ماسكەۋدىڭ وستانكينو سوتى ءبىرىنشى ارنا رەداكتورى مارينا وۆسياننيكوۆاعا "زاڭسىز نارازىلىق اكسياسىنا شاقىرعانى ءۇشىن" 30 مىڭ رۋبل كولەمىندە ايىپپۇل سالدى.
وۆسياننيكوۆا 14 ناۋرىزدا كەشكە "ۆرەميا" جاڭالىقتار باعدارلاماسىنىڭ تىكەلەي ەفيرى بولىپ جاتقاندا ستۋديادا وتىرعان ديكتوردىڭ قاسىنا اتىپ شىعىپ، "سوعىستى توقتاتىڭىزدار. پروپاگانداعا سەنبەڭىزدەر. بۇل جەردە سىزدەردى الداپ جاتىر" دەگەن پلاكات ۇستاپ تۇردى. ول ديكتور سويلەپ جاتقاندا "سوعىستى توقتاتىڭىزدار! سوعىسقا جول جوق!" دەپ قارسىلىق ءبىلدىردى. "پەرۆىي كانال" وسى جايتقا بايلانىستى تەكسەرىس باستاعان، ارتىنشا وۆسياننيكوۆانىڭ ۇستالىپ، ۇستىنەن اكىمشىلىك ءىس قوزعالعان دەگەن حابار شىقتى.
سوت وتىرىسىنان "مەديازونا" ترانسلياسيا جۇرگىزدى. سۋديا اننا بولوتنيكوۆانىڭ ايتۋىنشا، پوليسيا "ينتەرنەت مونيتورينگ كەزىندە" ءجۋرناليستىڭ جۇرتتى "نارازىلىق اكسياسىنا شاقىرعان" ۆيدەوسىن تاپقان. جۋرناليست تاعىلعان ايىپپەن كەلىسپەدى.
اقپاراتقا قاراعاندا، جۋرناليست ءبىرىنشى ارنا ەفيرىنە شىقپاي تۇرىپ ۆيدەومالىمدەمە جاساعان. ۆيدەونىڭ سوڭىندا ءتىلشى "ميتينگىگە شىعىڭىزدار" دەيدى. ۆيدەوروليكتە ول ۇگىت-ناسيحاتقا ارالاسقانىن العا تارتىپ، سول ىسىنە وكىنەتىنىن ايتادى.
"2014 جىلى باستالعان كەزدە ءبارىمىز ءۇنسىز قالدىق. كرەمل ناۆالنىيعا ۋ بەرگەن كەزدە ميتينگىگە شىققان جوقپىز. ءبىز انتيگۋماندى رەجيمدى ءۇنسىز باقىلادىق. ءقازىر بىزدەن بۇكىل الەم تەرىس اينالدى. بىزدەن كەيىن ون بۋىن اۋىسسا دا، مىنا ماسقارادان ارىلا المايدى. ءبىز، ورىس حالقى، ويلى، اقىلدىمىز. بۇل باسسىزدىقتى توقتاتۋ تەك ءبىزدىڭ قولىمىزدان عانا كەلەدى. ميتينگىگە شىعىڭىزدار، ەشتەڭەدەن قورىقپاڭىزدار، ولار ءبىزدىڭ ءبارىمىزدى وتىرعىزا المايدى" دەدى ءتىلشى.
جۋرناليست 14 ناۋرىزدا اكسيادان كەيىن "وستانكينو" تەلەورتالىعىندا ۇستالعان. ونىڭ قايدا ەكەنى ۇزاق ۋاقىت بەلگىسىز بولدى. مەملەكەتتىك تاسس اگەنتتىگىنىڭ دەرەككوزى ناۋرىز باسىندا كۇشىنە ەنگەن ارميانىڭ بەدەلىنە نۇقسان كەلتىرۋ تۋرالى قىلمىستىق باپ بويىنشا تەرگەۋگە دەيىنگى تەكسەرىس جۇرگىزىپ جاتقانىن حابارلاعان. ول بويىنشا جۋرناليسكە 10 جىل تۇرمە جازاسى بەرىلۋى مۇمكىن.
