بۋچا قالاسىنداعى بەيبىت ادامدار قىرعىنى تۋرالى حابارلاردان كەيىن ەۋروپا وداعى رەسەيگە سانكسيانى ۇستەي تۇسۋگە دايىندالىپ جاتىر. ەۋروپا كەڭەسى بۋچا قىرعىنىنا جاۋاپكەرشىلىكتى رەسەيگە جۇكتەسە، فرانسيا پرەزيدەنتى ەممانۋەل ماكرون ەۋروپا وداعىن رەسەي گازى مەن كومىرىن ساتىپ الۋدى تولىق توقتاتۋعا شاقىردى.
ەۋروپا وداعىنىڭ جوعارى ساياسي ورگانى ەۋروپا كەڭەسىنىڭ مالىمدەمەسىندە ۋكراينانىڭ رەسەي اسكەرى باسىپ العان جەرىندەگى جاپپاي قىرعىن ەۋروپا تاريحىندا ماڭگى قالاتىنى ايتىلعان. ماتىندە "رەسەي بۇل قىلمىسى ءۇشىن جاۋاپ بەرەدى" دەپ كورسەتىلگەن.
ماسكەۋ ءوزىن كىنالى سەزىنبەيدى، بۋچا قىرعىنىن ۋكراينا بيلىگىن ارادانداتۋ ءۇشىن ادەيى جاساعان دەپ سانايدى. جەكسەنبى كۇنى ماسكەۋ بۋچاداعى جاعدايدى تالقىلاۋ ءۇشىن بىرىككەن ۇلتتار ۇيىمى قاۋىپسىزدىك كەڭەسىنىڭ توتەنشە وتىرىسىن وتكىزۋدى سۇراعان بولاتىن. الايدا وعان كەڭەس ءتوراعاسى ۇلىبريتانيا ۆەتو قويعان.
رەسەي تەرگەۋ كوميتەتىنىڭ باسشىسى الەكساندر باسترىكين باس تەرگەۋ باسقارماسىنا بۋچاداعى بەيبىت ادامدار ءولىمى تۋرالى حابارلاردى ساراپتاپ، ول تۋرالى تاراعان اقپاراتتاردىڭ قىلمىستىق كودەكستىڭ "رەسەي اسكەرى تۋرالى جالعان اقپارات تاراتۋ" تۋرالى بابىنا قانشالىقتى ساي كەلەتىنىن تەكسەرۋدى تاپسىرعان. رەسەي اسكەرى ۋكرياناعا باسىپ كىرگەننەن كەيىن مەملەكەتتىك دۋما رەسەي قىلمىستىق كودەكسىنە شۇعىل تۇردە وسىنداي باپ ەنگىزگەن بولاتىن.
