ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ەكى اي ەرەۋىلدەتىپ تۇرعان جاڭاوزەندىك جۇمىسسىزدار قىسىم جاسالعانىنا شاعىمدانادى

28 ناۋرىز 2022 109
[ad_1]



جاڭاوزەن اكىمدىگىنىڭ الدىندا ەكى اي بويى جينالىپ جۇمىس تالاپ ەتكەندەر ورگاندار تاراپىنان قۋدالاۋعا ۇشىراعاندارىن ايتادى. ءقازىر الاڭدا ەكى ادام قالعان. بۇل تۋرالى ازاتتىققا عاليا جاناسپايەۆا حابارلادى. سوزىنشە، ونى 24 ناۋرىزدا جاڭاوزەن پوليسياسىنا شاقىرىپ، ءتورت ساعات تەرگەگەن.

- مەنى ەكى ايلىق جۇمىسسىزدار ەرەۋىلىنىڭ ۇيىمداستىرۋشىسى، الاۋىزدىق تۋدىرۋشى دەپ ايىپتادى. ەگەر تاعى ەرەۋىلگە شىعاتىن بولسام ءبىر جىلعا اباقتىعا قامالاتىنىمدى ايتتى. ەشقانداي قاعازعا قول قويمادىم، ءبىراق ەرەۋىلگە شىقپاۋعا ۋادە بەرە المايتىنىمدى ايتتىم. ويتكەنى بالالارىم ءالى جۇمىسسىز، - دەدى ول ازاتتىققا.

عاليا جاناسپايەۆانىڭ ايتۋىنشا، 25 ناۋرىزدا قالا بيلىگى الاڭدا جۇمىس تالاپ ەتىپ تۇرعانداردى ەكى توپقا ءبولىپ، ايەلدەرگە ءبىر بولەك، ەرلەرگە بولەك جينالىس وتكىزگەن. وعان قاتىسقانداردىڭ ايتۋىنشا، جينالعاندارعا نارازىلىقتارىنىڭ زاڭسىزدىعىن ەسكەرتىپ، جۇمىس تاۋىپ بەرۋگە ۋادە بەرگەن. مۇنى ازاماتتىق بەلسەندى جادىرا دۇيسەكەيەۆا دا راستادى.

- مەن جينالىس بولعان جەرگە كەلگەنىمدە مەنى وعان قاتىستىرمادى. سەبەبى مەن سول جەردەن تىكەلەي ەفير جۇرگىزىپ، الەۋمەتتىك جەلىدە جاريالايمىن. ول ەشكىمگە ۇنامايدى. ءقازىر تالاپتى سوڭىنا دەيىن جەتكىزۋ ءۇشىن الاڭعا امانگۇل ەسىمدى بەلسەندi ەكەۋمىز بارىپ ءجۇرمىز، - دەيدى جادىرا دۇيسەكەيەۆا.

ءبىراق جاڭاوزەن قالاسى اكىمى بۇل جينالىسقا اكىمدىكتىڭ قاتىسى جوقتىعىن ايتادى.

بۇعان دەيىن جاڭاوزەندە وننان استام ادام پوليسياعا شاقىرىلىپ، ولارمەن "پروفيلاكتيكالىق اڭگىمەلەسۋ" بولعان ەدى.

جاڭاوزەندەگى جۇمىس تاۋىپ بەرۋدى تالاپ ەتكەن جۇمىسسىزدار ەرەۋىلى ەكى ايدان بەرى جالعاسىپ جاتىر. نارازىلاردىڭ بىرنەشەۋى "بيلىك تۇراقتى جۇمىس ورنىن اشۋ تالابىمىزعا نازار اۋدارمادى" دەپ 15-18 ناۋرىز ارالىعىندا اشتىق تا جاريالاعان.

جۇمىسسىزدار ايتۋىنشا، بيلىك ءىس جۇزىندە 300 ادامعا جۇمىس بەرگەن. 150 جۇمىس ورنىنا الەۋمەتتىك جاعدايى وتە ناشار جانە مۇگەدەك جاندارى بار وتباسىلاردىڭ مۇشەلەرى ورنالاسقان.

- كەيىنگى اقپاراتقا قاراعاندا تاعى 70 ادامدى جۇمىسقا ورنالاستىرۋعا ۋادە بەردى. ءبىراق تۇراقتى جۇمىس ورنىن مۇناي سالاسىنان اشۋ دەگەن باستى تالاپ ورىندالمادى. تەك اشتىق جاريالاپ، ەرەكشە بەلسەندى نارازىلىق بىلدىرگەندەردى مۇناي كاسىپورىندارىنا جۇمىسقا ورنالاستىرۋعا تىرىسىپ جاتىر، - دەدى مارات ەسىمدى ەرەۋىل قاتىسۋشىلارىنىڭ ءبىرى.

جاڭاوزەن قالاسى اكىمى ماقسات يباعاروۆتىڭ ازاتتىققا ايتۋىنشا، ءقازىر 380 ادام جۇمىسقا ورنالاستىرىلعان. ول تاعى 70 شاقتى ادامنىڭ وسى اپتا سوڭىنا دەيىن جۇمىسقا شىعاتىنىن ايتىپ، جۇمىسسىزدارعا جۇمىس تابۋ جالعاسىپ جاتقانىن مالىمدەدى.

جۇمىسسىزداردىڭ ەكى ايعا سوزىلعان ەرەۋىلىنە 25 ناۋرىزدا ماڭعىستاۋ وبلىسى پروكۋرورى جەرگىلىكتى باسپا ءسوز ارقىلى رەاكسيا ءبىلدىردى. ماڭعىستاۋ وبلىسىنىڭ باس پروكۋرورى ەرلان ابايەۆ وبلىستاعى ەڭبەك داۋىنان تۋىنداعان ستيحيالىق ەرەۋىل جيىلەپ كەتكەنىن ايتىپ، سوت زاڭسىز دەپ تانىعان ەرەۋىلگە قاتىسۋشىلاردىڭ جازالاناتىنىن ەسكەرتكەن.



[ad_2]

دەرەككوز
بۇل ماقالا تۋرالى نە ويلايسىز؟