ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"ادەتتەگىدەي جۇمىس ىستەدىم". ايبار قوسانوۆ ءىىى دارەجەلى "ەڭبەك داڭقى" وردەنىمەن ماراپاتتالدى

06 مامىر 2024 169

بۇگىن قازاقستان رەسپۋبليكاسى پرەزيدەنتىنىڭ اتىنان Qarmet كومپانياسىنىڭ كوستەنكو اتىنداعى شاحتاسىنىڭ جەراستى ۋچاسكەسىنىڭ ەلەكتر سلەسارى ايبار قوسانوۆقا ءىىى دارەجەلى "ەڭبەك داڭقى" وردەنى تابىس ەتىلدى. ماراپاتتى قاراعاندى وبلىسىنىڭ اكىمى ەرماعانبەت بولەكپايەۆ تابىستادى.

"ايبار باتىرلىق تانىتتى جانە شاحتادا بولۋى مۇمكىن ءقاۋىپتىڭ الدىن الدى. ەڭبەگىڭىز ءۇشىن راقمەت، وتباسىڭىزعا، اتا-اناڭىزعا مىڭ العىس. ءسىزدى شىن جۇرەكتەن لايىقتى ماراپاتپەن قۇتتىقتايمىن"، - دەپ اتاپ ءوتتى وبلىس اكىمى.

ەستەرىڭىزگە سالا كەتەيىك، 2024 جىلدىڭ 2 مامىرىندا ايبار قوسانوۆ كوستەنكو اتىنداعى شاحتادا 190-نان استام شاحتەر بولعان كەنىشتەگى تۇتانعان ءتۇتىندى دەرەۋ وشىرگەن بولاتىن.

"بۇل كۇنى مەن ادەتتەگىدەي جۇمىس ىستەدىم، كەنەت تۇتانعان جەر بولۋى مۇمكىن دەگەن اقپارات كەلدى. مەن ونى كوزبەن كورۋ ءۇشىن 700 مەتردەي جەرگە جۇگىرىپ باردىم. ويىمدا قورقىنىش سەزىمى بولعان جوق. بارسام تاسپانىڭ تۇتاپ جاتقانىن كوردىم. ەشتەڭە ويلانباستان ەكى ءورت ءسوندىرۋ قۇرالىن الىپ، ءوشىرىپ تاستادىم. پرەزيدەنت قاسىم-جومارت كەمەل ۇلى توقايەۆقا، وبلىس باسشىلىعىنا جوعارى ماراپاتى ءۇشىن العىس ايتقىم كەلەدى، بۇل مەن ءۇشىن جانە مەنىڭ وتباسىم ءۇشىن كۇتپەگەن جانە وتە توسىن سىي بولدى"، - دەدى ايبات قوسانوۆ.

ول بۇل ماراپات تەك ءوزىنىڭ عانا ەمەس، سونىمەن قاتار ديسپەچەرلىك ءبولىمىنىڭ جالپى سيگنال كەزىندە جەدەل جۇمىس ىستەگەن بارلىق ارىپتەستەرىنىڭ دە ەڭبەگى ەكەنىن ايتتى. قوسانوۆ كومپانياعا جوعارى دايىندىعى ءۇشىن العىسىن ءبىلدىردى.

ءوز كەزەگىندە Qarmet باس ديرەكتورى ۆاديم باسين كومپانيا كەنشىنىڭ ەرلىك ارەكەتىن نازاردان تىس قالدىرمايتىنىن اتاپ ءوتتى.

"جالپى، ءقازىر شاحتالاردا قاۋىپسىزدىك جۇيەسىن جەتىلدىرۋ بويىنشا بەلسەندى جۇمىس جۇرگىزىلۋدە. ماڭىزدى قادامداردىڭ ءبىرى Qarmet كومىر نىساندارىندا پوزيسيالاۋ جۇيەسىن ورناتۋ بولدى. ءبىز قىزمەتكەرلەرىمىز ءۇشىن جەر استىنداعى ەڭبەكتى ءقاۋىپسىز ەتۋگە تىرىسامىز"، - دەدى باسين.

ايبار قوسانوۆ كوستەنكو شاحتاسىندا 2022 جىلدان باستاپ كونۆەيەرلىك كوتەرۋ ۋچاسكەسىنىڭ جەراستى ەلەكتروسلەسارى لاۋازىمىندا جۇمىس ىستەيدى، بۇعان دەيىن باسقا كاسىپورىنداردا جۇمىس ىستەگەن. ۇيلەنگەن، ۇلگىلى وتباسى ەكى بالا تاربيەلەپ وتىر.

بۇل ماقالا تۋرالى نە ويلايسىز؟