ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

الىس-جاقىن ەلدەردەن اكەلىنەتىن "قوقىس تاعامدار" كوشەلەر مەن جەرتولەلەردە جاسالادى – بيبىگۇل جەكسەنباي

25 قاڭتار 2024 60

حالىق قالاۋلىسى ەلىمىزدە "قوقىس تاعامدارىن" ساتۋعا تىيىم سالۋدى ۇسىندى.





سەنات دەپۋتاتى بيبىگۇل جەكسەنباي قازاقستانداعى بالالار تاماعىنىڭ ساپاسىنا قاتىستى ماسەلە كوتەردى، دەپ حابارلايدى inbusiness.kz سايتى.
"بۇگىنگى دەپۋتاتتىق ساۋال جاسوسپىرىمدەردىڭ دەنساۋلىعى، اتاپ ايتقاندا زياندى تاماقتاردىڭ كەرى اسەرى تۋرالى بولماق. سوڭعى كەزدە قازاقستان نارىعىندا شىعۋ تەگى بەلگىسىز زياندى تاعامدار قاپتاپ كەتتى. الىس-جاقىن ەلدەردەن قوقىس تاۋارلار اربالاپ تا، دوربالاپ تا تاسىلىپ جاتىر. ەڭ قورقىنىشتىسى، قوقىس تاعامداردىڭ كوبىن كوشەلەر مەن جەرتولەلەردە جاسايدى. قىتايدىڭ وزىندە بۇل ءونىمنىڭ زياندى ەكەنى دالەلدەنىپ، سايتتارىندا "قوقىس تاعامدارى" دەپ كورسەتىلگەن. جۇڭگو بيلىگى مۇنداي زالالدى تاعام وندىرۋشىلەرمەن كۇرەسىپ جاتسا دا، قوقىس تاعامدارى الىس-جاقىن شەتەلدىڭ قورعالماعان نارىقتارىن جاۋلاپ جاتىر"، - دەدى سەنات دەپۋتاتى.

ونىڭ ايتۋىنشا، ەلىمىزدىڭ ارنايى زاڭدارىنا سايكەس، ءار ونىمدە قازاق نەمەسە ورىس تىلدەرىندە شىعارۋشى، قۇرامى، پايدالانۋ مەرزىمى تۋرالى اقپارات بولۋى ءتيىس.
"الايدا دۇكەن مەن بازارلارداعى ساۋدالاناتىن باعاسى ارزان، كوزدىڭ جاۋىن الاتىن زياندى تاعامدار بويىنشا وسى تالاپتاردىڭ ورىندالۋىنا باقىلاۋ بار ما؟ ەكىنشىدەن، شەتەلدەن الىنعان تاۋارعا اقشاسىن تولەسە جىلدام سەرتيفيكات الۋعا كومەكتەسەتىن عالامتورداعى جارنامادان كوز سۇرىنەدى. جەكە دەلدال كومپانيالاردىڭ بۇل باعىتتا كوپتىگى نارىقتاعى ساپاسىز تاۋارلاردىڭ كوبەيۋىنە اكەلىپ وتىرعان جوق پا؟ ۇشىنشىدەن، زياندى تاعامداردىڭ جارناماسى جايلى ايتپاۋ مۇمكىن ەمەس. ويتكەنى بۇگىندە جۇرت، اسىرەسە بالالار قانتى مول، تۇزدى، مايلى، حيميالىق قوسپالاردىڭ مولشەرى كوپ ونىمدەر جارنامالارىنىڭ ەرىكسىز كورەرمەنى بولىپ وتىرعانى جاسىرىن ەمەس. ارينە، جارناما ءتيىستى زاڭدارمەن رەتتەلگەنىمەن، ولاردا دەنساۋلىققا زياندى ونىمدەر تۋرالى اقپاراتتىڭ تارالۋىن شەكتەيتىن نورمالار جوقتىڭ قاسى. ەلىمىزدە بالالارعا ارنالىپ جارنامالاناتىن اس-سۋدىڭ شامامەن 72 پايىزى دۇنيەجۇزىلىك دەنساۋلىق ساقتاۋ ۇيىمىنىڭ تاراپىنان تىيىم سالىنعان ازىق-تۇلىككە جاتادى ەكەن"، - دەپ اتاپ ءوتتى ول.

سەناتوردىڭ پىكىرىنشە، زياندى تاعامدار جارناماسىن كوبەيتۋ تۇسىنە بىلگەنگە جاماندىققا ازعىرۋ.

دەپۋتات الەمدە زياندى تاعامعا قوسىمشا سالىق سالۋ تاجىريبەسى ايتارلىقتاي كەڭ تاراعانىن باسا ايتتى. ماسەلەن، سوڭعى ون جىلدا مۇنداي سالىق دانيا، نورۆەگيا، فرانسيا، ۆەنگريا، مەكسيكا، اقش جانە باسقا دا ەلدەردە بار.
"وسى سالىق ءتۇرى ەنگىزىلگەن ەلدەردە وندىرۋشىلەر مەن ساتۋشىلاردىڭ 70 پايىزى زياندى جانە قوسىمشا سالىق سالىناتىن ونىمدەردى قىسقارتتى. ەل كەلەشەگىن ويلاساق حالىقتى زياندى تاعامنان قورعاۋ دا ەلدىك ماسەلەنىڭ ءبىرى"، - دەپ جالعاستىردى سەناتور.

بيبىگۇل جەكسەنباي ەلىمىزدە "قوقىس تاعامدارىن" ساتۋعا تىيىم سالۋ، ستاندارتتاۋ جانە سەرتيفيكاتتاۋ قىزمەتىن قاتاڭ باقىلاۋعا الۋ بويىنشا ءبىرقاتار ۇسىنىس تاستادى. اتاپ ايتقاندا، وسىنداي ونىمدەردى جارنامالاۋعا ۋاقىت شەكتەۋىن ەنگىزۋ، زياندى تاعامدارعا، قانتى كوپ، ەنەرگەتيكالىق ءتۇرلى سۋسىندارعا  "قوعام دەنساۋلىعىن قولداۋعا ارنالعان قوسىمشا سالىق" سالۋدى قاراستىرۋ.

بۇل ماقالا تۋرالى نە ويلايسىز؟