشالاردىڭ ەلگە كەلتىرگەن زيانى از ەمەس. سايلانىپ تۇرىپ بارماي قالىپ، تالاي جيىلىستا قازاق دەلەگاتىنىڭ سانى از بولىپ، قازاق وسى تالاي ۇتىلىپ ءجۇر.
ەل سەنى ادام دەپ سايلاعان سوڭ ەرىنبەي جيىلىسقا بارىپ، ەلگە پايدالى ادامداردى سايلاپ، جاعدايلى مەكەمە قۇرىپ بەر. پالەن-تۇگەندەر «تورە» بولىپ الىپ، قيىنداپ بارادى دەپ زارلايسىڭدار. قۇر كوز جاسىمەن نە بىتكەن؟ الما ءوزى اۋىزعا قاشان تۇسكەن؟ تۇگەندەردىڭ تورە بولماۋى، ەل، ءوزىڭنىڭ كولىڭدا. ەل، دايارلان. تۇپكىلىكتى يسپولكومدارىڭدى سايلاپ ال.
ماعجان جۇمابايەۆ،
«سايلاۋ» ماقالاسىنان
دەرەككوز: ماعجان جۇمابايەۆ. شىعارمالارى (ادەبي باسىلىم). 2 توم، - الماتى، 2013
Alash.kz ۇلتتىق پورتالى
