قالا پروكۋرورى عابيت مۇقانوۆ ولاردى قابىلداۋىنا شاقىردى. نارازىلار ىشكە جۋرناليستەرسىز كىرمەيتىنىن مالىمدەدى. پروكۋرورلار ىشكى تارتىپكە ساي ارنايى حات جولدانىپ، رۇقسات الىنباسا جۋرناليستەر جيىندارعا قاتىستىرىلمايتىنىن حابارلادى.
- جۋرناليست كىرمەسە، ۆيدەو تۇسىرمەسە ىشكە كىرىپ، شىققانىمىز كوك تيىن عوي، - دەدى نارازىلاردىڭ ءبىرى. ولاردىڭ پىكىرىنشە، اقپارات قۇرالدارى ىشكە كىرسە، بيلىك بەرگەن ۋادەلەرىنە جاۋاپتىراق قاراي باستايدى.
نارازىلاردىڭ ءبىر بولىگى قالا پروكۋرورىن تىڭداۋعا، جاۋابىنا كوڭىلى تولماسا شىعىپ اشتىق جاريالايتىنىن ايتتى.
جارتى ساعاتتان كەيىن نارازىلار ءجۋرناليستىڭ قاتىسۋىنسىز ىشكە كىرۋگە كەلىستى.
ءتۇس كەزىندە پروكۋراتۋرادان نارازىلاردىڭ باسى شىعا باستادى. ولار وزدەرىن پروكۋروردىڭ ورىنباسارى قابىلداعانىن، جاۋاپتارىنا قاناعاتتانباعانىن جەتكىزدى.
قالا پروكۋراتۋراسىنىڭ الدىنا جينالعانداردىڭ اراسىندا ازاماتتىق بەلسەندى ەرعالي قۇلبايەۆتى قولداپ كەلگەندەر دە بولدى. ولار بەلسەندىنى بوساتۋدى تالاپ ەتتى. ايتۋلارىنشا، بەلسەندىنىڭ ميتينگىگە قاتىسقانى بولماسا، بۇلىككە قاتىسى جوق.
- كەشە (30 ناۋرىزدا) ەرعاليمەن كەزدەستىم. وعان قاماۋ مەرزىمىن ۇزارتۋ تۋرالى سوت قاۋلىسىن بەرمەگەن. قاۋلى قولىما تيسە قايتا اشتىق جاريالاۋدى باستايمىن دەدى، - دەيدى قۇلبايەۆتىڭ ايەلى نازەركە ءنالىباي.
ەرعالي قۇلبايەۆ - شىمكەنتتە قاڭتار وقيعاسىنا بايلانىستى ۇستالىپ، قامالعان جەتى بەلسەندىنىڭ ءبىرى. بەلسەندىلەردىڭ ەكەۋى نۇرلىباي تاتايەۆ پەن كاريما حايداربەكوۆا ەشقايدا كەتپەۋ تۋرالى قولحاتپەن قاماۋدان شىعارىلعان. ولاردىڭ ءىسىن پروكۋراتۋرا سارالاپ، «جاپپاي تارتىپسىزدىك» بابىمەن بوساتقان. قالعانى شىمكەنتتەگى ساۋلە ىقشام اۋدانىندا ورنالاسقان يچ-169/11 تەرگەۋ مەكەمەسىندە قاماۋدا جاتىر.
14 ناۋرىز كۇنى پروكۋراتۋرا «عيماراتتاردى، قۇرىلىس نىساندارىنا شابۋىل جاساۋ» (269-باپ) بابىمەن قاماۋدا جاتقان بەلسەندى جانمۇرات اشتايەۆتىڭ ءىسىن قايتا سارالاپ، جاڭا قاۋلى شىعارعان. وعان قوسىمشا «جاپپاي تارتىپسىزدىك» بابىمەن ءىس قوزعالعانى حابارلاندى.
شىمكەنتتە قاڭتار كوتەرىلىسىنە بايلانىستى 86 ادامعا قالمىستىق ءىس قوزعالىپ، ەكى ايعا قاماۋ تۋرالى سوت سانكسياسى شىققان. ءقازىر ولاردىڭ باسىم بولىگى بۇلتارتپاۋ امالىمەن قاماۋدان بوساتىلعان. بۇعان دەيىن قۇقىق قورعاۋشىلار قامالعاندار اراسىندا ازاماتتىق بەلسەندىلەر دە بارىن ايتىپ، بيلىكتى ازاماتتاردى ازاماتتىق بەلسەندىلىگى ءۇشىن قۋدالاماۋعا ۇندەگەن.
11 ناۋرىز كۇنى شىمكەنت سوتى قاڭتار وقيعاسىنا بايلانىستى ءتورت ادامدى «ۇرلىق» بابىمەن سوتتادى. ولاردىڭ باس بوستاندىعى ءۇش جىلعا شەكتەلدى.
شىمكەنتتە رەسمي دەرەك بويىنشا قاڭتار وقيعاسى كەزىندە 19 ادام قايتىس بولدى، جۇزدەن اسا ادام جارالاندى.