سارسەنبى كۇنى جۋرناليستەردىڭ سۇراقتارىنا جاۋاپ بەرگەن اقش پرەزيدەنتى دجو بايدەن رەسەي باسشىسى ۆلاديمير ءپۋتيندى "اسكەري قىلمىسكەر" سانايتىنىن ايتتى. Reuters اگەنتتىگىنىڭ جازۋىنشا، رەسەيدىڭ ۋكرايناعا باسقىنشىلىعى تۇسىندا بايدەن العاش رەت پۋتينگە قاتىستى وسىنداي تىركەستى پايدالانىپ وتىر.
اق ءۇيدىڭ باسپا ءسوز حاتشىسى دجەن پساكيدىڭ تۇسىندىرۋىنشە، بايدەن تەلەديداردان "شەت مەملەكەتتى باسىپ الماق بولعان قاتىگەز ديكتاتوردىڭ ۆارۆارلىق ارەكەتىن" كورگەننەن كەيىن "شىن جۇرەكپەن ايتقان بولۋى" مۇمكىن. رەسەي كوپتەگەن ايعاقتارعا قاراماستان ۋكرايناداعى ازاماتتىق نىساندار مەن بەيبىت تۇرعىندارعا شابۋىل جاساعانىن مويىنداماي كەلەدى.
سارسەنبى كۇنى بايدەننىڭ سوزىنە رەاكسيا بىلدىرگەن كرەملدىڭ باسپا ءسوز حاتشىسى دميتريي پەسكوۆ "مەملەكەت باسشىسىنىڭ مۇنداي تىركەستى قولدانۋىنا جول بەرۋگە بولمايدى" دەگەن.
بىلتىر كوكتەمدە "ءپۋتيندى "قانىشەر" دەپ سانايسىز با؟" دەگەن جۋرناليست سۇراعىنا اقش پرەزيدەنتى دجو بايدەن "ءيا" دەپ جاۋاپ بەرگەن ەدى. ال بايدەننىڭ سوزىنە قاتىستى پىكىر ايتقان پۋتين "بىرەۋدى داتتاعان ادامنىڭ ءوزى سونداي" دەپ مالىمدەگەن.
