حالىقارالىق ساياسي ساراپشى:
ەلوردا تورىندە سىرتقى ساياسي بەلسەندىلىك تىم جوعارى بولعانىن كوردىك. وسىعان قاتىستى قوعامدا دا ءارتۇرلى ويلار بار. «مۇنداي جيىنداردىڭ پايداسى قانداي؟ بارلىعى كەلىپ ءوز ويىن ايتتى، ءبىراق ودان نە پايدا بار؟» دەگەن ءبىرقاتار پايىمدار ايتىلىپ جاتىر. بۇل جيىندار وزگە جيىنداردان وزگەرەك. سەبەبى الدىڭعى كەزەڭدەردە سىرتقى ساياسي احۋال، تاعى دا باسقا جاعدايلار ىشكى سۇرانىستار مەن ىشكى كوزقاراستارعا سايكەس كەلمەيتىن ەدى. ال ءقازىر قازاقستاننىڭ سىرتىنداعى گەوساياسي جاعدايلار بۇل جيىنداردىڭ ماڭىزدىلىعىن ارتتىردى. قاي مەملەكەت دەلدالدىق قىزمەت اتقارادى، وعان سەنىم بار ما، ساياسي بەدەلى قانداي دەگەن ماسەلەلەر دە سارالاندى. استانادا وتكەن سامميتتەر اياسىندا اڭعارساڭىز، ەكىجاقتى كەزدەسۋلەر، وي ءبولىسۋ وتە كوپ بولدى. مىسالى، تۇركيا مەن رەسەي پرەزيدەنتتەرى كەلىسسوزدەر جۇرگىزدى. قىرعىزستان مەن تاجىكستان باسشىلارى كەلدى. وسى جيىندار ارقىلى ەكىجاقتى كوزقاراستارمەن شەكتەلمەگەن مەملەكەتتەرگە ءبىرىن-بىرى تىڭداۋعا مۇمكىندىك پايدا بولدى. ياعني، بۇگىنگى تاڭدا سامميت اياسىنداعى ءىس-شارالاردان كەيىن مىندەتتى تۇردە ناقتى شەشىمدەر قابىلداناتىنى انىق.
ءقازىر كەز كەلگەن حالىقارالىق ءىس-شارانىڭ قاي ۋاقىتتا، قاي جەردە وتەتىنى وتە ماڭىزدى. بۇگىنگى تاڭدا ءتۇرلى مەملەكەتتەردىڭ باسشىلارىنىڭ قازاقستانعا كەلۋىنىڭ ءوزى ەلدىڭ سىرتقى ساياساتى، حالىقارالىق جانجالعا قاتىستى تەڭتاراپتى اراقاشىقتى ۇستانىمىن كورسەتىپ وتىر. سونىڭ ارقاسىندا باسقا مەملەكەتتەر ءۇشىن ءدال وسى ايماققا ەركىن كەلىپ، ەركىن وي الماسۋعا مۇمكىندىك پايدا بولدى. پرەزيدەنت قاسىم-جومارت توقايەۆتىڭ وسىنداي اشىق پىكىر الماسۋ الاڭدارىن قالىپتاستىرۋعا ات سالىستى. بۇدان بۇرىن ريم پاپاسىنىڭ دا كەلگەنىن بىلەمىز. وندا دا ەلىمىزدىڭ ساياسي ىقپالىن ارتتىراتىن قادامدار بولدى.
