بولات نازاربايەۆ كىمنىڭ بيزنەسىن تارتىپ العان؟

«Almaty steklo» زاۋىتىن قۇرعان كاسىپكەر ءازىم ابدۋللايەۆ ەكس-پرەزيدەنتتىڭ ءىنىسى بولات نازاربايەۆتىڭ كاسىبىنە رەيدەرلىك شابۋىل جاساپ، تەڭ جارتىسىن يەلەنىپ العانىن ايتادى. اينەك بوتەلكە، بانكى شىعاراتىن زاۋىت الماتى وبلىسى قاراساي اۋدانى جارمۇحامبەت اۋىلىندا ورنالاسقان. بولات نازاربايەۆ زاۋىت اشىلعان 2016 جىلدان بەرى ابدۋللايەۆپەن بىرگە جارعىلىق كاپيتالداعى 50 پايىزعا يە.

اقپاراتقا قاراعاندا، بولات نازاربايەۆ 31 ناۋرىزدا ازيم ابدۋللايەۆقا رەسمي حات جىبەرىپ، يەلىگىندەگى اكسيا پاكەتىن ءۇشىنشى تاراپقا – رۋسلان شالين دەگەن ازاماتقا سىيعا بەرەتىنىن حابارلاعان. وسى ماسەلەنى شەشۋ ءۇشىن 6 ساۋىردە قۇرىلتايشىلار جيىنىن وتكىزۋدى ۇسىنعان دەپ ايتىلادى.

6 ساۋىردە «بولات نازاربايەۆتىڭ اكسيالارىن سىيعا الدىم» دەگەن ازامات رۋسلان شالين ادۆوكاتىمەن بىرگە Almaty steklo زاۋىتىنا كەلدى. ءبىراق جۇمىسشىلار ونى سۇراقتىڭ استىنا الىپ، ىشكى كىرگىزبەدى. جۇمىسشىلاردىڭ سوزىنشە، «شىنى وندىرىسىنەن حابارى جوق جاڭا قۇرىلتايشى كەلسە، زاۋىت جابىلىپ نە توقىراۋى» مۇمكىن.

35 جاستاعى رۋسلان شالين ەكس-پرەزيدەنتتىڭ ىنىسىمەن ءتانىس-بىلىس ەكەنىن راستادى. ۇلەسىن العانى جونىندە كەلىسىم-شارتى بارىن دا ايتادى.

- ءبىز جيىن وتكىزەمىز دەدىك. قۇرىلتايشى ءازىم ابدۋللايەۆپەن جيىن ماسەلەلەرىن اقىلداسۋعا كەلدىك، - دەدى شالين.

ءبىراق بولات نازاربايەۆ ۇلەسىن نە سەبەپتى سىيعا تارتقانىن اشىپ تۇسىندىرمەدى. ءبىرازدان كەيىن ادۆوكاتىن ەرتىپ كەتىپ قالدى.

زاۋىت قىزمەتكەرلەرى دە جۇمىس ورنىنا ورالدى. باسشىلىق جۋرناليستەرگە ءوندىرىس ماڭىن، زاۋىتتىڭ جۇمىسىن كورسەتتى. زاۋىت وكىلدەرى نازاربايەۆتىڭ وكىلدەرى كەلەتىنىن باق-قا الدىن الا حابارلاعان ەدى. زاۋىت ديرەكتورى ازيم ابدۋللايەۆتىڭ سوزىنشە، ماسەلە زاۋىت سالىنىپ بىتكەن 2016 جىلى باستالعان.

- قالاي ءبىتتى، سولاي شابۋىلدار باستالدى. ءبىزدى، مەنى تۇرمەگە قاماماق بولدى. مەندە باسقا امال قالمادى. بىردەن زاۋىتتىڭ جارتىسىن اتىنا شىعارىپ، بىزگە تيىسپەۋى ءۇشىن قوماقتى قارجى بەردىك. قىسىم كۇشتى بولدى. ونىڭ ءبارىن بولاتتىڭ ۇلى نۇربول نازاربايەۆ ۇيىمداستىرىپ، باسقارىپ وتىردى، - دەيدى ابدۋللايەۆ.

ابدۋللايەۆ ولاردىڭ زاۋىتتىڭ جەرىن الۋعا، سالۋعا، اشۋعا كومەكتەسپەگەنىن ايتادى. ونىڭ سوزىنشە، "ابدۋللايەۆتار وتباسى بولات نازاربايەۆقا اي سايىن 250-300 مىڭ دوللاردىڭ اينالاسىندا اقشا بەرىپ وتىرعان".

- بولات نازاربايەۆپەن جۇمىس ىستەگەنىمە 15 جىل بولدى. سودان بەرى ساۋىپ كەلە جاتىر. جالپى كولەمى 60 ميلليون دوللارعا جەتەدى. بەرەتىن اقشامىز جەتپەي قالعاندا بوقتاپ، تاۋىپ كەل، تۇرمەگە قامايمىن دەپ قورقىتاتىن، - دەيدى ول جايلى ءازىم ابدۋللايەۆ.

ءازىم ابدۋللايەۆتىڭ ايتۋىنشا، اراق-شاراپ شىعاراتىن «شالقار-17» دەگەن زاۋىتىنا دا بولات نازاربايەۆ بىرگە يەلىك ەتكەن، بيىل عانا وزىنە قايتارعان. «قايتارۋ ءۇشىن 5 ميلليون دوللار اقشا بەردىك» دەيدى. قاراساي اۋدانىندا ورنالاسقان «باحار» مەيرامحاناسىندا دا نازاربايەۆتىڭ ۇلەسى بار. دەپ ايتىلادى. كاسىپكەر «مەيرامحانانى انامىزدىڭ ەسىمىمەن باحار دەپ اتاعانبىز» دەيدى.

ابدۋللايەۆ وتباسى ناۋرىزدىڭ سوڭىندا بولات نازاربايەۆ پەن نۇربول نازاربايەۆتىڭ ارەكەتىنە بايلانىستى باس پروكۋراتۋراعا، ىشكى ىستەر مينيسترلىگىنە شاعىم تۇسىرگەن. ازىرگە جاۋاپ كەلمەگەنىن ايتادى.

ازاتتىق تىلشىلەرى قۇقىق قورعاۋ ورگاندارىنان زاۋىت باسشىلىعىنىڭ شاعىمدارىنا بايلانىستى تۇسىنىكتەمە الۋعا تىرىسىپ جاتىر.

ءازىم ابدۋللايەۆ ءقازىر كاسىبىن بولات نازاربايەۆتان وزىنە تولىق قايتارىپ العىسى كەلەدى. ۇزاق جىلدار بويعى "قورقىتۋمەن بەرىپ كەلگەن اقشانىڭ" دا وتەۋىن سۇراماق.

بولات نازاربايەۆتىڭ كومپانيالارىن بىرىكتىرەتىن Prime capital holding ازاتتىق قوڭىراۋىن كوتەرمەدى. كومپانيانىڭ سايتى دا ىستەمەي تۇر. ونىڭ وكىلى رەتىندە شىنى زاۋىتىنا كەلگەن رۋسلان شالين بولات نازاربايەۆ قايدا دەگەن سۇراققا جاۋاپ بەرمەدى.

قازاقستاندا كەيىنگى كەزدە "ەكس-پرەزيدەنتتىڭ تۋىستارىنان جىلدار بويى قۇقاي كوردىك"، "رەيدەرلىك جاسادى" دەپ مالىمدەمە جاساۋشىلار جيىلەدى. قاماۋدا وتىرعان Parmigiano Group مەيرامحانالار جەلىسىنىڭ نەگىزىن قالاۋشى، Esentai City جوباسىنىڭ اۆتورى الماس ءابدىعاپاروۆ پەن ونىڭ جاقىندارى بولات نازاربايەۆتىڭ ادامدارىنىڭ بيزنەسىن تارتىپ العانىنا شاعىمدانعان. ءابدىعاپاروۆتىڭ ءوزى ءوزىنىڭ قاماۋدا وتىرعانىن دا سونىمەن بايلانىستىرادى.

ازىرگە نازاربايەۆتىڭ وتباسى وقيعالارعا تۇسىنىكتەمە بەردى. قاڭتار وقيعاسىنان بەرى ەكس-پرەزيدەنتتىڭ تۋىستارىنىڭ كەيبىرى ۇستالدى، كەيبىرىنىڭ قايدا ەكەنى بەلگىسىز.

قاڭتار وقيعاسىنان كەيىن قازاقستاننىڭ بۇرىنعى پرەزيدەنتى نۇرسۇلتان نازاربايەۆ قاۋىپسىزدىك كەڭەسىنىڭ ءومىر بويعى ءتوراعاسى قۇقىعىنان ايىرىلعان سوڭ جاقىن تۋىستارى ءىرى قىزمەتتەردەن شەتتەتىلگەن.