ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

اسفالت تەكسەرەتىن ارۋ

09 ناۋرىز 2022 102
 

قازىرگى قوعامدا ماماندىق جىنىس تاڭدامايتىن بولدى. اس ءۇي ايەلدەردىكى بولعانىمەن، دامحانا-مەيرامحانالاردا باس اسپاز بولىپ، قازان-وشاق جاعالاپ جۇرگەن ەرلەر كوپ. سول سياقتى تىك ۇشاق باسقارىپ، مال جايىپ جۇرگەن قىز-كەلىنشەكتەردى دە كوپ كەزدەستىرەمىز. بۇل نارىق تالابى. ويتكەنى مىناۋ ەركەكتىڭ، اناۋ ايەلدىڭ جۇمىسى دەپ قول قۋسىرىپ وتىرۋعا بولمايدى.

ەر-ازاماتتارمەن يىق تىرەسە جۇمىس ىستەپ جۇرگەن ارۋلار كەز-كەلگەن سالادا بار. سولاردىڭ ءبىرى اينۇر پرجەكەنوۆا. ول، الماتى وبلىستىق «جول اكتيۆتەرىنىڭ ۇلتتىق ساپا ورتالىعىندا» ساراپشى بولىپ جۇمىس ىستەيدى. قاراپايىم تىلمەن ايتقاندا  وبلىس اۋماعىندا توسەلىپ جاتقان تاس جولداردىڭ ساپاسىنا جاۋاپتى مامان. 10 جىل بويى زەرتحاناشى بولىپ جۇمىس ىستەگەن. ياعني، وبلىستىق نەمەسە رەسپۋبليكالىق ماڭىزى بار جولداردان سىناما الىپ، ساپاسىن باقىلايدى.

-جول زەرتحانالارىنىڭ نەگىزگى ماقساتى، قۇرىلىس ماتەريالدارىنىڭ ساپاسىن باقىلاۋ. ياعني اسفالتتىڭ، بيتۋمنىڭ قۇرامىن زەرتتەپ، تەحنولوگيالىق تالاپتاردىڭ ورىندالۋىن قامتاماسىز ەتەمىز. ول ءۇشىن تاس جولداردان سىناما الىپ تەكسەرەمىز. جول توسەيتىن قۇرىلىس ماتەريالدارىن شەلەككە سالىپ الىپ، زەرتحاناعا اكەلەمىز. قۇم-تاس وتە اۋىر. ءبىراق ماماندىعىم نەگىزگى جۇمىسىم وسى بولعاندىقتان ەشكىمگە شاعىم ايتپاي-اق شەلەككە سالىنعان اسفالتتى ارقالاپ جۇرە بەرەمىن. ونى زەرتحاناعا اكەلىپ ءجىتى تەكسەرەمىز. ويتكەنى تەحنولوگيالىق تالاپ بۇزىلسا، جولدىڭ ساپاسى بولمايدى. ءبىر ماۋسىمعا جەتپەي شۇرىق-تەسىك بولىپ ويىلىپ، ءمۇجىلىپ كەتۋى مۇمكىن. سوندىقتان جۇمىسىما وتە جاۋاپتى قارايمىن-دەيدى اينۇر پرجەكەنوۆا.

ول الماتى وبلىسىنداعى جولداردىڭ ساپاسىن بەس ساۋساعىنداي بىلەدى. قاي اۋدانعا  قانداي اسفالت توسەلگەنىن دە جاڭىلماي ايتىپ بەرۋگە دايىن. ويتكەنى جول سالاتىن كومپانيالاردىڭ قۇرىلىس ماتەريالدارىن ءوزى سۇزگىدەن وتكىزىپ شىعادى. ماماندىعىنا دەگەن ادالدىقتىڭ ارقاسىندا اينۇر پرجەكەنوۆا بۇگىندە ساراپشى لاۋازىمىنا دەيىن كوتەرىلدى. جول سالاسىندا جۇرگەنىنە 14 جىل بولدى. ءبىلىمى مەن بىلىكتىلىگىنىڭ ارقاسىندا ۇجىمدا وتە سىيلى قىزمەتكەر.

                                                        «جول اكتيۆتەرىنىڭ ۇسو»                                          الماتى وبلىستىق فيليالىنىڭ باسپا ءسوز قىزمەتى


 
بۇل ماقالا تۋرالى نە ويلايسىز؟