مىسالى الماتى ورتالىق مەشىتىنىڭ باس يمامى تولە بي وسپان قاجىنىڭ ايتۋىنشا ءبىزدىڭ زامانىمىزداعى حاريجيتتەر (لاڭكەسشىلەر) – تاكفير جانە ھيجرات اعىمدارى. بۇل اعىمدارعا قازاقستاندا تىيىم سالىنعان.
“بۇلاردىڭ اتى ايتىپ تۇرعانداي، نەگىزگى ۇستانىمدارى – ولارمەن ءبىر بولماعانداردى كاپىرگە شىعارۋ. اتاپ ايتقاندا، ولاردىڭ تۇسىنىگىنشە – ءاربىر ۇلكەن كۇنا جاساعان ادام – كاپىر.
قۇرانعا ەمەس، اتا زاڭدى باسشىلىققا الۋ – كۇپىرلىك. مۇنداي بيلىككە قارسىلىق بىلدىرمەگەن حالىق تا – كاپىر”، – دەيدى يمام.
يمامنىڭ ايتۋىنشا ءدىن عالىمدارىنا كەلسەك، اتالعان اعىمداردىڭ پايىمداۋىنشا ۇكىمەتتى جانە حالىقتى يمانسىز دەمەگەنى ءۇشىن، ولار دا كاپىرگە جاتادى.
“سونىمەن بىرگە، تاكفير جاماعاتىنىڭ وي-پىكىرىن ەستىپ، ولاردىڭ قاتارىنا قوسىلماعان جانە اتالمىش اعىم جەتەكشىسىنە بويۇسىنۋعا سەرت بەرمەگەن ءاربىر ادام – كاپىر. ال، وسى جاماعاتقا كىرىپ، سوڭىنان شىعىپ كەتسە – مۋرتاد. دەمەك، دىننەن شىعۋشى. تاكفير اعىمىنىڭ تۇجىرىمى بويىنشا، ولاردىڭ قاتارىنان شىققان ادامدى ولتىرۋگە رۇقسات.
مىنە، مۇنداي سەنىمدە شىنايى يسلام ءدىنىنىڭ جۇرناعى دا جوق دەپ تولىقتاي ايتۋعا بولادى، – دەيدى تولە بي وسپان.
قمدب يمامى بۇل سوزىنە قازاقستاننان چەحياعا قونىس اۋدارعان ءبىر توپ سالافي تاكفير جاماعاتىن دا دالەل قىلادى.
ءوزىن سىناعانداردى كاپىر، شايتان، ىبىلىسكە تەڭەگەن بەكبولات تىلەۋحاننىڭ ەكسترەميستىك باعىتتاعى ءدىني سوزدەرىنە بايلانىستى ق ر ىشكى ىستەر مينيسترلىگى قانداي قۇقىقتىق باعا بەرەر ەكەن؟!
…
بۇعان دەيىن تۇراربەك قۇسايىن قاسىم-جومارت توقايەۆقا ۇندەۋ جاريالاپ، راديكالدارمەن كۇرەسكە دەپ بولىنگەن 300 ملرد تەڭگەنىڭ ەسەبىن سۇراعان ەدى.
ونىڭ ايتۋىنشا، وسى ۋاقىتقا دەيىن ءدىني ەكسترەميزم جانە تەرروريزمنىڭ الدىن الۋ دەگەن جەلەۋمەن 300 ملرد تەڭگە جۇمسالعان. ونىڭ 200 ميللياردى كارىم ءماسىموۆتىڭ پرەمەر-مينيستر بولىپ تۇرعان كەزىندە بولىنگەن. ول ازداي ءماسىموۆ ۇلتتىق قاۋىپسىزدىك كوميتەتىن باسقارىپ تۇرعان شاعىندا تاعى 100 ميللياردتان استام قارجى بولىنگەن.
“مىسالى تۇركياداعى بەكبولات تىلەۋحان جۋرناليست نارتاي ارالبايۇلىنا بەرگەن سۇحباتىندا مەملەكەتكە وپاسىزدىق جاساۋ، بيلىكتى كۇشپەن باسىپ الۋ جانە لاۋازىمدىق مىندەتتەرىن اسىرا پايدالاندى دەپ ايىپ تاعىلعان كارىم ءماسىموۆتىڭ ساياساتكەر رەتىندە ەرەكشە قاسيەتىن باعالاپ، جەر-كوككە سىيعىزباي ماقتادى.
بۇدان شىعاتىن قورىتىندى مونارحيالىق ءسالافيزمدى اڭساعان نازاربايەۆ پەن ونىڭ اۋلەتى جانە سول ساياسي جوبانى جۇزەگە اسىرعىسى كەلگەن كارىم ءماسىموۆ، قايرات ساتىبالدى، بەكبولات تىلەۋحان، مۇحامەدجان تازابەك سياقتىلار ءدىني ەكسترەميزمگە قارسى باعىتتالعان 300 ميللياردتان استام حالىقتىڭ اقشاسىن، ءوز بيدايىن وزىنە قۋىرىپ، ياعني ورتاعاسىرلىق ارابي-پارسى يدەولوگيانى قازاقتىڭ ساناسىنا تىقپالاۋ مەن شىرماۋعا جۇمساعان با؟! بۇل دەگەن كادۋىلگى قاسقىرعا قوي باقتىرۋ ەمەس پە؟!
وسى فاكتىلەردى العا تارتا وتىرىپ، قۇزىرلى ورگاندار مەن مەملەكەت باسشىسىنان قاماۋداعى كارىم ءماسىموۆتىڭ ۇكىمەت پەن ۇقك باسقارعان كەزىندەگى ەكسترەميزم-تەرروريزمگە قارسى كەشەندى كۇرەس باعدارلاماسىنا جۇمسالعان، ياعني حالىقتىڭ قىرۋار اقشاسىنىڭ ەسەبىن بەرۋىن تالاپ ەتەمىن”، – دەگەن ەدى تۇراربەك قۇسايىن.
اۆتور، جەڭىسبەك حالەلوۆ
