قازاقستاننىڭ انتيكوررۋپسيا قىزمەتى "سامۇرىق قازىنا"، "سامۇرىق-ەنەرگو" جانە "قازاقستان تەمىر جولىنا" (قتج) باسشىلارىنا قاتىستى تەكسەرىس باستاعانىن مالىمدەدى.
ەلدەگى ەڭ ىقپالدى ءۇش كومپانيانىڭ باسشىلارى "جەكە كومپانيالارىنىڭ پايداسى ءۇشىن قىزمەتىن اسىرا پايدالاندى" دەگەن كۇدىككە ىلىنگەن.
انتيكوررۋپسيا قىزمەتى مەملەكەتكە 3،8 ملرد تەڭگە شىعىن كەلدى دەپ مالىمدەدى. ۆەدومستۆو "تەرگەۋ مۇددەسى ءۇشىن باسقا اقپارات بەرىلمەيتىنىن" جەتكىزدى.
ەلدى دۇرلىكتىرىپ، جۇزدەگەن ادامنىڭ قازاسىنا الىپ كەلگەن قاڭتار وقيعالارىنان سوڭ قازاقستان پرەزيدەنتى قاسىم-جومارت توقايەۆ اكتيۆى ەلدىڭ ىشكى جالپى ءونىمىنىڭ 60 پايىزىنا پارا-پار "سامۇرىق-قازىنا" ءال-اۋقات قورى مەن وزگە ۇلتتىق كومپانيالاردىڭ جۇمىسى مەن باسشىلارىن سىناعان.
توقايەۆ "سامۇرىق-قازىنا" قورى نەگىزگى مىندەتىن ورىنداپ وتىر ما؟ ياعني "ۇلتتىق بايلىقتى ەسەلەي الدى ما؟" دەگەن ورىندى سۇراق تۋىندايدى. قوماقتى جالاقى الاتىن قىزمەتكەرلەرى، ديرەكتورلار كەڭەسى نەمەن اينالىسادى؟ قىزمەتى وتە قىمبات كونسالتينگ كومپانيالارىن جانە شەتەلدىك مامانداردى جۇمىسقا تارتقاننان پايدا بار ما؟" دەگەن ەدى.
وسىدان سوڭ "سامۇرىق قازىنا" شتاتى ەكى ەسە قىسقارعان.
