استانادا "بولاشاق" باعدارلاماسىنا قاتىستى تۋىنداعان داۋدان كەيىن 24KZ تەلەارناسىنىڭ كەشكى جاڭالىقتار ءبولىمىنىڭ شىعارۋشى-رەداكتورى ناتاليا ۆوروبيەۆا مەن پرەزيدەنت جانىنداعى ورتالىق كوممۋنيكاسيالار قىزمەتىنىڭ جۇرگىزۋشى-مودەراتورى، 24KZ تەلەارناسىنىڭ بۇرىنعى تەلەجۇرگىزۋشىسى ماقپال دارىبايەۆا پرەزيدەنت قاسىم-جومارت توقايەۆتان كومەك سۇرادى، - دەپ حابارلايدى Alash.kz.
ب ا ق وكىلدەرىنىڭ ايتۋىنشا، 2016 جىلى "بولاشاق" باعدارلاماسىنا 24KZ تەلەارناسىنىڭ بۇرىنعى تەلەجۇرگىزۋشىسى ۆالەريا گاۆريلەنكوعا تۇسكەن. وسىدان كەيىن ولاردا ماسەلە تۋىنداعان دەپ جازدى Massaget.kz.
"2016 جىلى ۆالەريا گاۆريليەنكو "بولاشاق" باعدارلاماسى شەتەلدە وقىعىسى كەلىپ، ءوتىنىم بەردى. وندا ۇشەۋمىز دە ارىپتەس بولدىق. ول بىزگە كەلىپ، "2 پاتەردى كەپىلگە قويدىم، وقۋدىڭ اقىسى جالپى 26 ملن تەڭگە بولدى. كەپىلگە اقشا جەتپەي تۇر. گارانت بولىڭدارشى" دەدى. قاتالەسپەسەم، 2 پاتەر جالپى 20 ملن تەڭگەگە باعالاندى. قالعان 6 ملن تەڭگەگە گارانت بولامىز دەپ شەشتىك. سوندىقتان ءبىز كەلىسىمىمىزدى بەردىك. ەرەسەك ادامبىز، قۇجاتقا قول قويىپ، گارانت بولعانىمىز تۇسىنەمىز... ءبىز ەشكىمنەن قاشىپ جۇرگەن جوقپىز. ءبىز – گارانتپىز. ءبىراق وقۋدىڭ اقىسىن تولىق تولەۋگە قارسىمىز"، - دەدى ناتاليا ۆوروبيەۆا.
ماقپال دارىبايەۆا تەك بۇرىنعى ارىپتەسىنە كومەكتەسكىسى كەلىپ، وسىنداي قيىندىققا تاپ بولعانىن جەتكىزدى.
"2016 جىلى ۆالەريا گاۆريليەنكو 24KZ تەلەارناسىندا ورىسشا جاڭالىقتاردى، ال مەن قازاقشا جاڭالىقتاردى جۇرگىزدىم. ول "بولاشاق" ستيپەندياسىنىڭ يەگەرى اتاندى. سودان كەيىن "قىزدار، كومەكتەسىڭدەر! مەن 2 ءۇيىمدى كەپىلدىككە قويامىن، سەندەرگە ەشقانداي ءقاۋىپ تونبەيدى. مەن وقۋىمدى ءبىتىرىپ، ەلگە ورالامىن" دەپ ايتتى. ءبىز ارىپتەسىمىزدىڭ سوزىنە سەندىك جانە وعان كومەكتەسكىمىز كەلدى"، - دەدى ول.
كەيىن ولار ۆالەريا گاۆريليەنكونىڭ تالاپتى ورىنداماعانىن بىلگەن.
"2 پاتەردىڭ كەپىلدەن شىعارىلعانىن 2021 جىلى "بولاشاق" بىزگە سوت ارقىلى شاعىم تۇسىرگەندە بىلدىك. سودان كەيىن وقيعانىڭ ءمان-جايىن انىقتاۋعا كىرىستىك. سويتسەك، پاتەرلەر 2019 جىلى كەپىلدەن شىعارىلىپتى جانە وقۋدىڭ اقىسى دا تولىق وتەلمەگەن. سول ۋاقىتتا ۆالەريا گاۆريليەنكو شەتەلگە قونىس اۋدارعان"، - دەدى ناتاليا ۆوروبيەۆا.
ماقپال دارىبايەۆانىڭ ايتۋىنشا، بۇل كەلەڭسىزدىككە "بولاشاق" ورتالىعىنىڭ بۇرىنعى باسشىلىعى كىنالى.
"2 پاتەر كەپىلدە بولماعاسىن "بولاشاق" بىزدەن شامامەن 30 ملن تەڭگەنى قايتارۋدى تالاپ ەتىپ وتىر. بۇل – ۆالەريا گاۆريلەنكونىڭ وقۋىنا جۇمسالعان قاراجات. "بولاشاق" تۇلەگى شەتەلدە وقۋدى بىتىرگەسىن ءوزىنىڭ مىندەتىن ورىنداماسا، ەڭ الدىمەن كەپىلگە قويىلعان مۇلىكتى ساتۋ ارقىلى بارلىق شىعىن وندىرىلەدى. ءقازىر كەپىلدە ەشقانداي مۇلىك جوق. الايدا ۆالەريا گاۆريليەنكونىڭ ەلدەن قاشىپ شىعۋىنا بارلىق جاعداي جاسالعان. پاتەرلەردى ساتىپ، شەتەلگە قاشىپ كەتكەن. ("حالىقارالىق باعدارلامالار ورتالىعى" اق بۇرىنعى باسشىسى) جانبولات مەلدەشوۆ رەسمي قۇجاتقا ءوزى قول قويىپ بەرگەن"، - دەدى ب ا ق وكىلى.
ول مۇنداي قوماقتى اقشانى تولەۋگە شاماسى جەتپەيتىنىن اشىق ايتتى.
"بىزگە جالپى 30 ملن تەڭگە تولەۋ كەرەك. قولىمىزدا ونداي قاراجات جوق. ناتاشا ەكەۋمىزدىڭ وتباسىمىز، بالامىز بار. مەنىڭ اياعىم اۋىر. سوندىقتان ولاردىڭ ءبىزدىڭ پاتەرىمىزدى الىپ قويۋعا، بانكتاعى ەسەپشوتىمىزدى بۇعاتتاۋعا قۇقىعى بولادى. وسىنىڭ بارىنەن ءبىز قورقامىز. الداعى ۋاقىتتا سوت بولادى. سوندىقتان ءبىز ماسەلەگە مەملەكەت باسشىسى قاسىم-جومارت توقايەۆ پەن باق-تىڭ نازار اۋدارۋىن سۇرايمىز"، - دەدى ماقپال دارىبايەۆا.
ادۆوكات ايجان تاشەنوۆا بۇل جاعدايدا زاڭسىزدىقتار بار دەگەن پىكىردە.
فوتو: Massaget.kz
"كەپىلدىك تۋرالى شارت بويىنشا جانە كەپىلدىك تۋرالى ازاماتتىق كودەكستىڭ ەرەجەسىنە سايكەس كەپىلگەرلەر نەگىزگى بورىشكەر مىندەتىن ورىنداعانعا دەيىن جاۋاپتى بولادى. ءبىراق كەپىلدىك شارتى وقىتۋدى ۇيىمداستىرۋ تۋرالى شارتقا بايلانىستى. 2022 جىلى بۇل مىندەتتەمەلەر شارتتان سوت شەشىمىنە اۋىسقاندىقتان، شارت ءوز كۇشىن توقتاتتى. ەندى گاۆريلەنكونىڭ مىندەتتەمەسى شارتتان ەمەس، سوتتىڭ شەشىمىنەن تۋىندايدى، ال كەپىلدىك شارتى وقىتۋ شارتىنىڭ ورىندالۋىن قامتاماسىز ەتتى. مەنىڭ ويىمشا جانە وسىنداي سوت شەشىمدەرىن شىعارعان ادام رەتىندە ايتارىم، بۇگىندە كەپىلدىك بەرۋشىلەرگە تالاپ قويۋ مۇمكىن ەمەس"، - دەدى ول.
"حالىقارالىق باعدارلامالار ورتالىعى" اق باسپا ءسوز قىزمەتى بۇل جاعدايعا تۇسىنىك بەردى.
"شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ 2015 جىلعى 14 جەلتوقسانداعى شەشىمى نەگىزىندە گاۆريلەنكو ۆ.ۆ. ۇلىبريتانيانىڭ ليۆەرپۋل ۋنيۆەرسيتەتىندە "ستراتەگيالىق كوممۋنيكاسيا" ماماندىعى بويىنشا ماگيستراتۋرا باعدارلاماسى بويىنشا وقۋ ءۇشىن "بولاشاق" حالىقارالىق ستيپەندياسىنىڭ يەگەرى اتاندى، 2016-2017 وقۋ جىلىندا اكادەميالىق وقۋ ءوتتى. كەلىسىمشارت تالاپتارىنا سايكەس، ستيپەنديات وقۋىن اياقتاعاننان كەيىن ديپلومىن تاپسىرۋ، وقۋىن اياقتاعاننان كەيىن قازاقستانعا ورالۋ جانە قازاقستان اۋماعىندا ماماندىعى بويىنشا جۇمىس ىستەۋ مىندەتتەمەلەرىن الدى"، - دەپ جازىلعان حابارلامادا.
ورتالىقتىڭ مالىمەتىنشە، كەلىسىمشارت بويىنشا ستيپەنديات وقۋ قۇنىنىڭ جالپى سوماسىنان كەم ەمەس باعالاناتىن جىلجىمايتىن مۇلىكتى كەپىلگە قويۋعا مىندەتتى. كەپىلگە قويىلعان جىلجىمايتىن مۇلىك اكادەميالىق وقۋدىڭ جالپى قۇنىن وتەمەگەن جاعدايدا، قامتاماسىز ەتىلمەگەن قالعان سوما بويىنشا ستيپەنديات وقۋىن اياقتاعاننان كەيىن مىندەتتەمەلەردى قامتاماسىز ەتەتىن جۇمىسقا قابىلەتتى كەپىلگەرلەردى ۇسىنادى.
"گاۆريلەنكو ۆ. 2 جىلجىمايتىن مۇلىك نىسانىن كەپىل رەتىندە ۇسىندى. الايدا ولاردىڭ قۇنى وقۋ قۇنىن تولىق وتەمەگەندىكتەن، ستيپەنديات ءۇشىن رەسمي تۇردە ەكى كەپىلگەر – م.ا.دارىبايەۆا، ن.ا. ۆوروبيەۆا كەپىلدىك بەردى، ولاردىڭ ارقايسىمەن ورتالىق كەپىلدىك شارتتارىن جاساستى. كەپىلدىك شارتىنىڭ 2.1 جانە 2.2 تارماقتارىنا سايكەس م.ا.دارىبايەۆا مەن ن.ا. ۆوروبيەۆا وقۋدى ۇيىمداستىرۋ شارتى بويىنشا بارلىق مىندەتتەمەلەردى تولىق ورىنداۋعا بىرلەسىپ جاۋاپكەرشىلىكتى موينىنا العان. سونداي-اق كەپىلدىك شارتىنىڭ 2.4 تارماعىنا سايكەس، ستيپەندياتتىڭ ورتالىق الدىنداعى مىندەتتەمەلەرىن ورىنداماۋى جانە/نەمەسە ءتيىستى تۇردە ورىنداماۋى جاعدايىندا، مىندەتتەمەلەردى ورىنداۋ تۋرالى تالاپتى قاناعاتتاندىرماعان جاعدايدا، ورتالىق ورىندالماعان بولىكتەگى اتالعان تالاپتى كەپىلگەرگە قويۋعا قۇقىلى"، - دەپ جازىلعان حابارلامادا.
حالىقارالىق باعدارلامالار ورتالىعى "زاڭبۇزۋشىلىقتاردى" انىقتاۋ ءۇشىن ءبىرقاتار شارا جۇرگىزۋگە كىرىسكەن.
"قىزمەتتىك تەرگەۋ ناتيجەسىندە 2019 جىلدىڭ 13 مامىرىندا ورتالىقتىڭ بۇرىنعى پرەزيدەنتى مەلدەشوۆ ج.، ۆيسە-پرەزيدەنتى الپىسباي م.، زاڭ دەپارتامەنتىنىڭ باسشىسى شارامبايەۆ ا. تاراپىنان ستيپەندياتتىڭ بارلىق مىندەتتەمەسىن تولىق ورىنداۋىنا بايلانىستى جىلجىمايتىن مۇلىك كەپىلىنەن بوساتۋ تۋرالى حابارلاما بەرىلگەنى انىقتالدى. ياعني قازاقستان اۋماعىندا ءبىر جىل ەڭبەك قىزمەتىن اتقارعاننان كەيىن. اتالعان فاكتىلەر انىقتالعاننان كەيىن، ورتالىق ءتيىستى ورگاندارعا (ورتالىقتىڭ) بۇرىنعى لاۋازىمدى تۇلعالارعا قاتىستى قىزمەتتىك جالعان فاكتىلەر بويىنشا ءتيىستى شارالار قابىلداۋ جانە كىنالى ادامداردى زاڭدا كوزدەلگەن جاۋاپكەرشىلىككە تارتۋ ءۇشىن بىرنەشە رەت ءوتىنىش جولدادى"، - دەپ جازىلعان حابارلامادا.
بيىل ساۋىردە ورتالىق ۇلتتىق قاۋىپسىزدىك كوميتەتى مەن ىشكى ىستەر مينيسترلىگىنە گاۆريلەنكونىڭ ناقتى ورنالاسقان جەرىن انىقتاۋ ءۇشىن حات جولداعان. ءقازىر ورتالىق "بولاشاق" باعدارلاماسىنىڭ شەتەلدەردە جۇرگەن، مەملەكەت الدىنداعى شارتتىق مىندەتتەمەلەرىن ورىنداماعان ستيپەندياتتاردى قايتارۋ بويىنشا جۇيەلى جۇمىستار جۇرگىزىپ جاتىر.
