ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

قازاقستاننىڭ سيفرلىق جەتىستىكتەرى 4 ەلدىڭ ۇكىمەت باسشىلارىنا تانىستىرىلدى

02 اقپان 2024 48
جىل سايىن وتەتىن Digital Almaty فورۋمى اياسىندا وزىق سيفرلىق جوبالار كورمەسىندە سيفرلاندىرۋ سالاسىنداعى وتاندىق جەتىستىكتەر ۇسىنىلدى. پلەنارلىق سەسسيا الدىندا كورمەمەن بەلارۋس، قازاقستان، رەسەي جانە وزبەكستاننىڭ ۇكىمەت باسشىلارى تانىستى.

كورمەدە 300-دەن استام قازاقستاندىق جانە حالىقارالىق IT-كومپانيالاردىڭ، سونداي-اق GovTech، AgroTech، يندۋستريا 4.0، ESG، Smart City جانە ت.ب. سياقتى سيفرلاندىرۋ سالالارىنداعى مەملەكەتتىك ورگانداردىڭ جوبالارى ۇسىنىلعان.

ۇكىمەت باسشىلارىنا ق ر مەملەكەتتىك اقپارات جۇيەلەرىندە ءبىرىڭعاي ستاندارتتاردىڭ ساقتالۋىن قامتاماسىز ەتەتىن Qaztech پلاتفورماسى جانە «تازا پاراقتان» كاسىپكەرلىك قىزمەتتى رەتتەۋدىڭ سيفرلىق نەگىزى تانىستىرىلدى.

سونىمەن قاتار قوناقتارعا الماتى قالاسىنىڭ سيفرلىق سەرۆيستەرى، سونداي-اق تاۋ-كەن جانە مەتاللۋرگيا كەشەنىندە، ونەركاسىپ پەن ەنەرگەتيكا سەكتورىندا، ونىڭ ىشىندە مەملەكەتتىك قولداۋ قۇرالدارى ەسەبىنەن يندۋستريا 4.0 جوبالارىن ەنگىزۋ ناتيجەلەرى كورسەتىلدى. اتاپ ايتقاندا، بۇل ءوندىرىستى باسقارۋ پروسەستەرىن اۆتوماتتاندىرۋعا، جابدىقتىڭ توزۋ دەڭگەيىن تومەندەتۋگە جانە ءونىمسىز شىعىنداردى ازايتۋعا قاتىستى.

ونەركاسىپ جانە قۇرىلىس ۆيسە-مينيسترى جاننات ءدۇبىروۆا رەسپۋبليكانىڭ ونەركاسىپ كاسىپورىندارىندا زاماناۋي تەحنولوگيالاردى ەنگىزۋ تۋرالى ايتىپ بەردى.
«يندۋستريا 4.0 – ونەركاسىپ كاسىپورىندارى مەن جەر قويناۋىن پايدالانۋشىلارعا سيفرلىق تەحنولوگيالاردى ەنگىزۋ ارقىلى ءوز شىعىندارىن قىسقارتۋعا جانە ونىمدىلىگىن ارتتىرۋعا مۇمكىندىك بەرەتىن زاماناۋي ترەند. كورمەدە ءبىز ءبىرقاتار سيفرلىق جوبالاردى جۇزەگە اسىرعان تاۋ-كەن مەتاللۋرگيا كەشەنىنىڭ بىرنەشە كاسىپورنىن ۇسىنىپ وتىرمىز. مەملەكەت قولداۋ شارالارىن كورسەتۋ ارقىلى يندۋستريا 4.0 جوبالارىن ىلگەرىلەتۋ بويىنشا بەلسەندى ساياسات جۇرگىزۋدە. بۇل سونداي-اق بيزنەستىڭ وسىنداي تەحنولوگيالاردى ەنگىزۋگە جۇمساعان شىعىندارىن وتەۋگە قاتىستى. بۇگىنگى تاڭدا 183 ملن تەڭگەدەن استام قاراجات وتەلدى، بۇل جۇمىس جالعاسۋدا»، — دەدى ول.
بۇل ماقالا تۋرالى نە ويلايسىز؟