مەديسينالىق تۋريزم بۇگىندە بارعان سايىن تانىمال بولا تۇسۋدە، ول بۇكىل الەمنەن شەتەلدە ساپالى مەديسينالىق كومەك الۋعا ۇمتىلاتىن پاسيەنتتەردى تارتادى، ونى جاعىمدى دەمالىسپەن بىرىكتىرەدى. قازاقستاننىڭ باس قالاسى استانا قالاسى ايماقتاعى مەديسينالىق ءتۋريزمنىڭ جەتەكشى ورتالىقتارىنىڭ ءبىرى بولىپ تابىلادى. بۇل زاماناۋي مەديسينالىق كلاستەر جوعارى تەحنولوگيالىق مەديسينالىق قىزمەتتەردىڭ كەڭ سپەكترىن ۇسىنىپ، ونى ەلدەن عانا ەمەس، سونىمەن قاتار شەتەلدەن كەلگەن پاسيەنتتەر ءۇشىن تارتىمدى ەتەدى. استانا زاماناۋي مەديسينالىق كلينيكالاردىڭ، ستوماتولوگيالىق، كوسمەتولوگيالىق جانە ەكۇ ورتالىقتارىنىڭ دامىعان جەلىسىمەن تانىمال. قالادا كارديوحيرۋرگيا جانە نەيروحيرۋرگيا سالاسىنداعى بىرەگەي تەحنولوگيالار بار. ەڭ يننوۆاسيالىق ەمدەۋ ادىستەرىنىڭ كەيبىرى جاساندى جۇرەكتى يمپلانتاسيالاۋدى جانە گامما پىشاقپەن باس ميىنىڭ ىسىگىن كرانيوتومياسىز جويۋدى قامتيدى. بۇل تەحنولوگيالار ادامداردىڭ ءومىرىن ساقتاپ قانا قويمايدى، سونىمەن قاتار پاسيەنتتەردىڭ ءومىر ساپاسىن ايتارلىقتاي جاقسارتادى.
سونىمەن قاتار، بۇل قىزمەت تەك قازاقستان رەسپۋبليكاسىنىڭ ازاماتتارىنا عانا قولجەتىمدى بولعانىمەن، بارلىق دەرلىك اعزالاردى ترانسپلانتاسيالاۋ استانادا جۇزەگە اسىرىلادى. سونداي-اق جاسۋشا ترانسپلانتاسياسى، يادرولىق دياگنوستيكا، روبوتتىق كينەزيوتەراپيا، كومەيدىڭ ستەنوزىن ەمدەۋ جانە باسقا دا كوپتەگەن جوعارى تەحنولوگيالىق مەديسينالىق پروسەدۋرالار ورىندالادى.
ءارى باس قالا استاناداعى مەديسينالىق قىزمەتتەردىڭ ساپاسى حالىقارالىق اككرەديتاسيالارمەن راستالعان. بۇگىندە ەلوردادا مەديسيناداعى «التىن ستاندارت» بولىپ تابىلاتىن JCI (Joint Commission International) حالىقارالىق اككرەديتاسياسىنان وتكەن 7 كلينيكا بار. JCI اككرەديتاسياسى ءۇش جىل سايىن وتكىزىلەدى جانە مەديسينالىق قىزمەتتەردىڭ حالىقارالىق ستاندارتتارعا سايكەستىگىن، قىزمەتكەرلەردى وقىتۋ دەڭگەيىن جانە پاسيەنتتەردىڭ قاۋىپسىزدىگىن راستايدى. قازاقستاندا مۇنداي اككرەديتاسيادان وتكەن بارلىعى 9 نىسان بار، ونىڭ 7ء-ۋى استانادا ورنالاسقان. سونداي-اق، ەلىمىزدەگى 497 مەديسينالىق مەكەمە ۇلتتىق اككرەديتاسيادان وتكەن.
اككرەديتاسيادان وتكەن مەديسينالىق مەكەمەلەر:
ۇلتتىق كارديوحيرۋرگيا ورتالىعى («University Medical Center» كورپوراتيۆتىك قورى)؛
انا مەن بالا ۇلتتىق عىلىمي ورتالىعى («University Medical Center» كورپوراتيۆتىك قورى)؛
ۇلتتىق بالالاردى وڭالتۋ ورتالىعى («University Medical Center» كورپوراتيۆتىك قورى)؛
رەسپۋبليكالىق دياگنوستيكالىق ورتالىق («University Medical Center» كورپوراتيۆتىك قورى)؛
ۇلتتىق نەيروحيرۋرگيا ورتالىعى؛
قازاقستان رەسپۋبليكاسى پرەزيدەنتى ءىس باسقارماسى مەديسينالىق ورتالىعىنىڭ اۋرۋحاناسى؛
«UMIT» حالىقارالىق ونكولوگيالىق توموتەراپيا ورتالىعى.
